ជារឿយៗ យើងតែងតែផ្តោតការយកចិត្តទុកដាក់លើថ្មទូរស័ព្ទស្មាតហ្វូន ប៉ុន្តែមិនសូវចាប់អារម្មណ៍លើការថែរក្សាថ្មកុំព្យូទ័រយួរដៃទេ ។ ជាជាងការយកកុំព្យូទ័រយួរដៃរបស់អ្នកទៅកន្លែងជួសជុល ខាងក្រោមនេះ គឺជាមធ្យោបាយមួយចំនួនដើម្បីថែរក្សាថ្មកុំព្យូទ័រយួរដៃរបស់អ្នកឲ្យប្រើប្រាស់បានកាន់តែយូរ ។
១.បន្ថយពន្លឺរបស់អេក្រង់ ៖
មូលហេតុចម្បងនៃការធ្វេសប្រហែសក្នុងការខ្ជះខ្ជាយថាមពលថ្មលើឧបករណ៍អេឡិចត្រូនិក ចល័តទំនើបៗជាច្រើន មិនថា កុំព្យូទ័រយួរដៃ ស្មាតហ្វូន ឬថេប្លេតទេ គឺនៅលើអេក្រង់ ។ ការកាត់បន្ថយពន្លឺលើអេក្រង់ គឺជាវិធីដ៏សាមញ្ញក្នុងការសន្សំថាមពលថ្ម ព្រមទាំងថែរក្សារអាយុរបស់ថ្ម ឲ្យប្រើប្រាស់បានកាន់តែយូរ ។
២.កំណត់ឲ្យអេក្រង់បិទដោយស្វ័យប្រវត្តិ ៖
ប្រសិនបើអ្នកត្រូវដើរចេញពីកុំព្យូទ័រយួរដៃរយៈពេលខ្លី អេក្រង់របស់វានឹងនៅតែដំណើរ ការ ហើយនឹងនៅតែប្រើប្រាស់ថាមពលដែលបានមកពីថ្មកុំព្យូទ័រ។ អ្នកអាចកំណត់មុខងារក្នុងកុំព្យូទ័រដើម្បីឱ្យវារលត់ និងបិទអេក្រង់នៅពេលអ្នកមិនប្រើវា ។ អ្នកអាចរំកិលកូនកណ្ដុរ ឬចុចលើគ្រាប់ចុចណាមួយដើម្បីបើកអេក្រង់ឡើងវិញ ដោយមិនចាំបាច់ត្រូវរង់ចាំយូរ ដូច្នេះនេះជាវិធីងាយស្រួលក្នុងការសន្សំសំចៃថាមពលថ្មកុំព្យូទ័រ ។
៣.បិទមុខងារប្ល៊ូធូស និងមុខងារផ្សេងៗទៀត ៖
កុំព្យូទ័រយួរដៃរបស់អ្នកទំនងជាមានមុខងារវិទ្យុ ប្ល៊ូធូស ហើយអាចមានរន្ធអុីនហ្វ្រារ៉េដ (IR) ផងដែរ ។ មុខងារនៃឧបករណ៍ទាំងអស់នេះប្រើថាមពលថ្មកុំព្យូទ័រដើម្បីបើក និងដំណើការ។ អ្នកអាចសន្សំថាមពលថ្មកុំព្យូទ័រដោយបិទវានៅពេលដែលអ្នកមិនប្រើវា ។ ការបិទមុខងារ Wi-Fi ក៏អាចជួយសន្សំថាមពលថ្មផងដែរ ប្រសិនបើអ្នកមិនប្រើវា ។
៤.សម្អាតថ្មកុំព្យូទ័រយួរដៃ ៖
មនុស្សភាគច្រើនមិនសូវខ្វល់ខ្វាយរឿងសម្អាតថ្មកុំព្យូទ័រយួរដៃនោះទេ ដោយទុកវាចោលនៅខាងក្នុងកុំព្យូទ័រ និងទុកឲ្យវាធ្វើការទាល់តែវាខូច។ ជារៀងរាល់ខែ អ្នកគួរ តែយកថ្មចេញពីកុំព្យូទ័រ ហើយជូតសម្អាតដោយ ប្រុងប្រយ័ត្នដោយប្រើក្រណាត់ទន់ សម្អាតធូលី ហើយត្រូវប្រាកដថាកន្លែងដែលអ្នកបានប៉ះពាល់លើថ្មកុំព្យូទ័រ ត្រូវជូតឲ្យបានស្អាតជាពិសេស ។
សូមចាំថា ចំណុចនេះអាចអនុវត្តបានចំពោះម៉ូដែលណាដែលថ្មរបស់វាអាចដកចេញពីកុំព្យូទ័រប៉ុណ្ណោះ ។ ខណៈដែលកុំព្យូទ័រយួរដៃនាពេលឥឡូវនេះមានលក្ខណៈស្តើង និងស្រាលជាងមុន ចំណែកឯបញ្ហាថ្មក៏មានភាពប្រណីតជាងមុនផងដែរ។ ប្រសិនបើកុំព្យូទ័រយួរដៃរបស់អ្នកមានថ្មដែលបិទជិត និងមិនអាចយកចេញពីកុំព្យូទ័រនោះ អ្នកនឹងមិនមានអ្វីត្រូវព្រួយបារម្ភទៀតទេ ៕
ចែករំលែកព័តមាននេះ