ខេត្តបន្ទាយមានជ័យ ៖ កាលពីរសៀលថ្ងៃទី២១ ខែកក្កដា ឆ្នាំ២០១៧ កន្លងទៅ ស្នងការនគរបាលខេត្តបន្ទាយមានជ័យ លោកឧត្តមសេនីយ៍ទោ អាត់ ខែម និងស្នងការរងលោក សិទ្ធ ឡោះ បានដឹកនាំកម្លាំងធ្វើការស្រាវជ្រាវ និងឃាត់ខ្លួនជនសង្ស័យម្នាក់ នៅស្រុកសំពៅលូន ខេត្តបាត់ដំបង ដែលជាប់ពាក់ព័ន្ធនឹងការនាំចេញអាវុធចូលប្រទេសថៃ នឹងត្រូវបានតម្រួតថៃស្ទាក់ចាប់បាន កាលពីយប់រំលងអធ្រាត្រ ថ្ងៃទី១៨ ខែកក្កដា ឆ្នាំ២០១៧ កន្លងទៅ នៅខេត្តស្រះកែវ ។
សូមរំលឹកផងដែរថា ៖ កាលពីវេលាម៉ោង១២និង៣០នាទីយប់រំលងអធ្រាត្រ ថ្ងៃទី១៨ ខែកក្កដា ឆ្នាំ២០១៧ កន្លងទៅ ដោយទទួលបានសេចក្ដីរាយការណ៍ ពីកម្លាំងសម្ងាត់ថា មានការ នាំចូលអាវុធ សមត្ថកិច្ចថៃក៏បានចុះ និងស្ទាក់ចាប់បានរថយន្ត២គ្រឿង ក្រោយត្រួតពិនិត្យ និងឆែកឆេរ ក៏ប្រទះឃើញកាំភ្លើងត្បាល់ធុនធ្ងន់ និងគ្រាប់រ៉ូកែតមួយចំនួន ។ ត្រូវបានជនសង្ស័យឆ្លើយសារភាពថា ៖ បានយកពីខាងទឹកដីកម្ពុជា ដោយភាគីខ្មែរជាអ្នកផ្តល់ឲ្យ ខណៈដែលជនសង្ស័យចំនួន៥នាក់ បានធ្វើការដឹកជញ្ជូនអាវុធ និងគ្រាប់រំសេវទាំងនេះ ចេញពីខ្សែបន្ទាត់ព្រំដែនកម្ពុជា-ថៃ ចូលទៅក្នុងប្រទេសថៃ ដោយបានឆ្លងកាត់ខេត្តស្រះកែវ ក៏ត្រូវកម្លាំងស្ទាក់ចាប់តែម្តង ។
កិច្ចប្រតិបត្តិការនេះ បានធ្វើឡើងនៅត្រង់ចំណុចស្ថានីយ៍ប្រេងឥន្ធនៈមួយកន្លែង នៅលើកំណាត់ផ្លូវលេខ៣៥៩ ក្នុងភូមិ៧ ឃុំស្រះខ្វាន់ ស្រុកមឿងស្រះកែវ ខេត្តស្រះកែវ ប្រទេសថៃ ខណៈដែលរថយន្តរបស់មុខសញ្ញាចំនួន៣គ្រឿង បានបង្ហាញខ្លួន នៅកន្លែងស្ថានីយ៍ប្រេងឥន្ធនៈខាងលើនេះ ។ ក្រោយពេលធ្វើការឡោមព័ទ្ធពីតម្រួតថៃ គឺជនសង្ស័យចំនួន៥នាក់ ត្រូវបានចាប់ខ្លួន ។ នៅក្នុងពេលចាប់ខ្លួននោះ សមត្ថកិច្ចបានឆែកឆេរ និងធ្វើការត្រួតពិនិត្យទៅលើរថយន្តទាំង៣គ្រឿង គឺបានរកឃើញវត្ថុតាងមួយចំនួន ដែលសុទ្ធសឹងតែជាអាវុធធុនធ្ងន់ទាំងអស់ ដែលក្នុងនោះរួមមាន ៖ កាំភ្លើងប្លោងធុន៨២មីល្លីម៉ែត្រ ចំនួន២ដើម, កាំភ្លើងប្លោងធុន៨១មីល្លីម៉ែត្រ ចំនួន១ដើម, គ្រាប់ប្លោងធុន៨២មីល្លីម៉ែត្រ ចំនួន៣គ្រាប់, គ្រាប់រ៉ូកែតដុតឆ្នួន ចំនួន៣ឈុត, រថយន្តចំនួន៣គ្រឿង និងទូរស័ព្ទដៃ ចំនួន៦គ្រឿង ។
ជុំវិញការជួញដូរអាវុធខុសច្បាប់ របស់ជនសង្ស័យទាំង៥នាក់ ដែលផ្ទុយពីមាត្រាដែលបានចែងថា ៖ ហាមនាំយកអាវុធ គ្រាប់រំសេវ ទៅធ្វើចរាចរណ៍លើផ្លូវសាធារណៈ ដោយគ្មានការអនុញ្ញាតនោះ ត្រូវបានកម្លាំងតម្រួតចាត់បញ្ជូន រួមជាមួយនឹងវត្ថុតាង ទៅកាន់ស្នងការខេត្តស្រះកែវ ក្នុងការសាកសួរបន្ថែមជុំវិញការនាំអាវុធដោយខុសច្បាប់នេះ ដើម្បីចាត់វិធានការតាមផ្លូវច្បាប់ និងបន្តបើកការស្រាវជ្រាវថា តើអាវុធទាំងនេះយកមកពីប្រភពណា ហើយពួកគេនាំយកទៅណា ឲ្យបានច្បាស់ ៕
ចែករំលែកព័តមាននេះ