ព្រែកត្រើយកោះកំពុងត្រូវបានគេចាក់ដីលុប សមត្ថកិច្ចជំនាញថាមិនបានដឹង
ខេត្តកំពត ៖ ដៃព្រែកកំពង់បាយដែលបែកចេញទៅកាន់វត្តត្រើយកោះដែលមានឈ្មោះថា(ព្រែកត្រើយ កោះ) ស្ថិតក្នុងភូមិទ្វីខាងត្បូង សង្កាត់អណ្តូងខ្មែរ
ខេត្តកំពត ៖ ដៃព្រែកកំពង់បាយដែលបែកចេញទៅកាន់វត្តត្រើយកោះដែលមានឈ្មោះថា(ព្រែកត្រើយ កោះ) ស្ថិតក្នុងភូមិទ្វីខាងត្បូង សង្កាត់អណ្តូងខ្មែរ ក្រុងកំពត ព្រែកត្រើយកោះនេះក៏មានទំហំធំប៉ុននឹង ព្រែកកំពង់បាយដែរ ដែលភ្ជាប់ទៅសមុទ្រធំខាងក្រៅដូចគ្នា។ ប៉ុន្តែនៅពេលថ្មីៗនេះដៃព្រែកត្រើយកោះនេះកំពុងត្រូវបានគេចាក់ដីលុបព្រែកចូលទៅយ៉ាងជ្រៅ ហើយរៀបខឿនទប់ដីយ៉ាងអនាធិបតេយ្យ ដោយគ្មានឃើញអាជ្ញាធរភូមិសង្កាត់ ឬសមត្ថកិច្ច និងមន្ត្រីជំនាញរបស់ក្រុង និងខេត្តទៅពិនិត្យ ហើយមានវិធានការចំពោះការរំលោភចាក់ដីក្នុងព្រែកដើម្បីធ្វើជាកម្មសិទ្ធិ និងសង់សំណង់ជាផ្ទះថ្មនៅលើដីដែលចាក់ថ្មីនេះសោះនោះទេ។
ការចាក់ដីលុបព្រែកពីសំណាក់ជនមិនខ្លាចច្បាប់ខាងលើត្រូវបានមហាជនមួយចំនួនធំក្នុងក្រុងកំពតធ្វើការរិះគន់មកលើមន្ត្រីជំនាញភូមិបាល និងសំណង់ក្រុងព្រមទាំងអាជ្ញាធរក្រុងផងដែរថា បើសមត្ថកិច្ចជាមន្ត្រីជំនាញ ឬអាជ្ញាធរមិនបើកភ្លើងខៀវម្លេះអ្នកដែលចាក់ដីលុបព្រែកដើម្បីសង់លំនៅដ្ឋានមិនហ៊ានរំលោភចាក់ដីនោះទេ។ ទាក់ទិននឹងការរិះគន់ពីសំណាក់មហាជនមកលើសមត្ថកិច្ចជំនាញខាងលើ កោះសន្តិភាព បានភ្ជាប់ទូរសព្ទ័ទៅលោក ចែម ផា អភិបាលរងក្រុងទទួលបន្ទុកខាងក្រុមការងារសំណង់ដើម្បីសុំឲ្យលោកស្រាយបំភ្លឺជុំវិញការចាក់ដីលុបព្រែក និងការសាងសង់លំនៅដ្ឋានលើដីចំណីព្រែកដែលទើបនឹងចាក់ថ្មីៗនេះ ត្រូវបានលោកឲ្យដឹងថា ប៉ុន្មានថ្ងៃនេះលោកមិនបាននៅក្រុងទេ លោកត្រូវឡើងទៅប្រជុំនៅភ្នំពេញ។
ដូច្នេះលោកពុំបានដឹងថា មានគេលួចចាក់ដីរហូតឈានទៅសាងសង់សំណង់រឹងនោះទេ ចាំមើលលោកឲ្យក្រុមការងាររបស់សាលាក្រុងចុះទៅពិនិត្យមើលនៅរសៀលនេះ ពីព្រោះគ្មានឃើញមានលិខិតស្នើសុំសាងសង់នៅចំណុចនេះទេ។ ចំណែកលោក បេង សំណាង ប្រធានការិយាល័យភូមិបាល និងសំណង់ក្រុងកំពតបានប្រាប់ កោះសន្តិភាព នៅរសៀលថ្ងៃទី០២ ខែសីហា ឆ្នាំ២០១៧នេះ ជុំវិញការរំលោភចាក់ដីលុបដៃព្រែក និងសង់សំណង់រឹងនេះថា លោកពុំបានដឹងមានគេលួចចាក់ដីចូលជ្រៅទៅក្នុងព្រែកនោះទេ ហើយនៅចំណុចនេះក៏គ្មានច្បាប់អនុញ្ញាតឲ្យជនណាម្នាក់ចាក់ដីចូលទៅក្នុងព្រែកដើម្បីធ្វើជាដីកម្មសិទ្ធិដូច្នេះនោះទេ។ បើមានករណីដូច្នេះមែនថ្ងៃស្អែកលោកនឹងដឹកនាំក្រុមការងារចុះទៅពិនិត្យមើលបើគ្មានលិខិតស្នាមច្បាស់លាស់ទេលោកនឹងឲ្យផ្អាកការសាងសង់ និងមានវិធានការចំពោះការចាក់ដីលុបព្រែកខាងលើ លោក បេង សំណាង បានបញ្ជាក់ថាពួកនេះ ច្រើនតែលួចចាក់ដីនៅពេលយប់។
ជុំវិញករណីខាងលើនេះដែរ លោក ស៊ុយ ធា ប្រធានមន្ទីរបរិស្ថានខេត្តបានឲ្យដឹងថា លោកក៏ពុំបានដឹងថាគេចាក់ដីសង់សំណង់នៅចំណុចខាងលើនោះដែរ បើមានករណីនេះកើតឡើងលោកនឹងឲ្យក្រុមការងារជំនាញចុះទៅពិនិត្យមើល តើអ្នកណាអនុញ្ញាតឲ្យចាក់ដីលុបព្រែកដើម្បីសាងសង់សំណង់រឹងដូច្នេះ។ គួររំលឹកថា ជុំវិញការស្រាយបំភ្លឺរបស់លោកអភិបាលរងក្រុង និងលោកប្រធានការិយាល័យភូមិបាលក្រុង គឺជាដំណោះស្រាយមួយមិនទាន់សមស្របសម្រាប់ការ រិះគន់របស់មហាជននោះទេ ដែលលោកឆ្លើយថាពុំ បានដឹងគេចាក់ដី ពីព្រោះការចាក់ដីលុបព្រែកនេះ មិនមែនចាក់១០ ឬ២០រថយន្តបាន បែបឆក់កណ្តៀតនោះទេ គឺចាក់រាប់រយរថយន្តទំរាំបានដីយ៉ាងធំទៅក្នុងទឹកព្រែកត្រើយកោះនេះ៕
ចែករំលែកព័តមាននេះ