ខេត្តព្រះវិហារ ៖ យោងតាមតួលេខរបស់ស្នងការដ្ឋាននគរបាលខេត្តព្រះវិហារ ក្នុងរយៈពេលឆមាសទី១ ឆ្នាំ២០១៧នេះ បង្ហាញថា កំណើនគ្រោះថ្នាក់ចរាចរណ៍មានការកើនឡើង គួរឲ្យកត់សម្គាល់ បើធៀបនឹងរយៈពេលដូចគ្នាឆ្នាំ២០១៦ កន្លងទៅ ។ ស្នងការដ្ឋាននគរបាលខេត្តអះអាងថា ការកើនឡើង នូវគ្រោះថ្នាក់ចរាចរណ៍នេះ បន្ទាប់ពីកម្លាំងនគរបាលចរាចរណ៍ផ្អាកសកម្មភាព ត្រួតពិនិត្យចរាចរណ៍មួយរយៈ នៅក្នុងអំឡុងពេលយុទ្ធនាការឃោសនាបោះឆ្នោត និងក្នុងពេលបោះឆ្នោតកន្លងទៅ ។
នេះបើតាមលោកឧត្តមសេនីយ៍ត្រី យិន ចំណាន ស្នងការដ្ឋាននគរបាលខេត្តព្រះវិហារ មានប្រសាសន៍ប្រាប់អ្នកយកព័ត៌មាន នៅថ្ងៃទី២០ ខែកក្កដា ឆ្នាំ២០១៧នេះថា ក្នុងរយៈពេលឆមាសទី១ ឆ្នាំ២០១៧នេះ ករណីគ្រោះថ្នាក់ចរាចរណ៍ នៅទូទាំងខេត្តព្រះវិហារ មានការកើនឡើងគួរឲ្យកត់សម្គាល់ បន្ទាប់ពីកម្លាំង នគរបាលចរាចរណ៍ បានផ្អាកសកម្មភាពត្រួតពិនិត្យចរាចរណ៍មួយរយៈ នៅក្នុងអំឡុងពេលយុទ្ធនាការឃោសនា និងអំឡុងពេលបោះឆ្នោត ដែលធ្វើឲ្យគ្រោះថ្នាក់ចរាចរណ៍កើនមានជាហូរហែរ ភាគច្រើនបណ្តាលមកពីករណី បើកបរហួរល្បឿនកំណត់ និងកត្តាអ្នកបើកបរមានជាតិស្រវឹង ។
លោកស្នងការបន្តថា បច្ចុប្បន្ននេះ កម្លាំងនគរបាលចរាចរណ៍ នៃស្នងការដ្ឋានខេត្តព្រះវិហារ បន្ទាប់ពីមានបទបញ្ជាពីលោក អ៊ុន ចាន់ដា អភិបាលខេត្តព្រះវិហា ស្នងការបានដាក់កងកម្លាំងបុស្តិ៍ត្រួតពិនិត្យចរាចរណ៍ឡើងវិញ នៅចំណុចផ្លូវសំខាន់ៗ ដើម្បីត្រួតពិនិត្យនូវយានយន្ត ដែលបើកបរមិនគោរពច្បាប់ចរាចរណ៍ ត្រួតពិនិត្យ ការបើកបរហួសល្បឿនកំណត់ និងត្រួតពិនិត្យសារជាតិស្រវឹង ដល់អ្នកបើកបរនៅពេលយប់ ដើម្បីសុខសុវត្ថិភាពចរាចរណ៍ ដល់អ្នកបើកបរទាំងអស់ ។
លោកឧត្តមសេនីយ៍ ក៏បានបញ្ជាក់ថា មកដល់ពេលនេះ កម្លាំងនគរបាលចរាចរណ៍ផ្លូវគោកខេត្ត កំពុងដាក់ទីតាំងនៅភូមិត្រាវគៀត ឃុំថ្មី ស្រុកគូលែន ខេត្តព្រះវិហារ និងបន្តដាក់ពង្រាយកម្លាំងត្រួតពិនិត្យបន្ថែម នៅតាមផ្លូវជាតិសំខាន់ៗមួយចំនួនទៀត ដោយឡែកការផ្សព្វផ្សាយច្បាប់ចរាចរណ៍ផ្លូវគោក សមត្ថកិច្ចនឹងធ្វើការផ្សព្វផ្សាយបន្ថែមទៀតនៅគ្រប់មូលដ្ឋានទាំងអស់ ទូទាំងខេត្តព្រះវិហារ ។
យោងតាមរបាយការណ៍ របស់ស្នងការដ្ឋាននគរបាលខេត្តព្រះវិហារ ក្នុងឆមាសទី១ ឆ្នាំ២០១៧នេះ បង្ហាញថា ករណីគ្រោះចរាចរណ៍នៅទូទាំងខេត្តព្រះវិហារ កើតឡើងចំនួន៤៧លើក លើ៣៣លើក កើនឡើង១៤លើក ស្មើនឹង៣៦% បណ្តាលឲ្យខូចខាតរថយន្តតូចចំនួន១៤គ្រឿង ក្នុងនោះខូចធ្ងន់១០គ្រឿង ខូចម៉ូតូ៣៦គ្រឿង ខូចធ្ងន់២៨គ្រឿង របួសមនុស្ស៧៦នាក់ ស្រី១៩នាក់ ក្នុងនោះរបួសធ្ងន់៤៥នាក់ ស្រី១២នាក់ និងបណ្តាលឲ្យមនុស្សស្លាប់២៦នាក់ ស្រី០៥នាក់ បើប្រៀបធៀបនឹងរយៈពេលឆមាសដូចគ្នា ឆ្នាំ២០១៦ ។
ចែករំលែកព័តមាននេះ