ធ្លាក់ភ្លៀងច្រើនថ្ងៃបង្កជាទឹកជំនន់ លិច និងបំផ្លាញប្រព័ន្ធធារាសាស្ត្រ
ខេត្តឧត្តរមានជ័យ ៖ ស្រុកចំនួន២ គឺស្រុកអន្លង់វែង និងស្រុកត្រពាំងប្រាសាទ ក្នុងខេត្តឧត្តរមានជ័យ បានទទួលរងការវាយប្រហារដោយសារជំនន់ទឹកភ្លៀង
ខេត្តឧត្តរមានជ័យ ៖ ស្រុកចំនួន២ គឺស្រុកអន្លង់វែង និងស្រុកត្រពាំងប្រាសាទ ក្នុងខេត្តឧត្តរមានជ័យ បានទទួលរងការវាយប្រហារដោយសារជំនន់ទឹកភ្លៀង ដែលបានបំផ្លិចបំផ្លាញប្រព័ន្ធធារាសាស្ត្រ ស្រែចម្ការផលដំណាំ លំនៅដ្ឋានប្រជាពលរដ្ឋ និងហេដ្ឋានរចនាសម្ព័ន្ធ ត្រូវទឹកហូរកាត់ បង្កការរាំងស្ទះដល់ការធ្វើដំណើរ ក្រោយពីអាកាសធាតុភ្លៀងធ្លាក់ជាបន្តបន្ទាប់ក្នុងអំឡុងប៉ុន្មានថ្ងៃមកនេះ។ ស្ថានភាពមេឃ នៅតែបន្តធ្លាក់ភ្លៀង ដែលក្តីបារម្ភអាចនឹងមានផលប៉ះពាល់កើតឡើងជាបន្តទៀត ខណៈដែលស្រុកអន្លង់វែង កំពុងទទួលរងសំពាធធ្ងន់ដោយសារទឹកជំនន់ភ្លៀង។
តាមការឱ្យដឹងពីលោក ចាប ប៊ុនធឿន ជាជំទប់ទី១ ឃុំត្រពាំងប្រីយ៍ បានរៀបរាប់ថា ទឹកជំនន់ភ្លៀងបានវាយប្រហារនៅក្នុងឃុំត្រពាំងប្រីយ៍ ក្នុងអំឡុងម៉ោង៣ទាបភ្លឺថ្ងៃទី២៦ ខែកក្កដា ឆ្នាំ២០១៧ ហើយទឹកបានហូរផ្តាច់ទាំងស្រុងនូវទំបន់រក្សាទឹករបស់សហគមន៍ ដែលជាកេរ្តិ៍ដំណែលរបស់តាម៉ុក និងបណ្តាលឱ្យទឹកក្នុងបឹងទំនប់លើ ត្រូវហូរចេញអស់ស្ថិតនៅភូមិទំនប់លើ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។ ក្នុងនោះដែរ ផ្លូវគ្រួសក្រហមមួយខ្សែ ដែលតភ្ជាប់ពីភូមិទួលសាលា ឃុំត្រពាំងប្រីយ៍ ស្រុកអន្លង់វែង ទៅកាន់ភូមិ១០៥ ឃុំផ្អាវ ស្រុកត្រពាំងប្រាសាទ ដែលទឹកជំនន់បានហូរកាត់ដាច់ផ្លូវក្បាលស្ពានទាំងសងខាង ធ្វើឱ្យរាំងស្ទះដល់ការធ្វើដំណើររបស់ប្រជាពលរដ្ឋ។
លោក ហោជិន វីរៈយុទ្ធ អភិបាលស្រុកអន្លង់វែង បានមានប្រសាសន៍ថា ស្ថានភាពទឹកបឹងតាម៉ុក បានហក់ឡើងយ៉ាងលឿន ដោយសារតែទឹកទំនប់អាងស្តុកទឹក(០៥) ក្នុងស្រុកត្រពាំងប្រាសាទ ត្រូវបានបើកបង្ហូរជាបណ្តោះអាសន្ន មិនអាចគ្រប់គ្រងស្ថានភាពទឹកបាន។ ដូច្នេះហើយ បានធ្វើឱ្យស្ថានភាពទឹក ក្នុងបឹងតាម៉ុក បានជន់ឡើងជាជំហុក ធ្វើឱ្យទឹកហូរលើស្ពានអូរជីក ដែលអាជ្ញាធរ រួមនឹងសមត្ថកិច្ចក្នុងស្រុកអន្លង់វែង បានសម្រេចចិត្ត បិទចរាចរណ៍ជាបណ្តោះអាសន្ន។ ហើយក្នុងនោះ ផ្លូវឡើងភ្នំទៅកាន់់ច្រកអន្តរជាតិជាំ ដែលទឹកហូរច្រោះ បណ្តាលឱ្យដុំថ្មធំភ្នំធ្លាក់បាំងផ្លូវ ដែលអាចបង្កគ្រោះថ្នាក់ដល់អ្នកធ្វើដំណើរ ដោយអាជ្ញាធរស្រុកបានចាត់តាំងកម្លាំងប្រចាំការ ចុះធ្វើចរាចរណ៍ ដល់អ្នកធ្វើដំណើរខ្លាចមានគ្រោះថ្នាក់កើតឡើង។
លោក ញឺន កួន ប្រធានមន្ទីរធនធានទឹក និងឧតុនិយមខេត្តឧត្តរមានជ័យ បានមានប្រសាសន៍ប្រាប់ថា កម្រិតកំពស់ទឹកជំនន់បានកើនឡើងដល់ ១៥០មីល្លីម៉ែត្រ ហើយបឹងតាម៉ុកចំពោះបឹងតាម៉ុកជាអាងស្តុកទឹកមួយដ៏សំខាន់ ពីសម្ពាធទឹកធ្លាក់មកពីស្រុកត្រពាំងប្រាសាទ និងទឹកធ្លាក់មកពីតំបន់ជួរភ្នំដងរែក បានធ្វើឱ្យទឹកបឹងឡើងដល់ ៤ម៉ែត្រ ដែលហួសពីកម្រិតប្រកាសអាសន្នត្រឹមតែ ២.៩០ម៉ែត្រ។ នៅស្រុកត្រពាំងប្រាសាទ ឃុំអូរស្វាយ ក្នុងភូមិទំនប់អភិវឌ្ឍ បានទទួលរងការវាយប្រហារជាខ្លាំងក្នុងទូទាំងភូមិ នៃជំនន់ទឹកភ្លៀងនេះ ហើយពេលនេះលោកបានត្រៀមកម្លាំង និងគ្រឿងចក្រប្រចាំការ ដើម្បីធ្វើការជីកកាយ ធ្វើយ៉ាងណាក្នុងការបញ្ចៀសទឹកជំនន់ភ្លៀងនេះ៕
ចែករំលែកព័តមាននេះ