សហរដ្ឋអាមេរិក ៖ យោងតាមការវាយតម្លៃរបស់ពួកអ្នកស្រាវជ្រាវនៃសាកលវិទ្យាល័យចចជៀរ និងកាលីហ្វ័រនីញ៉ាអាេមរិកថា ភពផែនដីយើងពេលនេះបន្សល់ទុកកាកសំណល់ប្លាស្ទិកជាច្រើនពាន់លានតោនចាប់តាំងពីឆ្នាំ១៩៥០មក ។ នេះជាសភាពការណ៍បណ្តាលមកពីការកែច្នៃកាកសំណល់ទាំងនោះពុំមានប្រសិទ្ធភាព ។
វាជាការកត់សម្គាល់របស់ពួកអ្នកស្រាវជ្រាវនៃសាកលវិទ្យាល័យទាំងនេះដែលការសិក្សារបស់ពួកគេចេញផ្សាយកាលពីថ្ងៃទី១៩ កក្កដា ក្នុងទស្សនាវដ្តីអាមេរិក SCIENCE ADVANCES ។
បណ្តាអ្នកវិទ្យាសាស្ត្រកំណត់ថា កាកសំណល់ប្លាស្ទិកដល់៨,៣ពាន់លានតោន បន្សល់ទុករវាងឆ្នាំ១៩៥០ និង២០១៥ ។ ក្នុងចំណោមកាកសំណល់ទាំងនេះកាកសំណល់៦,៣ពាន់លានតោនក្លាយទៅជាកម្ទេច ហើយមានតែ៩%ទេដែលត្រូវកែច្នៃ១២% ត្រូវដុតចោល ។ ផ្ទុយទៅវិញ៧៩% បន្សល់ទុកចោលក្នុងគំនរសំរាម ឬក្នុងធម្មជាតិ ពិសេសក្នុងមហាសមុទ្រទាំងឡាយដែលកាកសំណល់ប្លាស្ទិកដល់ជាង៨លានតោនជះចូលសមុទ្រក្នុងមួយឆ្នាំៗ ។ គេវាយតម្លៃថា រហូតដល់ឆ្នាំ២០៥០ មានកាកសំណល់ប្លាស្ទិកដល់ទៅ១២ពាន់លានតោន ។
ផលិតកម្មប្លាស្ទិកលើពិភពលោក ឈានពី២លានតោនក្នុងឆ្នាំ១៩៥០ ដល់៤០០លានតោនក្នុង២០១៥ ពោលច្រើនជាងសម្ភារមួយចំនួន ដែលមនុស្សផលិតទៀតផង ។
តាមការសិក្សានេះប្រសិនបើសង្វាក់នៃការបញ្ចេញកាកសំណល់ប្លាស្ទិកស្ថិតក្នុងសង្វាក់ដដែលនោះនឹងមានកាកសំណល់ប្លាស្ទិកដល់ទៅប្រមាណ១២ពាន់លានតោនស្ថិតនៅទីតាំងស្តុកកាកសំណល់ទាំងឡាយឬក្នុងធម្មជាតិរហូតដល់ឆ្នាំ២០៥០ ពោលមានទម្ងន់៣៥.០០០ដង លើសទម្ងន់អគារ EMPIRE STATE BUILDING ក្រុងញូវយ៉ក ។ បណ្តាអ្នកវិទ្យាសាស្ត្រចង់ឱ្យមានការកែច្នៃកាកសំណល់ទាំងនេះ ហើយព្រមានប្រឆាំងការដុតវាចោលដែលអាចបង្កគ្រោះមហន្តរាយដល់បរិស្ថាន ៕
ចែករំលែកព័តមាននេះ