រាជធានីភ្នំពេញ ៖ អ្នកលក់រថយន្ដមួយទឹក ឬរថយន្តជជុះនៅតែមានសុទិដ្ឋិនិយមពីទីផ្សាររថយន្តប្រភេទនេះ បើទោះបីជាកំណើននៃការប្រើប្រាស់រថយន្តថ្មីកើនឡើងក្នុងប៉ុន្មានឆ្នាំចុងក្រោយនេះក៏ដោយ ។
លោក សាន ថូ ម្ចាស់ឃ្លាំងលេខ១៦៨ ស្ថិតនៅតាមបណ្តោយផ្លូវលេខ២៧១ បាននិយាយតាមទូរស័ព្ទនាព្រឹកថ្ងៃទី១៩ កក្កដា ថា រថយន្តជជុះនៅតែមានតម្រូវការពីប្រជាពលរដ្ឋ ដោយសារជីវភាពពួកគាត់ភាគច្រើនមានកម្រិតនៅឡើយ ។ ទោះជាគ្រប់គ្នាចង់ប្រើប្រាស់រថយន្ដថ្មី ប៉ុន្តែអ្វីសំខាន់ គឺលទ្ធភាព ។ លោកបន្តថា ៖«យើងមិនបារម្ភពីបញ្ហាទីផ្សាររថយន្ដថ្មីកើនឡើងទេ ដោយសារអ្នកមានលទ្ធភាពប្រើប្រាស់រថយន្ដថ្មី មានចំនួនតិចនៅឡើយ » ។
លោកបន្តថា៖« ទោះជាយ៉ាងណា ការលក់រថយន្តឆ្នាំនេះបានថយចុះ ដោយសារផលរបរកសិកម្មរបស់ពលរដ្ឋមានបញ្ហាតម្លៃ និងបញ្ហាទាក់ទងនឹងការបោះឆ្នោត សុទ្ធតែធ្វើឲ្យការលក់រថយន្តធ្លាក់ចុះ » ។ លោកថា ៖« ការលក់រថយន្ដជជុះថយចុះ មិនបណ្តាលមកពីការកើនឡើងនៃការប្រើប្រាស់រថយន្តថ្មីទេ ទោះជាវាមានឥទ្ធិពលតិចតួចក្តី»។
លោក សាន ថូ បន្តទៀតថា ការប្រើប្រាស់រថយន្តថ្មីពិតជាកើនឡើង និងបន្តកំណើនបន្ថែមទៀតនៅរយៈពេល៥ទៅ១០ឆ្នាំក្រោយ ប៉ុន្តែលោកលើកឡើងថា ការប្រើប្រាស់រថយន្តជជុះ និងរថយន្តថ្មីមានការខាតបង់ដូចគ្នា បើទិញរថយន្តមានស្លាកលេខស្រាប់មិនសូវខាតនោះទេ ។
កាលពីដើមឆ្នាំនេះ លោក ប៉ា សុជាតិវង្ស អតីតអភិបាលរាជធានីភ្នំពេញ បានលើកសំណើទៅកាន់សម្តេចតេជោ ហ៊ុន សែន នាយករដ្ឋមន្ត្រី ដើម្បីបញ្ឈប់ការនាំចូលរថយន្តជជុះ ប៉ុន្តែសំណើនោះត្រូវបានបដិសេធ ។
លោក ចក់ សារិន ម្ចាស់ឃ្លាំងលក់រថយន្តលេខ១៩៧ A ស្ថិតនៅតាមបណ្តោយមហាវិថីម៉ៅ សេទុង បាននិយាយស្រដៀងនឹងការលើកឡើងខាងលើថា ការលក់រថយន្តជជុះឆ្នាំនេះថយចុះបន្តិច បើធៀបរយៈពេលដូចគ្នាកាលពីឆ្នាំមុន ប៉ុន្តែការថយចុះនេះ មិនបណ្តាលមកពីការប្រើប្រាស់រថយន្តថ្មីនោះទេ ព្រោះអ្នកមានលទ្ធភាពប្រើប្រាស់រថយន្តថ្មី មានមិនដល់១០%ទេ នេះបើតាមអ្វីដែលលោកគិត ។ លោកបន្តថា រថយន្តថ្មីតម្លៃជិត៣ម៉ឺនដុល្លារយ៉ាងតិច អ្នកមានជីវភាពអាចចំណាយកម្រិតនេះ ក៏មានមិនច្រើនដែរ ។
លោកបន្តថា ៖« តាមខ្ញុំដឹង រថយន្ដថ្មីភាគច្រើនដែលផលិតនៅប្រទេសថៃ មានគុណភាពមិនល្អដូចរថយន្ដផលិតនៅអាមេរិកទេ នេះជាមូលហេតុដែលមនុស្សមួយចំនួនមិនប្រើឡានថ្មី » ។
លោក សេង វឹង អគ្គនាយកបច្ចេកទេសរថយន្តនៃក្រុមហ៊ុន RMA Asia បានថ្លែងថា ទីផ្សាររថយន្តថ្មីបាននិងកំពុងកើនឡើង ដោយបច្ចុប្បន្នអ្នកប្រើប្រាស់រថយន្តថ្មីមានកំណើន ហើយរថយន្តថ្មីដែលកំពុងចរាចរលើទីផ្សារមានប្រមាណ១៣% ។ លោកបន្តថា បញ្ហារថយន្តជជុះ ក៏ជាឧបសគ្គនៃការលក់រថយន្តថ្មីដែរ និងជាអ្វីដែលយើងមានចម្ងល់ ព្រោះរាជរដ្ឋាភិបាលដំឡើងពន្ធលើរថយន្តថ្មី និងបន្ធូរបន្ថយពន្ធលើរថយន្តមួយទឹកទៅវិញ ។
ជាការឆ្លើយតបនឹងបញ្ហានេះ លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងថា ការដំឡើងពន្ធរថយន្តថ្មី មិនប៉ះពាល់ដល់ទីផ្សាររថយន្ត និងស្ថានភាពសេដ្ឋកិច្ចកម្ពុជានោះទេ ព្រោះការដំឡើងនេះ ប៉ះពាល់តែក្រុមអ្នកមានជីវភាពធូរធារខ្លាំងប៉ុណ្ណោះ ។
យោងតាមរបាយការណ៍អគ្គនាយកដ្ឋានដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូន ឲ្យដឹងថា គិតពីឆ្នាំ១៩៩០ ដល់ខែមេសា ឆ្នាំ២០១៧ រថយន្តដែលបានចុះបញ្ជីនៅទូទាំងប្រទេសមានចំនួន៩១៥.៩៧៨គ្រឿង ក្នុងនោះរថយន្តធម្មតា៥៦៦.១៥៧គ្រឿង និងរថយន្តធ្វើអាជីវកម្ម៣៤៩.៨២១គ្រឿង ៕
ចែករំលែកព័តមាននេះ