ទីក្រុងភ្នំពេញអាចមានខ្សែរថភ្លើងឆ្ពោះទៅព្រលានយន្ដហោះ
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី បានស្នើឲ្យប្រទេសជប៉ុនជួយគម្រោងវិនិយោគសាងសង់ផ្លូវរថភ្លើងលើអាកាស (Sky train) ដែលមានតម្លៃ
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី បានស្នើឲ្យប្រទេសជប៉ុនជួយគម្រោងវិនិយោគសាងសង់ផ្លូវរថភ្លើងលើអាកាស (Sky train) ដែលមានតម្លៃ៨០០លានដុល្លារអាមេរិក ខណៈកន្លងមក ក្រុមហ៊ុន Royal Railway បានលើកគម្រោងរថភ្លើងធុនស្រាលមួយ ចេញពីស្ថានីយរាជាយស្ម័យយានទៅកាន់ព្រលានយន្តហោះអន្តរជាតិភ្នំពេញ ហើយគ្រោងដាក់ឲ្យដំណើរការនៅឆ្នាំ២០១៨ ។
សម្តេចតេជោ ហ៊ុន សែន បានសរសេរលើទំព័របណ្តាញទំនាក់ទំនងសង្គមរបស់សម្តេចកាលពីរាត្រីថ្ងៃទី៦ សីហា កន្លងមកថា នៅក្នុងដំណើរទស្សនកិច្ច៣ថ្ងៃនេះ សម្តេចតេជោ នឹងជួបពិភាក្សាការងារជាមួយលោកនាយករដ្ឋមន្ត្រី Shinzo Abe ហើយនឹងចុះហត្ថលេខាលើឯកសារសំខាន់ចំនួន២ ដែលមានទឹកប្រាក់ប្រមាណជាង២៤០លានដុល្លារ ។ ទន្ទឹមនឹងនេះ សម្តេចតេជោនឹងពិភាក្សាអំពីគម្រោងសាងសង់ផ្លូវរថភ្លើងលើអាកាស ពីរាជធានីភ្នំពេញឆ្ពោះទៅអាកាសយានដ្ឋានអន្តរជាតិភ្នំពេញ ដែលមានទឹកប្រាក់ប្រមាណ៨០០លានដុល្លារអាមេរិក ។
ទំហំពាណិជ្ជកម្មរវាងកម្ពុជា-ជប៉ុនកាលពីឆ្នាំមុន មានទឹកប្រាក់ប្រមាណ១.៣៥៥លានដុល្លារ ក្នុងនោះកម្ពុជានាំចេញចំនួន៨២៧លានដុល្លារ ខណៈកម្ពុជានាំចូលពីជប៉ុនចំនួន៥២៨លានដុល្លារ ។
ទាក់ទងនឹងបញ្ហានេះ លោក វ៉ា ស៊ីមសូរិយា អ្នកនាំពាក្យក្រសួងសាធារណការ និងដឹកជញ្ជូន បានថ្លែងតាមទូរស័ព្ទនាព្រឹកថ្ងៃទី៧ សីហា ថា កន្លងមក ទីភ្នាក់ងារជប៉ុនសម្រាប់កិច្ចសហប្រតិបត្តិការអន្តរជាតិ (JICA) បានសិក្សាពីគម្រោងវិនិយោគ និងសាងសង់ផ្លូវរទេះភ្លើងលើអាកាសនេះរួចហើយ ប៉ុន្តែការសិក្សានោះមិនទាន់បានបញ្ចប់ និងមានផែនការលម្អិតទេ។ លោកបន្តថា គម្រោងនេះត្រូវមានការសិក្សាលម្អិត និងផែនការច្បាស់លាស់ណាស់ដើម្បីធ្វើឲ្យគម្រោងនេះទទួលបានជោគជ័យ ។
លោកបន្តថា ៖« គម្រោងដែលសម្តេចបានស្នើឡើងនេះ អាចជាគម្រោងស្នើកម្ចីពីភាគីជប៉ុន មិនមែនជាការវិនិយោគទេ ព្រោះកន្លងមក យើងបានស្នើសុំឲ្យជប៉ុនជួយលើគម្រោងនេះ» ។ លោកថា ៖« ប្រសិនជាគម្រោងនេះកើតឡើងមែន វាចំណេញច្រើនណាស់ ពិសេសជួយកាត់បន្ថយការកកស្ទះចរាចរណ៍ ហើយខ្ញុំជឿថា ប្រជាពលរដ្ឋកម្ពុជានឹងប្រើប្រាស់រថភ្លើងអាកាសធ្វើដំណើរ ដូចក្រុងបាងកកអីចឹង » ។
កាលពីពេលថ្មីៗនេះ លោកទេសរដ្ឋមន្ត្រី ស៊ុន ចាន់ថុល ក៏បានលើកឡើងពីគម្រោងវិនិយោគរថភ្លើងធុនស្រាលមួយ ដែលវិនិយោគដោយក្រុមហ៊ុន Royal Railway ដើម្បីដាក់ឲ្យដំណើរការរថភ្លើង២ខ្សែ ដោយខ្សែទី១ចេញពីស្ថានីយរាជាយស្ម័យយានទៅកាន់ព្រលានយន្តហោះអន្តរជាតិភ្នំពេញ ហើយគម្រោងនេះគ្រោងដាក់ឲ្យដំណើរការនៅឆ្នាំ២០១៨ ។
លោក វ៉ា ស៊ីមសូរិយា បានថ្លែងថា គម្រោងរថភ្លើងលើអាកាសដែលសម្តេចគ្រោងស្នើការគាំទ្រពីរាជរដ្ឋាភិបាលជប៉ុន និងគម្រោងរបស់ក្រុមហ៊ុន Royal Railway មិនទាក់ទងគ្នា ឬមានបញ្ហាអ្វីទេ ព្រោះវាជាគម្រោងដាច់ដោយឡែកពីគ្នា ។
អ្នកឯកទេសផ្នែកនគរូបនីយកម្ម លោកបណ្ឌិត វ៉ាន់ វ៉ាត បានថ្លែងថា ការសាងសង់ផ្លូវរថភ្លើងអាកាស ជាជម្រើសថ្មីមួយសម្រាប់រាជធានីភ្នំពេញ ដើម្បីដោះស្រាយបញ្ហាកកស្ទះចរាចរណ៍នៅក្នុងទីក្រុង ដែលមានសភាពអាក្រក់ឡើងពីមួយថ្ងៃទៅមួយថ្ងៃ ប៉ុន្តែការសាងសង់ទាមទារឲ្យមានការសិក្សាច្បាស់លាស់ និងគោរពបានតាមប្លង់មេរបស់ក្រុង ដើម្បីផ្តល់នូវសោភ័ណភាព និងទេសភាពល្អក្នុងទីក្រុង ។
លោកបន្តថា ៖« ការសាងសង់ផ្លូវរថភ្លើងលើអាកាស អាចមានផលប៉ះពាល់ច្រើនលើផ្លូវរត់ ព្រោះបច្ចុប្បន្ន ការសាងសង់សំណង់នានានៅទីតាំងមួយចំនួនមិនបានគោរពតាមប្លង់មេរបស់ក្រុងនោះឡើយ » ។ លោកបន្តថា ៖« ហេតុនេះការសិក្សាពីផលប៉ះពាល់ប្រជាពលរដ្ឋ ពីបញ្ហាបរិស្ថានទាមទារឲ្យមានការសិក្សាហ្មត់ចត់ » ។
នៅពេលលើកឡើងនូវការគាំទ្រពីប្រជាពលរដ្ឋឬយ៉ាងណា លោកបណ្ឌិត វ៉ាន់ វ៉ាត បានពន្យល់ថា ការជិះពីប្រជាពលរដ្ឋឬអត់ វាអាស្រ័យលើបណ្តាញរថភ្លើងអាកាសផ្តល់ភាពងាយស្រួលកម្រិតណា និងទាមទារឲ្យមានការអប់រំដល់ប្រជាពលរដ្ឋពីផលប្រយោជន៍នៃការប្រើប្រាស់រថភ្លើង ដែលផ្តល់ជម្រើសថ្មីនេះ។ លោកបន្តថា ខ្សែរថភ្លើងអាកាស ក៏ជាផ្នែកមួយជួយលើកកម្ពស់សោភ័ណភាពទីក្រុង និងទាក់ទាញភ្ញៀវទេសចរផងដែរ ៕
ចែករំលែកព័តមាននេះ