ភ្លៀងលាយឡំខ្យល់ព្យុះ បណ្តាលឱ្យប៉ើងដំបូលផ្ទះយាយ និងចៅកម្សត់
ខេត្តសៀមរាប ៖ នៅរសៀលថ្ងៃទី០៣ ខែសីហា ឆ្នាំ២០១៧នេះ ស្ថិតនៅភូមិកោះក្របៅ ឃុំក្រឡាញ់ ស្រុកក្រឡាញ់ ខេត្តសៀមរាប មានភ្លៀង…
ខេត្តសៀមរាប ៖ នៅរសៀលថ្ងៃទី០៣ ខែសីហា ឆ្នាំ២០១៧នេះ ស្ថិតនៅភូមិកោះក្របៅ ឃុំក្រឡាញ់ ស្រុកក្រឡាញ់ ខេត្តសៀមរាប មានភ្លៀង លាយឡំ និងខ្យល់ព្យុះ ធ្វើឱ្យបោកបក់ ផ្ទះលោកយាយ ឌិត ធឿម អាយុ៧៨ឆ្នាំ និងចៅ ដែលនៅដាច់ស្រយាល បណ្តាលឱ្យប៉ើងដំបូលសង្កសីអស់ចំនួន៦សន្លឹកយ៉ាងដំណំ ខណៈលោកយាយទៅវត្ត ចំណែកចៅទៅសាលារៀន សំណាងល្អ គ្មានអ្នកនៅផ្ទះ ប៉ុន្តែត្រូវបានអាជ្ញាធរមូលដ្ឋាននាំគ្នាជួយសាងសង់ជូនពួកគាត់ឡើងវិញ។ បើតាមប្រភពពីសមត្ថកិច្ចមូលដ្ឋានបានប្រាប់នៅរសៀលថ្ងៃទី៤ ខែសីហា ឆ្នាំ២០១៧នេះថា បន្ទាប់ពីមានភ្លៀងធ្លាក់មួយមេមក ក៏មានខ្យល់ព្យុះ បណ្តាលឱ្យបក់បោកប៉ើងដំបូលផ្ទះលោកយាយ និងចៅ ប៉ុន្តែពុំមានអ្នកណាម្នាក់រងរបួសនោះឡើយ។
ប្រភពបានបន្តថា ភ្លាមៗនោះអាជ្ញាធរមូលដ្ឋានក្នុង ឃុំក្រឡាញ់ ស្រុកក្រឡាញ់ ខេត្តសៀមរាប ក៏បានចុះទៅដល់លំនៅដ្ឋានលោកយាយ ឌិត ធឿម ហើយបានពិនិត្យឃើញថា ក្នុងហេតុការណ៍មានភ្លៀង និងខ្យល់ព្យុះ បណ្តាលឱ្យរប៉ើងដំបូលផ្ទះនេះ ប៉ុន្តែពុំមានអ្នករងរបួសដល់មនុស្សឡើយ ដោយសារលោកយាយទៅវត្ត ហើយចៅគាត់បានទៅរៀនបាត់ទៀត សំណាងល្អដែរពុំមានអ្នកនៅផ្ទះ ដូច្នេះខាងឃុំ និងរៀបចំកម្លាំងមូលដ្ឋាន ដើម្បីជួយនាំគ្នាសាងសង់លំនៅដ្ឋានជូនលោកយាយឡើងវិញ។ សូមបញ្ជាក់ផងដែរថា សព្វថ្ងៃលោកយាយ ឌិត ធឿម រស់នៅជាមួយចៅប្រុសឈ្មោះ គឹម សូរិយា អាយុ១២ឆ្នាំ ដែលឪពុកម្តាយគេ បានធ្វើចំណាកស្រុកក្រៅប្រទេសបាត់ហើយ បន្សល់ទុកកូនរស់នៅជាមួយជីដូនតែ២នាក់ប៉ុណ្ណោះ៕
ចែករំលែកព័តមាននេះ