រាជធានីភ្នំពេញ ៖ ការតុបតែងភ្លើងរថយន្ដ ថ្វីដ្បិតតែស្អាត និងមើលទៅគួរឲ្យចាប់អារម្មណ៍ពីអ្នកដំណើរក្ដី ប៉ុន្ដែប្រសិនបើការដំឡើងភ្លើងខុសបច្ចេកទេស និងមិនត្រឹមត្រូវតាមមាត្រដ្ឋានចរាចរណ៍ ក៏អាច
រាជធានីភ្នំពេញ ៖ ការតុបតែងភ្លើងរថយន្ដ ថ្វីដ្បិតតែស្អាត និងមើលទៅគួរឲ្យចាប់អារម្មណ៍ពីអ្នកដំណើរក្ដី ប៉ុន្ដែប្រសិនបើការដំឡើងភ្លើងខុសបច្ចេកទេស និងមិនត្រឹមត្រូវតាមមាត្រដ្ឋានចរាចរណ៍ ក៏អាចបង្កគ្រោះថ្នាក់ដល់ខ្លួនឯង និងអ្នកដំណើរផ្សេងទៀតដែរ ដូចជា ឆ្លងចរន្ដបណ្ដាលឲ្យឆេះ ឬធ្វើឲ្យអ្នកដំណើរមានការភាន់ច្រឡំជាដើម ។
ជាជំនាញប្រព័ន្ធភ្លើង និងវិភាគរថយន្ដដោយប្រព័ន្ធកុំព្យូទ័រ ប្រចាំនៅក្រុមហ៊ុនលក់រថយន្ដពិភពថ្មី បានឲ្យដឹងតាមទូរស័ព្ទកាលពីថ្ងៃទី២ សីហា ថា បើការតុបតែង ឬផ្លាស់ប្ដូរ
អំពូលធម្មតា វាមិនមានអ្វីគួរឲ្យបារម្ភទេ ប៉ុន្ដែបើតុបតែងអំពូលច្រើន គួរតែមានការប្រុងប្រយ័ត្ន ប្រសិនបើការតខ្សែភ្លើងមិនបានល្អ វាអាចឆ្លងចរន្ដនាំឲ្យមានបញ្ហា ។
លោក អេង បូរី អ្នកជំនាញរូបនេះនិយាយថា ៖« ប្រសិនយើងគ្រាន់តែប្ដូរអំពូលធម្មតាមកដាក់អំពូល LED វាមិនអីទេ តែបើយើងតុបតែងភ្លើងដោយមានតខ្សែច្រើននោះ គួរមានការប្រុងប្រយ័ត្ននៅមុខតំណ ព្រោះវាអាចឆ្លងចរន្ដ » ។
លោកបន្ដថា ៖« បើជាងតប្រព័ន្ធភ្លើងត្រឹមត្រូវតាមបច្ចេកទេស និងយកចិត្តទុកដាក់ វាមិនជាបញ្ហាចោទទេ ប៉ុន្ដែបើយកខ្សែភ្លើងធម្មតា ឬគុណភាពអន់មកតវិញ វាមានហានិភ័យបន្ដិច ព្រោះខ្សែអស់នោះវាមិនធន់នឹងកម្ដៅរថយន្ដបានទេ ពិសេសការបើកបរផ្លូវឆ្ងាយ » ។
ការតុបតែងភ្លើងមួយចំនួនដែលខុសពីមាត្រដ្ឋានចរាចរណ៍ អាចបង្កឲ្យមានគ្រោះថ្នាក់ដល់អ្នកដំណើរផ្សេងទៀតផងដែរ ដោយសារតែការភាន់ច្រឡំភ្លើង ឬការប្រើអំពូលហ្វាឡាស៊ែរញាក់ចាំងភ្នែកជាដើម ។
អ្នករត់តាក់ស៊ីភ្នំពេញ-តាកែវ តាមផ្លូវជាតិលេខ២ លោក អឹម គឹមឆុន បានឲ្យដឹងដែរថា ជារៀងរាល់ថ្ងៃ បើធ្វើដំណើរពេលយប់គឺពិបាកបន្តិច បើទោះបីជាស្ថានភាពផ្លូវបច្ចុប្បន្នល្អជាងមុនក៏ដោយ ដោយសារតែពេលខ្លះ ប៉ះចំរថយន្ដបើកបញ្ច្រាសទិសដែលប្រើភ្លើងហ្វាឡាស៊ែរ ឬអំពូលLED ភ្លឺចិញ្ចាចបាញ់ចំភ្នែក ទោះបីជាលោកព្យាយាមញាក់ភ្លើងសុំឲ្យគេទម្លាក់មកកូតវិញក៏ដោយ ។
អ្នករត់តាក់ស៊ីរូបនេះនិយាយថា ៖« បើរថយន្ដប្រើអំពូលហ្វាធម្មតា ចាំងភ្នែកតែមួយភ្លែតទេ ប៉ុន្ដែបើប៉ះរថយន្ដប្រើអំពូលឡាស៊ែរ ឬអំពូល LED ដែលភ្លឺចិញ្ចាចម្ដងៗ ខ្ញុំចាំងភ្នែកមើលស្ថានភាពខាងមុខមិនឃើញទេ គឺងងឹតមែនទែន » ។
លោកបន្ដថា ៖« អ្នកបើកបរភាគច្រើន ពេលជួបគ្នាបែបនេះ ខ្ញុំញាក់ភ្លើងសុំឲ្យគេទម្លាក់មកកូត អ្នកខ្លះទម្លាក់ តែមួយចំនួនតូចវិញ មិនខ្វល់នឹងទុក្ខលំបាកអ្នកដំណើរដែលមកបញ្ច្រាសទិសទេ ហើយពេលជួបស្ថានភាពបែបនេះម្ដងៗខ្ញុំបារម្ភពីគ្រោះថ្នាក់នៅខាងមុខដែរ តែមិនហ៊ានឈប់ ព្រោះខ្លាចអ្នកបើកពីក្រោយបុក អីចឹងមានតែបន្ថយល្បឿន និងយកជើងដាក់លើហ្វ្រាំងប៉ុណ្ណោះ ។ ចំណែករថយន្ដដែលប្រើភ្លើងបែបនេះភាគច្រើនជារថយន្ដទំនើបៗ និងបើកបរដោយយុវវ័យ » ។
យោងតាមច្បាប់ចរាចរណ៍ផ្លូវគោក ជំពូកទី៤ មាត្រា២៧ បានចែងថា នៅពេលយប់ ឬពេលថ្ងៃ កាលណាមើលមិនឃើញច្បាស់គ្រប់គ្រាន់ ដូចជា ពេលភ្លៀងខ្លាំង ចុះអ័ព្ទ ឆ្លងកាត់ផ្លូវរូង អ្នកបើកបរយានយន្ដនៅលើទ្រូងផ្លូវ ត្រូវប្រើប្រាស់ភ្លើងសញ្ញាតាមលក្ខខណ្ឌដូចជា ប្រើភ្លើងហ្វានៅពេលយប់ នៅលើទ្រូងផ្លូវដែលគ្មានអគ្គិសនីបំភ្លឺ ដើម្បីមើលទៅមុខឲ្យបានឆ្ងាយ តែត្រូវប្រុងប្រយ័ត្នកុំឲ្យរំខានដល់ចរាចរណ៍ដែលមកពីទិសផ្ទុយ ។ ហាមបើកភ្លើងហ្វានៅក្នុងទីក្រុង ឬទីប្រជុំជនដែលមានភ្លើងអគ្គិសនីគ្រប់គ្រាន់ លើកលែងតែករណីធ្វើសញ្ញាសុំជែង ឬសុំបើកផ្លូវដោយប្រើឆ្លាស់គ្នាជាមួយភ្លើងកូត។ ប្រើភ្លើងកូតនៅពេលយប់ក្នុងទីប្រជុំជន និងក្រៅទីប្រជុំជន ដែលមានភ្លើងអគ្គិសនីបំភ្លឺតាមផ្លូវ និងក្រៅទីប្រជុំជនដែលគ្មានភ្លើងអគ្គិសនីបំភ្លឺតាមផ្លូវ ក្នុងករណីរៀបនឹងជៀសយានមួយផ្សេងទៀត និងនៅពេលបើកបរពីក្រោយជិតយានជំនិះមួយទៀត ។
ចំណែកពេលថ្ងៃ អាចប្រើភ្លើងកូតបាន កាលណាមើលមិនឃើញច្បាស់គ្រប់គ្រាន់ដូចជា ភ្លៀងខ្លាំង ឬចុះអ័ព្ទ ឬឆ្លងកាត់ផ្លូវរូងជាដើម ។ ភ្លើងហ្វា និងកូត អាចប្រើឆ្លាស់គ្នាធ្វើឲ្យមានពន្លឺភ្លឹបភ្លែតៗ ជាសញ្ញាជំនួសឲ្យស៊ីផ្លេនៅពេលយប់បាន ។ ចំណែកមាត្រា៣០ បានចែងថា ការបំពាក់សូរស័ព្ទ ភ្លើងបំភ្លឺ ឬភ្លើងលម្អផ្សេងទៀត ក្រៅពីកំណត់លក្ខខណ្ឌបច្ចេកទេសនៃយានជំនិះ ត្រូវបានហាមឃាត់ ។
តាមរបាយការណ៍បូកសរុបលទ្ធផលនៃការអនុវត្តច្បាប់ស្ដីពីចរាចរណ៍ផ្លូវគោក ប្រចាំឆមាសទី១ ឆ្នាំ២០១៧នេះ បានបង្ហាញថា គ្រោះថ្នាក់ចរាចរណ៍ទូទាំងប្រទេសកើតឡើង១.៨៨៣លើក បណ្តាលឱ្យមនុស្សស្លាប់៩១៩នាក់ និងរបួស២.៩៨២នាក់ ក្នុងនោះកត្ដាបង្កឱ្យមានគ្រោះថ្នាក់កើតឡើង រួមមាន ការបើកបរលើសល្បឿនកំណត់៣៨%, មិនគោរពសិទ្ធិ១៦%, មិនប្រកាន់ស្ដាំ១២%, ស្រវឹង១១%, បើកជែង១០%, បត់១០%, កត្តាយានយន្ដ៣%, ងងុយ១% និងកត្តាផ្លូវ១% ។ បើធៀបរយៈពេលដូចគ្នាកាលពីឆ្នាំ២០១៦ កើនឡើង១៦លើក អ្នកស្លាប់កើន១១នាក់ តែអ្នករងរបួសថយចុះ២៨២នាក់ ៕
ចែករំលែកព័តមាននេះ