ខេត្តសៀមរាប ៖ ជនបង្កប្រុស-ស្រី២នាក់ ដែលបម្រើការនៅលើយន្តហោះ ខណៈនាំគ្នាបង្ហោះក្នុងសង្គមហ្វេសប៊ុកតៗគ្នាថា មានយន្តហោះធ្លាក់នៅក្នុងទឹកដីខេត្តសៀមរាបនោះ ត្រូវលោកប្រធានក្រុមហ៊ុនចាប់ប្រគល់ឱ្យសមត្ថកិច្ចយកមកធ្វើការសួរនាំនៅវេលាម៉ោង៥និង៣០នាទីល្ងាច ថ្ងៃទី២២ ខែកក្កដា ឆ្នាំ២០១៧នោះ ត្រូវបានឱ្យធ្វើកិច្ចសន្យា រួចដោះលែងឱ្យត្រឡប់ទៅផ្ទះវិញហើយ។
លោកវរសេនីយ៍ទោ ភឹង សម្បិត្ត ប្រធានការិយាល័យសន្តិសុខផ្ទៃក្នុង បានប្រាប់តាមទូរស័ព្ទនៅម៉ោង១១និង០២នាទីព្រឹកថ្ងៃទី២៣ កក្កដានេះថា ដោយមានការសហការគ្នាពីខាងប្រធានក្រុមហ៊ុនបាននាំខ្លួនប្រុសស្រី២នាក់នេះឱ្យសមត្ថកិច្ចយកមកសួរនាំនៅវេលាម៉ោង៥និង៣០នាទីល្ងាច ថ្ងៃទី២២នោះ បន្ទាប់ពីមានព័ត៌មានមួយបង្ហោះលើបណ្តាញសង្គមហ្វេសប៊ុកថា មានយន្តហោះមួយគ្រឿងបានធ្លាក់នៅលើទឹកដីខេត្តសៀមរាបកាលពីរសៀលថ្ងៃទី២២ កក្កដានេះ បានធ្វើឱ្យមានមនុស្សជាច្រើនចាប់អារម្មណ៍ និងនាំគ្នា share បន្តពេញពិភពសង្គមហ្វេសប៊ុក។ ក្រោយពីកំពុងសួរនាំពីករណីជនបង្កនាំគ្នាបង្ហោះពីរឿងធ្លាក់យន្តហោះនោះរួចមក ជនបង្កឈ្មោះ ផាវ សុជុំ ភេទប្រុស អាយុ២៤ឆ្នាំ មានស្រុកកំណើតនៅភូមិកំពង់តាយ៉ង ឃុំពួក ស្រុកពួក បានឱ្យបកស្រាយនៅចំពោះមុខថា «មុនដំបូង ខ្ញុំបាទបានឃើញនៅក្នុងហ្វេសប៊ុករបស់មិត្តរួមការងារឈ្មោះ ពន្លឺ លាភា ភេទស្រី អាយុ៣១ឆ្នាំ មានទីលំនៅភូមិបន្ទាយចាស់ សង្កាត់ស្លាក្រាមរួច ខ្ញុំក៏បាន share បន្ត ប៉ុន្តែរូបខ្ញុំភ្លេចគិតពីអ្នកចូលចិត្តលេងហ្វេសប៊ុក ទាំងអស់ ដូច្នេះខ្ញុំបាទសុំអភ័យទោសដល់លោកអគ្គស្នងការនគរបាលជាតិ និងលោកស្នងការខេត្តសៀមរាប ព្រមទាំងសុំទោសជាសាធារណៈដល់ប្រជាពលរដ្ឋដែលចូលចិត្តនិយមលេងសង្គមហ្វេសប៊ុកទាំងអស់ មេត្តាអនុគ្រោះដល់ខ្ញុំបាទផង។ ក្រោយមានការបង្ហោះរូបភាពនេះរួចបានមួយរយៈពេលខ្លី រូបខ្ញុំក៏បានលុបរូបភាពនោះចោលវិញភ្លាមៗផងដែរ និងបានប្តូរនូវរូបភាព Profile របស់ខ្លួនខ្ញុំវិញ»។
សូមបញ្ជាក់ផងដែរថា បន្ទាប់ពីព័ត៌មានដ៏ក្តៅគគុកមួយនេះ ល្បីសុះសាយពេញហ្វេសប៊ុកបានធ្វើឲ្យមនុស្សគ្រប់ស្រទាប់វណ្ណៈនាំគ្នាតាមដានយ៉ាងជក់ចិត្ត។ ក្នុងនោះក៏មាន comments មួយចំនួនបាននិយាយថា «ជារឿងមិនពិត ព្រោះយន្តហោះនោះធ្លាក់នៅប្រទេសគេទេ»៕
ចែករំលែកព័តមាននេះ