រាជធានីភ្នំពេញ៖ កម្ពុជា-ថៃ បានប្តេជ្ញារួមគ្នាធ្វើសហប្រតិបត្តិការពង្រឹងកិច្ចសហប្រតិបត្តិការទ្វេភាគី ដើម្បីលុបបំបាត់ការជួញដូរមនុស្ស និងការពង្រឹងការអនុវត្តលក្ខខណ្ឌការងារ និងការការពារពលករកម្ពុជាដែលស្នាក់នៅ និងធ្វើការនៅប្រទេសថៃ។
ការប្តេជ្ញារួមគ្នាធ្វើឡើងក្នុងជំនួបទ្វេរភាគីរវាង អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ជាមួយលោក អាឌុល សែងស៊ីកែវ រដ្ឋមន្ត្រីក្រសួងអភិវឌ្ឍសង្គម និងសន្តិសុខមនុស្សជាតិ នៃប្រទេសថៃ កាលពីថ្ងៃទី២០ខែកក្កដា ឆ្នាំ២០១៧នៅប្រទេសថៃ កន្លងមក។
យោងតាមគេទំព័រហ្វេសប៊ុករបស់ក្រសួងការងារ បានឲ្យដឹងថា នៅក្នុងជំនួបទ្វេភាគីកម្ពុជា-ថៃ លោករដ្ឋមន្ត្រីក្រសួងការងារកម្ពុជា បានសម្តែងនូវការអរគុណនិងវាយតម្លៃខ្ពស់ដល់ភាគីថៃ ដែលតែងតែជួយសម្របសម្រួលដល់បងប្អូនពលករកម្ពុជា និងតែងតែប្រកាន់ភ្ជាប់នូវស្មារតីនៃកិច្ចសហប្រតិបត្តិការទ្វេភាគី សំដៅរឹតចំណងមិត្តភាព និងភាពជាអ្នកជិតខាងល្អកន្លងមក ជាពិសេសការរក្សាស្មារតីអនុស្សរណៈនៃការយោគយល់គ្នារវាងរាជរដ្ឋាភិបាលនៃប្រទេសទាំងពីរ ស្តីពីកិច្ចសហប្រតិបត្តិការ ទ្វេភាគីដើម្បីលុបបំបាត់ការជួញដូរមនុស្ស និងការជួយជនរងគ្រោះដោយសារការជួញដូរ ដែលបានចុះហត្ថលេខា កាលពីថ្ងៃទី៣០ ខែតុលា ឆ្នាំ២០១៤ នៅរាជធានីភ្នំពេញ។
ជាងនេះទៅទៀត ភាគីទាំងពីរបានលើកឡើងពីការពង្រឹងការអនុវត្តផែនការសកម្មភាពដំណាក់កាលទី១ (២០១៦-២០១៨) ដែលបានឯកភាពគ្នាកាលពីថ្ងៃ ២៦-២៨ ខែមេសា ឆ្នាំ២០១៦ ក្នុងនោះមានផែនការជាអាទិភាពចំនួន៦ រួមមាន៖
១-យន្តការដើម្បីអនុវត្តផែនការសកម្មភាព។
២-ការវិភាគស្ថានភាព និងការវាយតម្លៃលើត្រូវការក្នុងការប្រយុទ្ធប្រឆាំងអំពើជួញដូរមនុស្ស។
៣-កិច្ចសហប្រតិបត្តិការផ្នែកវិធានការទប់ស្កាត់។
៤-កិច្ចសហប្រតិបត្តិការផ្នែកកិច្ចការពារជនរងគ្រោះដោយសារការជួញដូរ។
៥-កិច្ចសហប្រតិបត្តិការផ្នែកការធ្វើមាតុភូមិនិវត្តន៍ និងសមាហរណកម្មជនរងគ្រោះ។
៦-កិច្ចសហប្រតិបត្តិការនៅក្នុងការបង្ក្រាបការជួញដូរមនុស្ស៕
ចែករំលែកព័តមាននេះ