«ជាងថាជួសជុលម៉ូតូ» ជាស្លាកយីហោអាជីវកម្មតជំនាន់
រាជធានីភ្នំពេញ ៖ ជាងជួសជុលម៉ូតូមួយកន្លែង ដែលបានចាប់ផ្ដើមអាជីវកម្មនេះតាំងពីឆ្នាំ១៩៧៩មក ពោលគឺក្រោយពីផ្ដួលរំលំរបបខ្មែរក្រហម រហូតមកដល់បច្ចុប្បន្ន គ្រួសារមួយនេះនៅតែ
រាជធានីភ្នំពេញ ៖ ជាងជួសជុលម៉ូតូមួយកន្លែង ដែលបានចាប់ផ្ដើមអាជីវកម្មនេះតាំងពីឆ្នាំ១៩៧៩មក ពោលគឺក្រោយពីផ្ដួលរំលំរបបខ្មែរក្រហម រហូតមកដល់បច្ចុប្បន្ន គ្រួសារមួយនេះនៅតែបន្តអាជីវកម្មជាជាងជួសជុលម៉ូតូដដែល ក៏ប៉ុន្តែការងារមួយភាគធំត្រូវប្រគល់ទៅឱ្យកូន ដែលជាអ្នកស្នងពីឪពុក ។
បើធ្វើដំណើរតាមបណ្ដោយផ្លូវឧកញ៉ាទេពផន ឆ្ពោះទៅកាន់វិថីខេរភូមិន្ទ ឬហៅថាផ្លូវលេខ២៧១ គ្រាន់តែឡើង និងបត់ឆ្វេងបន្តិច នៅខាងស្ដាំដៃនោះ នឹងឃើញហាងជួសជុលម៉ូតូមួយកន្លែងដាក់ឈ្មោះថា «ជាងថាជួសជុលម៉ូតូ» ដែលជាស្លាកយីហោអាជីវកម្មតាំងពីឆ្នាំ១៩៧៩រហូតមក ។
បុរសវ័យជាង៦០ឆ្នាំ ដែលកំពុងតែមមាញឹកជួសជុលម៉ូតូបណ្ដើរ និយាយបណ្ដើរបានរៀបរាប់ថា លោកបានចាប់ផ្ដើមជួសជុលម៉ូតូតាំងពីបែករបបប៉ុលពតមក តែម៉ូតូសម័យនោះ ជាម៉ូតូស៊េរីចាស់ ហើយមិនសូវមានគ្រឿងបន្លាស់ទំនើបៗដូចពេលបច្ចុប្បន្ននេះទេ ។ លោកថា កាលណោះ បើសិនជាចង់ដូរគ្រឿងបន្លាស់ណាមួយពិបាកណាស់ គឺត្រូវយករបស់ដែលស្រដៀងៗគ្នាមកដុសខាត់ ហើយដាក់ជំនួសគ្រឿងបន្លាស់ដែលខូចនោះ ក៏ប៉ុន្តែសម័យនេះស្រួលណាស់ ចង់ដោះដូរគ្រឿងបន្លាស់មួយណា គ្រាន់តែទិញពីកន្លែងលក់គ្រឿង យកមកដាក់ជាការស្រេច ដោយមិនចាំបាច់កែច្នៃ គ្រឿងបន្លាស់ដូចពីមុនទៀតឡើយ ។
លោកបន្តថា ជំនាញជួសជុលម៉ូតូនេះ លោកមិនបានរៀននៅសាលាបណ្ដុះបណ្ដាលត្រឹមត្រូវដូចបច្ចុប្បន្នទេ គឺចេះតៗគ្នា តែក្រោយមកវាក៏ក្លាយជាជំនាញ ហើយសព្វថ្ងៃនេះ បច្ចេកវិទ្យាចេះតែវិវត្តន៍ទៅមុខ និងមានជាងបានចូលសាលាបណ្ដុះបណ្ដាលត្រឹមត្រូវ ក៏បានបើកអាជីវកម្មដូចគ្នា ដែលធ្វើឱ្យពិបាកក្នុងការរកស៊ី ។
លោកថា ៖« បច្ចុប្បន្ននេះ មិនមានការងារជួសជុលអ្វីជាធំដុំទេ គឺមានដូចជាត្រឹមដូរប្រេងម៉ាស៊ីនម៉ូតូ និងជួសជុលតិចប៉ុណ្ណោះ ព្រោះបើម៉ូតូទំនើបៗភាគច្រើន គេចូលជាងជំនាញ ឬក្រុមហ៊ុនតែម្ដង » ។
លោក ម៉េង ស្រ៊ុន ជាកូនប្រុសលោកពូថាដែលស្នងការងារតពីឪពុក បានរៀបរាប់ដែរថា ការទាក់ទាញអតិថិជនដើម្បីត្រឡប់មកជួសជុល ក្រៅពីគ្រឿងល្អៗហើយ ស្នាដៃនៃការជួសជុល គឺជារឿងសំខាន់ ប៉ុន្ដែបើសិនមានស្នាដៃហើយ គ្មានគ្រឿងបន្លាស់ល្អក្នុងការផ្លាស់ជូនអតិថិជននោះទេ ក៏វាមិនអាចធ្វើឱ្យអតិថិជនគាំទ្រយូរអង្វែងដែរ ។
លោកបន្តថា ជំនាញជួសជុលម៉ូតូនេះ គឺលោកបានរៀនពីឪពុក ដោយមិនបានចេញពីសាលាបណ្ដុះបណ្ដាលណាទេ ។ បើគិតមកដល់ពេលនេះ លោកបានធ្វើជាជាង១០ឆ្នាំហើយ ពោលគឺចាប់តាំងពីលោកពេញវ័យ ពេញកម្លាំងដើម្បីរៀនមុខជំនាញនេះ ។
លោកថា ៖« ការរៀនជំនាញពីគាត់ (ឪពុក) មិនគ្រប់គ្រាន់ទេ ព្រោះសព្វថ្ងៃនេះ មានម៉ូតូថ្មីៗប្លែកទើបតែចេញមក ។ ដូចនេះ ត្រូវការរៀន និងសិក្សាបន្ថែមទៀត ដើម្បីដើរឱ្យទាន់ជាមួយបច្ចេកវិទ្យាសម័យនេះ » ។
លោកបន្ថែមថា ក្រៅពីជំនាញ និងមានគ្រឿងបន្លាស់ល្អៗ ជួសជុលដោយយកចិត្តទុក និងមិនបន្លំអតិថិជន ក៏ជាកត្តាសំខាន់មួយដែរ ដើម្បីឱ្យអតិថិជនទុកចិត្ត និងអាចទាក់ទាញពួកគាត់នៅថ្ងៃក្រោយ ។
លោកថា ៖« ខ្ញុំធ្លាប់ឮគេនិយាយថា ពេលដែលយកម៉ូតូទៅទុកផ្ទះជាង១ថ្ងៃ ឬ២ថ្ងៃ មានបាត់គ្រឿងនេះ គ្រឿងនោះ តែបញ្ហាហ្នឹង ខ្ញុំមិនដឹងច្បាស់ទេ ថាតើជាងនោះពិតជាបន្លំគ្រឿងម៉ូតូអតិថិជនពិតឬអត់ តែសម្រាប់ខាងខ្ញុំ មិនដឹងថា យកគ្រឿងនោះទៅធ្វើអីផង យើងមានតែបង្គ្រប់ឱ្យវាពេញលក្ខណៈម៉ូតូ ហើយបើកន្លែងណាខូច យកវាចេញដាក់ថ្មីជំនួសវិញ » ។
គួរបញ្ជាក់ថា ក្រៅពីអាជីវកម្មជួសជុលម៉ូតូ ដែលជាមុខរបរតពីឪពុក លោក ម៉េង ស្រ៊ុន ក៏បានបន្ថែមអាជីវកម្មមួយទៀត គឺលក់ម៉ូតូជជុះ ព្រោះវាជារបរទាក់ទងនឹងអាជីវកម្មដែលរូបលោកកំពុងធ្វើសព្វថ្ងៃនេះ ៕
ចែករំលែកព័តមាននេះ