រាជធានីភ្នំពេញ ៖ « បើសិនជាមានលុយ ខ្ញុំជឿថាមនុស្ស១០ទាំង១០ ចិត្តស្រឡាញ់ប្រាកដណាស់គឺពិតជាត្រូវការទិញអាថ្មីបកពីកេសហើយ »។ នេះគឺជាការលើកឡើងរបស់អ្នកនាង ផា ណេត ជាអ្នកជំនួញស្ត្រីវ័យកណ្ដាលមួយរូបដែលបច្ចុប្បន្នកំពុងប្រើប្រាស់រថយន្ត Pick-up មួយទឹក ម៉ាកតូយ៉ូតា ស៊េរីឆ្នាំ២០១៥ ។
អ្នកនាងអះអាងថា បានប្រើប្រាស់រថយន្តមួយទឹកអស់ជាច្រើនគ្រឿងមកហើយ គឺតាំងពីឆ្នាំ១៩៩៩មកម្ល៉េះ ហើយរាល់រថយន្តដែលប្រើនោះដូចជាគ្មានបង្កផលអ្វីដល់ការធ្វើដំណើររបស់អ្នកនាងនោះទេ ។
ស្ថិតក្នុងវ័យ៤៥ឆ្នាំ អ្នកជំនួញស្ត្រីរូបនេះបានឲ្យដឹងថា អ្នកនាងទិញរថយន្ដនេះនៅឆ្នាំ២០១៥ គិតមកពេលនេះ វាទើបតែខូចពីរដងគត់ ហើយតម្លៃនៃការជួសជុល ក៏មិនថ្លៃដែរ ។
អ្នកនាងថា ៖« ចិត្តស្រឡាញ់គឺចង់ទិញថ្មីសន្លាងតែម្តង តែហេតុផលមួយដែលខ្ញុំជ្រើសរើសរបស់មួយទឹក ដោយសារយកវាទៅដឹកអីវ៉ាន់។ បើយកទៅដឹកអីវ៉ាន់ដូច្នេះ ទិញអាថ្មី ស្តាយ ខ្លាចប៉ះនេះប៉ះនោះ អីចឹងអាមួយទឹកនេះក៏ល្អដែរ ។ អ្វីដែលសំខាន់នោះ បើទិញថ្មីបកពីកេស គឺលក់វិញខាតខ្លាំងណាស់ គឺខាតខ្ទង់៣០%យ៉ាងតិច ។ ឧទាហរណ៍បើរថយន្ដថ្មីនោះតម្លៃ៥ម៉ឺនដុល្លារ ហើយប្រើបានតែ២ឆ្នាំ រួចលក់វិញ គឺបានច្រើនបំផុតតែ៣ម៉ឺនដុល្លារតែប៉ុណ្ណោះ » ។
លោក ចក់ សារិន ម្ចាស់ហាងលក់រថយន្តនៅតាមបណ្តោយផ្លូវម៉ៅសេទុង បានឲ្យដឹងថា ការប្រើរថយន្តមួយទឹក មិនមែនជារឿងអាក្រក់នោះទេ ព្រោះរថយន្តទាំងនោះនៅតែមានគុណភាពល្អ និងមានសុវត្ថិភាពសម្រាប់ការប្រើប្រាស់ ។
លោកបានបញ្ជាក់ថា ៖« សម្រាប់រថយន្តជជុះ មិនមែនមានន័យថា ជារបស់ជជុះដែលប្រើការមិនបាននោះទេ ហើយក៏មិនមែនមានន័យថារថយន្តជជុះគ្មានសុវត្ថិភាពដែរ » ។
ម្ចាស់ហាងដែលលក់ភាគច្រើនជារថយន្ដម៉ាកតូយ៉ូតា Prius ហាយប្រ៊ីត បានឲ្យដឹងទៀតថា លោកលក់ដាច់ គឺម៉ាកតូយ៉ូតា Prius ហាយ ប្រ៊ីត គឺមានអតិថិជនគ្រាំទ្រ ហើយភាគច្រើនគឺជាអ្នកមានលទ្ធភាពជាវរថយន្តដែលមានតម្លៃជាង១ម៉ឺនទៅ២ម៉ឺនដុល្លារ ដែលវាមិនសូវស៊ីសាំង គឺចំណាយរង្វង់៤០ដុល្លារទៅ៥០ដុល្លារក្នុង១ខែ សម្រាប់ការបើកបរក្នុងក្រុងភ្នំពេញ ។
លោក ងន សាំង អគ្គនាយកក្រុមហ៊ុន RMA Cambodia ដែលជាបុត្រសម្ព័ន្ធនៃក្រុមហ៊ុន RMA Group និងជាអនុប្រធានសហព័ន្ធឧស្សាហកម្មយានយន្តកម្ពុជា មានទស្សនៈផ្ទុយពីនេះ ដោយលោកបានណែនាំថា ការប្រើប្រាស់រថយន្តថ្មី គឺមានសុវត្ថិភាព និងមិនចំណាយខ្ពស់លើថ្លៃប្រេង ល្អជាងរថយន្តជជុះ ដូច្នេះបើសិនជាមានលទ្ធភាពគួរជ្រើសរើសរថយន្តថ្មី ។
លោកមានប្រសាសន៍ថា ៖« រថយន្តចាស់ ធៀបនឹងរថយន្តថ្មី គឺវាខុសគ្នា អីចឹង បើសិនជាកំណើនជីវភាពប្រជាជនល្អហ្នឹង មានន័យថា គាត់ត្រូវការរថយន្តថ្មី ហើយយើងឃើញថាទំនោរទិញរថយន្តថ្មីពីមួយឆ្នាំទៅមួយឆ្នាំមានការកើនឡើង ។ មួយទៀត រថយន្តថ្មីមានការគាំទ្រច្រើនពីខាងស្ថាប័នហិរញ្ញវត្ថុដែលគាត់អាចទិញហើយបង់រំលស់បាន អីចឹងបានន័យថា គាត់មានភាពងាយស្រួលក្នុងការទិញច្រើនជាង ដោយសារតែគាត់អត់ចាំបាច់ត្រូវការយកលុយទាំងអស់ទៅទិញទេ ។ ដូច្នេះ គួរតែគាត់យករថយន្តថ្មីប្រើច្រើនជាងហើយ »។
បើទោះបីជាការប្រើប្រាស់រថយន្តថ្មីមានការកើនឡើងក្នុងកម្រិតតិចតួចសម្រាប់ឆ្នាំ២០១៦ ក្ដី ក៏ការជាវរថយន្តថ្មីយកទៅប្រើប្រាស់មានការកើនឡើងប្រមាណ៣% បើធៀបនឹងឆ្នាំ២០១៥។ សម្រាប់ទីផ្សាររថយន្តថ្មីនាំមុខគេគឺមាន Ford, Toyota, Mazda, និង Mitsubishi ជាដើម ។
លោក ងន សាំង បានបន្ថែមថា ៖« ខ្ញុំមានសារមួយដែលយើងចង់បង្ហាញទៅប្រជាជនទាំងអស់ឲ្យគាត់យល់ដឹង ។ មែនទែនទៅ បើយើងនិយាយពីរថយន្ត គាត់គួរប្រើរថយន្តថ្មីដែរ បើមានលទ្ធភាព ។ ហេតុផល គឺថា ទី១- បើសិនយើងនិយាយពីតម្លៃ គឺមិនខុសគ្នាប៉ុន្មានដែរទេ ព្រោះរថយន្តជជុះមួយចំនួនក៏ថ្លៃដែរ អីចឹងតម្លៃអត់សូវជាខុសគ្នាទេ ។ ទី២- បើគាត់មានលុយទិញរថយន្តជជុះ គឺគាត់អាចទិញរថយន្តថ្មីបានហើយ ដោយសារដូចខ្ញុំនិយាយខាងដើម គឺគាត់អាចបង់រំលស់បាន មានន័យថា គាត់គ្រាន់តែបង់មួយចំនួន និងមួយចំនួនទៀតបង់រំលស់។ គាត់មានការងារធ្វើ គេកាត់ពីប្រាក់ខែមួយចំនួនទៅ អីចឹងគាត់មានរថយន្តថ្មីជិះហើយ » ។
លោកអនុប្រធានសហព័ន្ធឧស្សាហកម្មយានយន្តកម្ពុជា បានពន្យល់បន្ថែមទៀតថា ៖« រថយន្តជជុះហ្នឹង សុទ្ធតែអាយុខ្លះចាប់ពី៤ឬ៥ឆ្នាំ ខ្លះដល់ទៅជាង១០ឆ្នាំក៏មានដែរ ។ បើយើងនិយាយពីបញ្ហា កាលណាវាចាស់ហើយ វាស៊ីប្រេងច្រើនហើយ ។ អីចឹង រវាងទិញថ្មី និងចាស់ គឺអត់បានសន្សំសំចៃទេ បើទិញអាចាស់(មួយទឹក) ថ្វីបើថោកមែន តែយើងចាក់ប្រេងច្រើន វាខូចច្រើន ចូលជាងច្រើន ចំណាយលុយជួសជុលច្រើនដដែល ។ អីចឹង ចំណាយសម្រាប់ Operation (ការថែទាំ)ហ្នឹង គឺវាខ្ពស់ជាងរថយន្តថ្មី »។
លោក ងន សាំង បានបន្តទៀតថា ពាក់ព័ន្ធនឹងសុវត្ថិភាពវិញ រថយន្តជជុះមួយចំនួន គឺវាខុសលក្ខណៈបច្ចេកទេស ដែលនៅស្រុកគេ គេមិនអនុញ្ញាតឲ្យរត់លើផ្លូវទេ អីចឹងគាត់ត្រូវការលក់ចេញទៅប្រទេសខាងក្រៅ។ លោកថា៖« អីចឹង យកមក វាអាចមានគ្រោះថ្នាក់ដល់អាយុជីវិតយើង និងក្រុមគ្រួសាររបស់យើង ហើយរថយន្តមួយចំនួនទៀត មិនត្រឹមតែមានបញ្ហាប៉ុណ្ណឹងទេ ខ្លះគេយកមកកាត់តទៀត ។ បើនិយាយលក្ខណៈបច្ចេកទេស គឺមិនអាចរត់នៅលើផ្លូវបានទេ គឺគ្រោះថ្នាក់ខ្លាំងណាស់ ហើយសុទ្ធតែគ្រោះថ្នាក់ដល់អាយុជីវិតទៀត ។ អីចឹង យើងគួរតែពិចារណារឿងហ្នឹងដែរ បើសិនជាពេលដែលយើងមានសមត្ថភាពគ្រប់គ្រាន់ហើយ គឺគួរទិញអាថ្មី ព្រោះថា រថយន្តមែនទែនទៅ គឺយើងផ្ញើអាយុជីវិតលើវា យើងនៅក្នុងរថយន្ដ អាយុជីវិតយើងក៏នៅក្នុងហ្នឹងដែរ អីចឹងគួរតែប្រើរបស់ដែលគិតថា វាមានសមត្ថភាពគ្រប់ គ្រាន់សម្រាប់យើង» ។
លោក លី សីឡា ទទួលស្គាល់ថា ការប្រើប្រាស់រថយន្តមួយទឹក ពិតជាចូលជាងញឹកញាប់ តែលោកថា នេះគឺដោយសារតែបញ្ហាមិនចេះមើលរថយន្តប៉ុណ្ណោះ ។
លោកបញ្ជាក់ថា ៖« ខ្ញុំមានលទ្ធភាពទិញត្រឹមរថយន្តមួយទឹកតម្លៃជាង១ម៉ឺនដុល្លារ ដោយសារតម្លៃរថយន្តថ្មី គឺថ្លៃជាង ហើយតម្លៃខុសគ្នាពីរឬបីដងឯណោះ ។ ខ្ញុំទទួលស្គាល់ថារថយន្តមួយទឹកឧស្សាហ៍ខូចមែន ដោយសារតែពេលយើងទិញ មិនចេះមើល ។ ដូច្នេះវាទាមទារឲ្យអ្នកលក់ត្រូវមានភាពស្មោះត្រង់ចំពោះអតិថិជនដែរ ព្រោះគ្នាមានលុយតិច ដល់ពេលប៉ះចំរថយន្ដអន់ ចូលជាងក៏ញឹក គឺចូលសឹងរហូត ហើយខ្ញុំអស់ថ្លៃជួសជុលចុងក្រោយ គឺជាង២០០ដុល្លារឯណោះ » ។
លោកសីឡាបាននិយាយថា រថយន្តដែលលោកប្រើមុនក៏មួយទឹកដែរ គឺស៊េរីឆ្នាំផលិត១៩៩៧ តែមិនសូវមានបញ្ហាដូចរថយន្តក្រោយដែលកំពុងតែប្រើនេះទេ ព្រោះវាឧស្សាហ៍លោតសញ្ញា Check ជាញឹកញាប់ដែលតម្រូវឲ្យលោកត្រូវយកវាទៅជួសជុលញឹកញាប់ដែរ ។
លោកបន្ថែមទៀតថា ៖« រថយន្តថ្មីវាល្អហើយ តែបើប្រើយូរទៅដល់កម្រិតមួយ វានឹងសឹករេចរឹលដូចតែគ្នាហ្នឹង » ។
លោកបន្តថា បើទោះបីជាលោកមានចំណូល សមរម្យ និងលទ្ធភាពបង់រំលស់ក្នុងមួយខែ៤ឬ៥០០ដុល្លារក្តី លោកសុខចិត្តទៅបង់រំលស់ផ្ទះវិញ មិនមកបង់រំលស់ជាមួយរថយន្តថ្មីនោះទេ ព្រោះលោកយល់ឃើញថា រថយន្ដថ្មីគឺមានតែអ្នកជីវភាពធូរធារខ្លាំង ដូច្នេះសម្រាប់អ្នកមានជីវភាពធម្យម គឺសមរម្យជាមួយរថយន្តមួយទឹកតម្លៃជាង១ម៉ឺនដុល្លារនេះឯង ។
អ្នកនាង ផា ណេត យល់ឃើញថា រថយន្ដថ្មី ឬមួយទឹក មិនមែនជាបញ្ហានៃការកើតគ្រោះថ្នាក់ចរាចរណ៍លើដងផ្លូវនោះទេ គឺវាអាស្រ័យលើអ្នកកាន់ចង្កូត ថាតើចេះបើកបរគោពច្បាប់ចរាចរណ៍ និងចេះគ្រប់គ្រងល្បឿនឬអត់ ?
អ្នកនាងបញ្ជាក់៖«រថយន្ដថ្មីក៏ដោយ បើប្រើដល់កម្រិតគង់តែយ៉ាប់ដូចគ្នា ព្រោះវាមានរឿងជាក់ស្តែងនៃការប្រើប្រាស់រថយន្តទំនើបតម្លៃ ២០ឬ៣០ម៉ឺនដុល្លារ តែបើក បរលឿនពេក ហើយមានហេតុការណ៍អីកើតឡើង មិនអាចគ្រប់គ្រងស្ថានការណ៍ នោះក៏វាជាបញ្ហាដែរ» ៕
ចែករំលែកព័តមាននេះ