រាជធានីភ្នំពេញ ៖ ជនសង្ស័យម្នាក់ក្នុងចំណោមបក្ខពួក៤នាក់ ត្រូវបានកម្លាំងអាវុធហត្ថខណ្ឌចំការមន ឃាត់ខ្លួនយកទៅសាកសួរ បន្ទាប់ពីជនសង្ស័យរូបនោះ បានធ្វើសកម្មភាពឆក់យកទូរស័ព្ទពីជនរងគ្រោះប្តីប្រពន្ធពីរនាក់មិនបានសម្រេច កាលពីវេលាម៉ោង០៩យប់ ថ្ងៃទី២១ ខែកក្កដា ឆ្នាំ២០១៧ នៅជិតអគារ៤២ជាន់ ផ្លូវព្រះសីហនុ សង្កាត់បឹងកេងកង១ ខណ្ឌចំការមនឃាត់ខ្លួនបាននៅទល់មុខសាកលវិទ្យាល័យភូមិន្ទរដ្ឋបាល ផ្លូវ៤៦៦ សង្កាត់ទន្លេបាសាក់ ខណ្ឌចំការមន ។
ជនសង្ស័យដែលឃាត់ខ្លួនបានមានឈ្មោះ ហ៊ឹម រាជ ភេទប្រុស អាយុ១៦ឆ្នាំ មុខរបរមិនពិតប្រាកដ ស្នាក់នៅផ្ទះជួល សង្កាត់ចាក់អង្រែលើ ខណ្ឌមានជ័យ ចំណែកបក្ខពួក៣នាក់ទៀតរត់គេចខ្លួនបាត់ ។ តាមសម្តីកម្លាំងអាវុធហត្ថខណ្ឌចំការមន បានឲ្យដឹងថា មុនពេលឈានដល់ការឃាត់ខ្លួនជនសង្ស័យនេះ កម្លាំងអាវុធហត្ថបានធ្វើការល្បាត ក្នុងមូលដ្ឋានមកដល់ចំណុចមុខសាកលវិទ្យាល័យភូមិន្ទរដ្ឋបាល ស្រាប់តែប្រទះឃើញប្រជាពលរដ្ឋស្រែកដេញថាចោរៗរួចហើយបានឃាត់ខ្លួនជនសង្ស័យរូបនោះបានម្នាក់ ស្វាគមន៍ម្នាក់មួយដៃមួយជើង ទើបកម្លាំងអាវុធហត្ថទៅដល់ បានឃាត់ខ្លួនជនសង្ស័យរូបនោះ យកទៅសាកសួរនៅមូលដ្ឋានកងរាជអាវុធហត្ថខណ្ឌចំការមន ។
នៅពេលកម្លាំងអាវុធហត្ថខណ្ឌចំការមន ធ្វើការសាកសួរ ជនសង្ស័យរូបនោះបានសារភាពថាពួកគេមានគ្នា៤នាក់ ជិះម៉ូតូ២គ្រឿង ម៉ាកឌ្រីមសង់ ស៊េរីឆ្នាំ២០១៧ មួយគ្រឿង និងមួយគ្រឿងទៀតម៉ាក ស៊ុយសុគីនិក បានធ្វើសកម្មភាពឆក់យកទូរសព្ទពីជនរងគ្រោះពីរនាក់ប្តីប្រពន្ធ ដែលកំពុងជិះម៉ូតូធ្វើដំណើរតាមផ្លួវ នៅជិតនឹងអគារ៤២ជាន់ ផ្លូវព្រះសីហនុ សង្កាត់បឹងកេងកង១ ខណ្ឌចំការមន តែមិនសម្រេច ស្របពេលនោះដែរ ជនរងគ្រោះបានស្រែកឆោឡោថាចោរៗ ផ្អើលដល់ប្រជាពលរដ្ឋដែលធ្វើដំណើរតាមផ្លូវ ជួយដេញតាមចាប់ពួកគេ រហូតដល់មុខសាកលវិទ្យាល័យភូមិន្ទរដ្ឋបាល បណ្ដាលឲ្យពួកគេដួលម៉ូតូ ហើយនៅពេលដែលដួលនោះ បក្ខពួករបស់គេបានលើកម៉ូតូ ជិះរត់គេចខ្លួនបាត់ ដោយបន្សល់រូបគេជាជនសង្ស័យ ត្រូវប្រជាពលរដ្ឋចាប់បាន នាំគ្នាស្វាគមន៍ម្នាក់មួយដៃមួយជើង បែកមុខបែកមាត់ ទើបប្រគល់ទៅឲ្យកម្លាំងអាវុធហត្ថខណ្ឌចំការមន យកទៅសាកសួរតែម្ដងទៅ ។
ក្រោយពេលសាកសួររួច ជនរងគ្រោះមិនបានទៅដាក់ពាក្យបណ្តឹងនោះទេ ចំនែកជនសង្ស័យវិញយោងតាមសំដីសារភាពរបស់គេ ក៏ត្រូវបានកម្លាំងអាវុធហត្ថខណ្ឌចំការមន កសាងសំណុំរឿងបញ្ជូនខ្លួនទៅបញ្ជាការកងរាជអាវុធហត្ថរាជធានីភ្នំពេញ ដើម្បីចាត់ការបន្ត ៕
ចែករំលែកព័តមាននេះ