ខេត្តបាត់ដំបង ៖ ពិធីប្រកាសលោកឧត្តមសេនីយ៍ត្រី សុខ គឹមសឿន នាយរងសេនាធិការយោធភូមិភាគទី៥ ទៅទទួលមុខងារជាអនុប្រធានតំបន់១ ស្ថិតនៅខេត្តបន្ទាយមានជ័យ កាលពីវេលាម៉ោង៣រសៀល ថ្ងៃទី២១ ខែកក្កដា ឆ្នាំ២០១៧ ក្រោមអធិបតីភាពលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ លោកសួន បវរ គណអភិបាលខេត្តបន្ទាយមានជ័យ ព្រមទាំងមេបញ្ជាការរង ផ្នែកសឹករង និងកងពល វរៈការពារព្រំដែនប្រមាណ៥០នាក់បានមកចូលរួម។
លោកឧត្តមសេនីយ៍ត្រី អ៊ិន សុខាវុឌ្ឍី ប្រធានតំបន់១ បានរាយការណ៍ពីសកម្មភាពក្នុងតំបន់១ ដែលមានកម្លាំងនៅទីនេះ តែងតែសហការជាប្រចាំជាមួយអាជ្ញាធរដែនដីចុះជួយដល់ប្រជាពលរដ្ឋ រក្សាសន្តិសុខ បន្ទាប់ពីកិច្ចការការពារព្រំដែនរួចមក។ លោកឧត្តមសេនីយ៍ត្រី ប៊ិន សារ៉ន នាយការិយាល័យទី១ បានអានសេចក្តីប្រកាសដែលថ្នាក់លើប្រគល់រួចមក លោកសួន បវរ អភិបាលខេត្តបន្ទាយមានជ័យបានបញ្ជាក់ថា អាជ្ញាធរក្នុងខេត្តគ្រប់លំដាប់ថ្នាក់ដែលពាក់ព័ន្ធទើបតែរួមគ្នាដោះស្រាយការលំបាករបស់ពលករដែលមិនត្រឹមត្រូវតាមច្បាប់របស់ប្រទេសថៃដែលបានចេញច្បាប់ថ្មីចំពោះពលករធ្វើការងារក្នុងប្រទេស មានប្រទេសឡាវ ភូមា និងកម្ពុជា។ ដោយបានបង្កើតមណ្ឌលសំចតសម្រាប់ធ្វើលិខិតឆ្លងដែនផ្តល់ភាពងាយស្រួលដល់ពលករមួយកន្លែងទៀតនៅប៉ោយប៉ែតក្នុងខេត្តបន្ទាយមានជ័យនេះ ហើយត្រូវត្រួតពិនិត្យបិទច្រកល្បៀងតូចៗដែលមានចំនួន៥០កន្លែងនៅក្នុងខេត្តមិនឲ្យមានពលករចេញទៅតាមការអូសទាញពីជនខិលខូចដោយខុសច្បាប់ដូចពីមុនទៀតឡើយ គឺមានកន្លែងខ្លះអនុគ្រោះបានចំពោះពលករដែលចូលទៅធ្វើការព្រឹក ហើយវិលល្ងាចនៅជិតៗតែប៉ុណ្ណោះ។
បន្ទាប់មកលោកឧត្តមសេនីយ៍ឯកប៊ុន សេង បានថ្លែងអំណរគុណដល់លោកអភិបាលខេត្តដែលបានជួយសម្រួលយ៉ាងច្រើនក្នុងកិច្ចការយោធាកន្លងមក ព្រោះលោកធ្លាប់ឆ្លងកាត់ការងារកងទ័ពតាំងពីសម័យមានសង្គ្រាមមកនោះ គឺអាចដឹងពីការលំបាករបស់កងទ័ព ទើបពេលនេះបានជួយសាងសង់ទីបញ្ជាការ១ខ្នងទៀតសម្រាប់ធ្វើការនៅក្នុងតំបន់១នេះ។
ចែករំលែកព័តមាននេះ