រាជធានីភ្នំពេញ ៖ កងរាជអាវុធហត្ថរាជធានីភ្នំពេញ កាលពីរសៀលថ្ងៃទី២១ ខែកក្កដា បានបញ្ជូនឧកញ៉ា សុខ ហេង និងគូកនម្នាក់ឈ្មោះ នុត រស្មី ភេទប្រុស អាយុ៣៣ឆ្នាំ ទៅកាន់សាលាដំបូងរាជធានីភ្នំពេញ ដើម្បីប្រគល់ជូនតំណាងអយ្យការធ្វើការសាកសួរលើសំណុំរឿងក្លែងឯកសាររំលោភយកដីប្រជាពលរដ្ឋ ។
សូមរំលឹកថា កាលពីថ្ងៃទី១៩ ខែកក្កដាកន្លងទៅ កម្លាំងកងរាជអាវុធហត្ថរាជធានីភ្នំពេញ បានឃាត់ខ្លួនឧកញ៉ា សុខ ហេង និងបក្សពួក៦ទៅ៧នាក់ ខណៈកំពុងធ្វើសកម្មភាពបោះបង្គោលរំលោភបំពានយកដីអ្នកដទៃ។ ការឃាត់ខ្លួនឧកញ៉ា សុខ ហេង និងបក្សពួកនេះ ធ្វើឡើងនៅលើដីប្រជាពលរដ្ឋមួយកន្លែង ស្ថិតក្នុងសង្កាត់ពន្សាំង ខណ្ឌព្រែកព្នៅ បន្ទាប់ពីម្ចាស់ដីប្ដឹងទៅសមត្ថកិច្ចកងរាជអាវុធហត្ថដើម្បីឲ្យជួយអន្តរាគមន៍ ។
លោកឧត្តមសេនីយ៍ឯក រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ បានប្រាប់អ្នកសារព័ត៌មានថា កម្លាំងកងរាជអាវុធហត្ថ ពិតជាបានឃាត់ខ្លួនឧកញ៉ា សុខ ហេង និងបក្សពួកប្រាកដមែន បន្ទាប់ពីទទួលបានពាក្យបណ្ដឹងពីជនរងគ្រោះជាម្ចាស់ដី ។ ពេលនេះឧកញ៉ា សុខ ហេង និងបក្សពួក កំពុងត្រូវបានសាកសួរ នៅបញ្ជាការដ្ឋានកងរាជអាវុធហត្ថរាជធានីភ្នំពេញពាក់ព័ន្ធនឹងបណ្តឹងរបស់ប្រជាពលរដ្ឋ ដែលបានចោទប្រកាន់ឧកញ៉ា សុខ ហេង និងបក្សពួកថា ប្រព្រឹត្តបទល្មើសជាក់ស្តែង ក្លែងឯកសាររំលោភបំពានយកដីប្រជាពលរដ្ឋ ។
ក្រោយពីឃាត់ខ្លួនមនុស្ស៦ទៅ៧នាក់យកទៅសាកសួរបានរកឃើញថា មានតែ២នាក់ទេដែលពាក់ព័ន្ធ ដូច្នោះសមត្ថកិច្ចបានអនុញ្ញាតឲ្យអ្នកមិនពាក់ព័ន្ធវិលទៅផ្ទះវិញ ។ ដោយឡែកឧកញ៉ា សុខ ហេង និងគូកនម្នាក់ឈ្មោះ នុត រស្មី ត្រូវបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ៕
ចែករំលែកព័តមាននេះ