រាជធានីភ្នំពេញ ៖ នាងៗជាកម្មការិនីរោងចក្រកាត់ដេរ៤នាក់ បានរួមគ្នាមកប្ដឹងទៅបុរសជនជាតិចិនម្នាក់ដែលជាអ្នកគ្រប់គ្រងនៅក្នុងរោងចក្របោះពុម្ពយីហោ «ធៀន អ៊ី» ចោទប្រកាន់ថា បានធ្វើសកម្មភាពបៀតបៀនកេរ្តិ៍ខ្មាសពួកនាង ដូចជាចាប់ច្របាច់គូទ ច្របាច់សុដន់ យកជង្គង់អុកគូទ ព្រមទាំងលួងលោមបបួលទៅរួមរ័ក ជាថ្នូរលុយម្ដង១០០ដុល្លារជាដើម ។ ខណៈនាងៗគិតថាទង្វើទាំងនេះ បានមើលងាយមើលថោកជាបន្តបន្ទាប់ច្រើនលើកច្រើនសារ ប៉ុន្តែពួកនាងមិនបានយល់ព្រមទៅជាមួយទេ និងមិនបានហ៊ានប្ដឹងភ្លាមៗឡើយ ព្រោះខ្លាចជននោះដកចោលអត់ការងារធ្វើ ប៉ុន្តែដោយសារតែការបំពានកាន់តែខ្លាំងឡើងៗ ទើបធ្វើឲ្យពួកនាងអត់ទ្រាំលែងបាន ហើយក៏សម្រេចចិត្តដាក់ពាក្យបណ្ដឹងឲ្យនគរបាលប៉ុស្ដិ៍ចោមចៅ ជួយចាប់ខ្លួនជនជាតិចិនម្នាក់នោះ ។
ដោយឡែក ខាងកម្លាំងនគរបាលប៉ុស្ដិ៍ចោមចៅ បន្ទាប់ពីទទួលពាក្យបណ្ដឹងរួច ក៏បានចុះទៅឃាត់ខ្លួនបុរសខាងលើ នៅក្នុងរោងចក្រ ដែលមានទីតាំងស្ថិតក្នុងភូមិព្រៃល្វា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ កាលពីវេលាម៉ោង០៤ និង៤៥នាទីល្ងាចថ្ងៃទី២១ កក្កដា ។ ជនសង្ស័យឈ្មោះ Jin Xuon Ding ហៅឡៅ កឺ អាយុ៥២ឆ្នាំ ជនជាតិចិន ជាអ្នកគ្រប់គ្រងរោងចក្រ បោះពុម្ពខាងលើ ហើយស្នាក់នៅក្នុងរោងចក្រនោះ។ ចំណែកកម្មការិនីរងគ្រោះទី១អាយុ២៣ឆ្នាំ ២-អាយុ១៨ឆ្នាំ ៣-អាយុ២៦ឆ្នាំ និង៤-អាយុ១៨ឆ្នាំ ។
បើតាមកម្មការិនីរងគ្រោះទាំង៤នាក់ប្រាប់នគរបាលដូចៗគ្នាថា ពួកនាងបានរងគ្រោះដោយការប្រមាថពីសំណាក់បុរសជនជាតិចិនម្នាក់នោះយ៉ាងចាស់ដៃ និងគួរឲ្យឈឺចាប់បំផុត ដោយបុរសនោះបានធ្វើសកម្មភាពបៀតបៀនកេរ្តិ៍ខ្មាសជាបន្តបន្ទាប់ ដែលនៅក្នុងខណៈពេលដែលពួកនាងកំពុងធ្វើការងារ ស្រាប់តែបុរសជនជាតិចិនរូបនោះ ដើរទៅជិតរួចបានលូកចាប់ច្របាច់គូទ និងលូកចាប់សុដន់ជាបន្តបន្ទាប់ ។ មានពេលខ្លះ បានយកជង្គង់មកអុកគូទ និងស្ទាបអង្អែកគូទរបស់ពួកនាង មិនតែប៉ុណ្ណោះបាននិយាយបបួលពួកនាងឱ្យទៅដេករួមរ័កជាមួយគាត់ជាថ្នូរនឹងប្រាក់ចំនួន១០០ដុល្លារថែមទៀតផង ។
បច្ចុប្បន្ន នារីរងគ្រោះទាំង៤ បានសំណូមពរឲ្យនគរបាលជួយរកយុត្តិធម៌ សម្រាប់ពួកនាងផង ប៉ុន្តែមិនទាន់ដឹងថា នគរបាលចាត់ការទៅលើជននោះបែបណាទេ ។
ចែករំលែកព័តមាននេះ