អ្នកប្រើប្រាស់ iPhone ឬ iPad ប្រហែលជិតទាំងអស់ធ្លាប់បានឮអ្នកដទៃប្រាប់តៗគ្នាថា ឲ្យបិទកម្មវិធីដែលប្រើប្រាស់រួចលើ iPhone ឬ iPad ដើម្បីបង្កើនល្បឿន និងកាត់បន្ថយការចំណាយថ្មទូរស័ព្ទ ប៉ុន្តែការធ្វើដូច្នេះ គឺខុសទាំងស្រុងហើយ ។
អ្នកប្រើប្រាស់ប្រហែលគិតថា វាជាគំនិតល្អមួយក្នុងការបិទកម្មវិធីដែលបានប្រើប្រាស់រួច ព្រោះវាប្រៀបបាននឹងកុំព្យូទ័រ ។ ពេលណាកុំព្យូទ័របើកដំណើរការកម្មវិធីច្រើនក្នុងពេលតែមួយនោះ វានឹងមានល្បឿនយឺត ហើយប្រើប្រាស់ថាមពលច្រើន ។
ប៉ុន្តែប្រព័ន្ធដំណើរការរបស់ក្រុមហ៊ុន Apple ដែលមានក្នុង iPhone និង iPad គ្មានលក្ខណៈដូចប្រព័ន្ធដំណើរការកុំព្យូទ័រទេ ។ ការបិទកម្មវិធីទូរស័ព្ទ ឬថាប្លេត បន្ទាប់ពីបានប្រើប្រាស់រួច មិនជួយឲ្យឧបករណ៍របស់អ្នកដំណើរការលឿន ឬកាត់បន្ថយការអស់ថ្មទេ ។
យោងតាមលោក John Gruber អ្នកបង្កើតកម្មវិធី និងតាមដាន Apple បានឲ្យដឹងថា វាបង្កការប៉ះពាល់ទៅវិញទេ ។
លោកបកស្រាយថា កម្មវិធីទូរស័ព្ទ ឬថាប្លេត ដែលមិនប្រើប្រាស់នោះ ត្រូវបានផ្អាកដំណើរការទាំងស្រុង ។ ដូច្នេះ វាមិនប្រើប្រាស់កម្លាំងម៉ាស៊ីន ឬថាមពលទេ ខុសពីកម្មវិធីកុំព្យូទ័រដែលអ្នកបើកទុកចោល ។
លោកបន្តថា ការបិទរួចបើកកម្មវិធីទាំងនោះឡើងវិញទេ ដែលបង្កឲ្យល្បឿនថយចុះ និងត្រូវការថាមពលច្រើន ។ លោកថា ៖ « ប្រព័ន្ធ IOS ពូកែបន្តដំណើរការកម្មវិធីដែលបានផ្អាកបណ្តោះអាសន្នណាស់ ។ ដូច្នេះ វាត្រូវការកម្លាំងម៉ាស៊ីន និងថាមពលតិចជាងការបិទកម្មវិធី រួចបើកឡើងវិញ ។ មិនត្រឹមតែការបិទកម្មវិធីមិនអាចផ្តល់អត្ថប្រយោជន៍អ្វីទេ តែវាក៏មានផលប៉ះពាល់ផងដែរ ។ ថ្មទូរស័ព្ទរបស់អ្នកនឹងអន់ថយ ហើយអ្នកនឹងចំណាយពេលយូរក្នុងការផ្លាស់ប្តូរកម្មវិធីដែលចង់ប្រើប្រាស់ » ៕
ចែករំលែកព័តមាននេះ