រាជធានីភ្នំពេញ ៖ ស្ត្រីជាកម្មការិនីកាត់ដេរម្នាក់ បានទៅដាក់ពាក្យបណ្តឹងនៅប៉ុស្តិ៍នគរបាលចោមចៅ សុំឱ្យសមត្ថកិច្ចជួយអន្តរាគមន៍ បន្ទាប់ពីត្រូវប្តីដែលទើបរៀបការបាន២ខែ កើតរោគប្រចណ្ឌជាមួយប្តីរបស់ម្តាយមីង បានទៅវាយធ្វើបាបប្រពន្ធប្រមូលយកខ្សែ.កប្លាទីន១ខ្សែ, អត្តសញ្ញាណប័ណ្ណ, សៀវភៅគ្រួសារ, កាតធ្វើការយកទៅបាត់ កើតឡើងកាលពីវេលាម៉ោង០៦ និង៣៥នាទី យប់ថ្ងៃទី២១ កក្កដា ស្ថិតនៅចំណុចផ្ទះជួលក្នុងភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ ។
ស្ត្រីរងគ្រោះជាប្រពន្ធឈ្មោះប៉ោះ គីមឡាង អាយុ២៣ឆ្នាំ ជាកម្មករកាត់ដេរ ស្នាក់នៅផ្ទះជួលក្នុងភូមិជ្រៃកោង សង្កាត់ចោម ខណ្ឌពោធិ៍សែនជ័យ មានស្រុកកំណើតនៅស្រុកប្រម៉ោយ ខេត្តពោធិ៍សាត់ ។ ចំណែកប្តីជាជនបង្កឈ្មោះលី ហួរ អាយុ២១ឆ្នាំ ជាជាងឈើ ស្នាក់នៅក្រុងតាខ្មៅ ខេត្តកណ្តាល ទាំង២នាក់ទើបរៀបការបាន២ខែប៉ុណ្ណោះ ។
បើតាមប្រភពពីស្ត្រីរងគ្រោះបានរៀបរាប់ទាំងទឹកភ្នែកថា រូបនាងបានរៀបការរយៈពេល២ខែមកហើយ តែប្តីនាងពុំដែលផ្តល់សេចក្តីសុខឱ្យគាត់ឡើយ និងធ្លាប់ប្រើអំពើហិង្សាជាច្រើនដងមកហើយ ដោយសារតែកើតរឿងប្រចណ្ឌ ។ ជារៀងរាល់ថ្ងៃ ប្តីស្នាក់នៅកន្លែងធ្វើការនៅក្រុងតាខ្មៅ ខេត្តកណ្តាល ចំណែកគាត់នៅធ្វើការរោងចក្រនៅជ្រៃកោង ស្នាក់នៅជាមួយម្តាយមីងនៅកន្លែងកើតហេតុ ។
នៅមុនពេលកើតហេតុ ពេលគាត់ចេញពីធ្វើការមកដល់បន្ទប់ជួល កំពុងតែចាក់សោបន្ទប់ ស្រាប់តែឃើញប្តីមិនដឹងជិះម៉ូតូឌុបមកឈប់រង់ចាំលួចមើលគាត់ តាំងពីពេលណាទេ បានទាញដៃគាត់ចូលក្នុងបន្ទប់ជួលវាយធ្វើបាបទះតប់រួចហើយ ដោះយកខ្សែ.កប្លាទីនមួយខ្សែទម្ងន់១.៥ជី និងប្រមូលយកកាតធ្វើការ អត្តសញ្ញាណបណ្ណ័ សៀវភៅគ្រួសារ ហើយគេចខ្លួនបាត់ ។ចំពោះមូលហេតុ គឺ ប្តីតែងតែប្រចណ្ឌប្រពន្ធជាមួយប្តីរបស់ម្តាយមីង។
ក្រោយពេលកើតហេតុ ស្ត្រីរងគ្រោះត្រូវបានម្តាយមីង និងក្មួយប្រុសជូនទៅដាក់ពាក្យបណ្តឹងនៅប៉ុស្តិ៍នគរបាលចោមចៅ ឱ្យជួយឃាត់ខ្លួនជនបង្កនាំយកមកដោះស្រាយសងសំណង និងសុំលែងលះដោយទាមទារជំងឺចិត្ត៣៥០០ដុល្លារ ។
ចែករំលែកព័តមាននេះ