ខេត្តបាត់ដំបង ៖ បុរសញៀនថ្នាំម្នាក់បានថតវីដេអូក្លិបបង្ហាញពីសកម្មភាពរបស់ខ្លួនប្រើប្រាសថ្នាំញៀន ហើយបង្ហោះក្នុងអាខោនហ្វេសប៊ុករបស់ខ្លួនឈ្មោះ Pa Sethyka បង្អូតគេឯងបាន១ថ្ងៃ ក៏ត្រូវកម្លាំងស្នងការខេត្តធ្វើការ ឃាត់ខ្លួនបាននៅម៉ោងជាង១១ថ្ងៃត្រង់ ថ្ងៃទី២៣ ខែកក្កដា ឆ្នាំ២០១៧ នៅនឹងផ្ទះរបស់ជននេះ ស្ថិតនៅភូមិចំការសំរោង១ សង្កាត់ចំការសំរោង ក្រុងបាត់ដំបង។
លោកប្រធានក្រុមបង្ក្រាបនៃស្នងការដ្ឋានខេត្តបាននិយាយថា ជនសង្ស័យឈ្មោះ សុខ ពិតប្រាកដ ហៅតឿ អាយុ២៥ឆ្នាំ រស់នៅភូមិ-ឃុំខាងលើ។ ជននេះបានបង្ហោះវីដេអូតាមបណ្ដាញសង្គមរបស់ខ្លួនដែលបង្ហាញពីសកម្មភាព ប្រើប្រាសថ្នាំញៀន។ ក្រោយពីឃើញឃ្លីបវីដេអូដ៏ព្រហើនរបស់ជននេះបាន១ថ្ងៃ ទើបលោកស្នងការខេត្តបញ្ជាឲ្យកម្លាំងធ្វើការស្រាវជ្រាវលើអាខោននោះ រហូតតំណត់អត្តសញ្ញាណ និងទីតាំងបាន ក៏ឈានដល់ការឃាត់ខ្លួនជនបែកស្លុយនេះតែម្ដង។ ជាមួយនឹងការឃាត់ខ្លួនជនបែកថ្នាំនេះ កម្លាំងជំនាញឆែកឆេររកឃើញថ្នាំញៀនមេតំហ្វេតាមីន ICE (ម៉ាទឹកកក) ចំនួន៧ថង់ មានទម្ងន់២២,២៦ក្រាម ជញ្ជីងសម្រាប់ថ្លឹងថ្នាំញៀន១ សម្ភារសម្រាប់ជក់ថ្នាំ និងវត្ថុតាងមួយចំនួនទៀត។
សូមបញ្ជាក់ថា ជនខាងលើនេះប្រើប្រាសកាមេរ៉ាទូស័ព្ទដៃថតសកម្មភាពរបស់ខ្លួនដែលកំពុងប្រើប្រាស់ រួចបង្ហោះតាមបណ្ដាញសង្គមរបស់ខ្លួន ដោយមានការនិយាយពាក្យមិនសមរម្យ ហើយត្រូវគេប្រទះឃើញកាលពីថ្ងៃទី២២កក្កដា តែបង្កឲ្យមានការភ្ញាក់ផ្អើលខ្លាំងនៅព្រឹកថ្ងៃទី២៣ ។
ក្រោយពីឃាត់ខ្លួន ដកហូតបានថ្នាំញៀន និងវត្ថុតាងមួយចំនួន លោកស្នងការខេត្តបានបញ្ជាឲ្យបញ្ជូនខ្លួនបុរសបែកស្លុយនេះទៅឲ្យការិយាល័យប្រឆាំងគ្រឿងញៀនហើយ ដើម្បីសួរនាំ និងកសាងសំណុំរឿងបញ្ជូនទៅតុលាការ៕
ចែករំលែកព័តមាននេះ