បង្ក្រាបក្រុមជួញដូរ និងប្រើប្រាស់គ្រឿងញៀ.នឃាត់ខ្លួនបាន៥នាក់
រាជធានីភ្នំពេញ ៖ កម្លាំងនគរបាលខណ្ឌដង្កោ បានបើកប្រតិបត្តិការបង្ក្រាបក្រុមជួញដូរ និងប្រើប្រាស់គ្រឿងញៀ.ន ដោយរយៈពេលពេល២ថ្ងៃជាប់ៗគ្នា
រាជធានីភ្នំពេញ ៖ កម្លាំងនគរបាលខណ្ឌដង្កោ បានបើកប្រតិបត្តិការបង្ក្រាបក្រុមជួញដូរ និងប្រើប្រាស់គ្រឿងញៀន ដោយរយៈពេលពេល២ថ្ងៃជាប់ៗគ្នា ឃាត់ខ្លួនស្ត្រីអ្នកជួញដូរគ្រឿងញៀនបានចំនួន២នាក់ ដកហូតបានថ្នាំញៀនចំនួន១៣កញ្ចប់ រួមនឹងវត្ថុតាងមួយចំនួន និងឃាត់ខ្លួនអ្នកប្រើប្រាស់បានចំនួន៣នាក់ ព្រមទាំងដកហូតបានថ្នាំញៀន១កញ្ចប់ និងវត្ថុតាងមួយចំនួនផងដែរ បន្ទាប់មកបាននាំទៅធ្វើការសាកសួរ និងកសាងសំណុំរឿងចាត់ការតាមច្បាប់។ ប្រតិបត្តិការខាងលើនោះបានធ្វើឡើង លើកទី១ កាលពីថ្ងៃទី២០ ខែកក្កដា ឆ្នាំ២០១៧ វេលាម៉ោង១២ ថ្ងៃត្រង់ នៅត្រង់ចំណុចផ្ទះជួល ស្ថិតនៅភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ។ ដោយបានចាប់ខ្លួនជនសង្ស័យចំនួន៣នាក់ ដកហូតបានថ្នាំញៀន១កញ្ចប់ និងវត្ថុតាងមួយចំនួន។
ជនសង្ស័យដែលត្រូវចាប់ខ្លួននោះ១,ឈ្មោះ ប៉ឹម ណារិន ហៅទីន ភេទប្រុស អាយុ២៤ឆ្នាំ មុខរបរនៅផ្ទះ នៅក្នុងភូមិអន្លូងគងថ្មី សង្កាត់ព្រៃស ខណ្ឌដង្កោ។ ២,ឈ្មោះ ផន សៀងហៃ ភេទប្រុស អាយុ២៣ឆ្នាំ មុខរបរកម្មកររោងចក្រ មានទីលំនៅក្នុងភូមិជាមួយគ្នា។ ៣,ឈ្មោះ ពេជ្រ សុខហេង ភេទប្រុស អាយុ១៧ឆ្នាំ មុខរបរជាងជួសជុលទុរស័ព្ទដៃ ស្នាក់នៅផ្ទះជួលក្នុងភូមិប្រកា សង្កាត់ព្រៃស ខណ្ឌដង្កោ។ ដោយឡែកប្រតិបត្តិការលើកទី២ បានធ្វើឡើងកាលពីថ្ងៃទី២១ ខែកក្កដា ឆ្នាំ២០១៧ វេលាម៉ោង៩ និង៣០នាទីព្រឹក នៅត្រង់ចំណុចសួនឧស្សាហកម្មវឌ្ឍនៈ២ ស្ថិតនៅភូមិតាំងរនាម សង្កាត់ប្រទះឡាង ខណ្ឌដង្កោ រាជធានីភ្នំពេញ។
នគរបាលបានឲ្យដឹងថាលើកទី២នេះ កម្លាំងនគរបាលខណ្ឌដង្កោ និងប៉ុស្ដិ៍ប្រទះឡាង ក្រោមបញ្ជារបស់ លោកវរសេនីយ៏ឯក ជឹម ស៊ីថា អធិការនគរបាលខណ្ឌ បានធ្វើការឃាត់ខ្លួនស្ត្រី ដែលជាជនសង្ស័យ ក្នុងការជួញដូរគ្រឿងញៀនតែម្ដង បានចំនួន២នាក់ដកហូតបានថ្នាំញៀនចំនួន១៣កញ្ចប់ , ម៉ូតូ០១គ្រឿង ម៉ាកហុងដាគូប សេ៥០ ពណ៌សំបកឪឡឹក ពាក់ស្លាកលេខភ្នំពេញ 1AM-6377 លេខតួ2114623 លេខម៉ាស៊ីន0902962 ។ ប្រភពដដែលបានបន្តទៀតថា ស្ត្រីដែលជាជនសង្ស័យខាងលើនោះម្នាក់ឈ្មោះ យាន យូម៉ី ភេទស្រី អាយុ១៨ឆ្នាំ ជនជាតិខ្មែរសញ្ជាតិខ្មែរ មុខរបរមិនពិតប្រាកដ និងម្នាក់ទៀតឈ្មោះ វ៉ុន សៀវម៉ី ភេទស្រី អាយុ១៨ឆ្នាំ ជនជាតិខ្មែរសញ្ជាតិខ្មែរ មុខរបរមិនពិតប្រាកដ ហើយអ្នកទាំងពីរនាក់នេះ ស្នាក់នៅផ្ទះជួលក្នុងភូមិព្រៃព្រីង សង្កាត់ចោមចៅ ខណ្ឌពោធិ៍សេនជ័យ រាជធានីភ្នំពេញ។
នៅមុនពេលចាប់ខ្លួនក្រុមអ្នកប្រើប្រាស់ និងជួញដូរគ្រឿងញៀនទាំងពីរក្រុមនេះ កម្លាំងនគរបាលខាងលើបានចេញល្បាតធ្វើការស្រាវជ្រាវ ហើយបានទទួលដំណឹងពីប្រជាពលរដ្ឋ ទើបកំណត់បានមុខសញ្ញាទាំងនោះ ហើយក៏បានឈានដល់ការចុះបង្ក្រាប និងចាប់ខ្លួនបានជាបន្តបន្ទាប់រួចបាននាំទៅសាកសួរ និងកសាងសំណុំរឿងនៅអធិការដ្ឋាននគរបាលខណ្ឌ រង់ចាំបញ្ជូនទៅសាលាដំបូងរាជធានីភ្នំពេញ ចាត់ការតាមផ្លូវច្បាប់៕
ចែករំលែកព័តមាននេះ