រាជធានីភ្នំពេញ ៖ សម្រាប់រយៈពេល៦ខែ ឆ្នាំ២០១៧នេះ កម្ពុជាបាននាំចេញប្រភេទស្វាក្តាមជំទង់ចំនួន២.៣១២ក្បាលទៅកាន់ទីផ្សារអន្តរជាតិ ។ នេះបើតាមមន្ត្រីជាន់ខ្ពស់មួយរូបរបស់ក្រសួងកសិកម្ម រុក្ខាប្រមាញ់ និងនេសាទ ។
លោក ឡោ រស្មី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា នៅកម្ពុជាបច្ចុប្បន្ននេះ គឺមានក្រុមហ៊ុន៦ គ្រប់គ្រងកសិដ្ឋានចំនួន៧ ដែលចិញ្ចឹម និងបង្កាត់ពូជស្វាក្តាម ដោយមានស្វាក្តាមសរុបចំនួន៣៩.៩២២ក្បាល ក្នុងនោះកូនកើតក្នុងខែសរុបចំនួន៣.៦០៩ក្បាល ហើយសត្វស្វាក្តាមជំទង់បាននាំចេញសរុប២.៣១២ក្បាល គឺប្រហាក់ប្រហែលនឹងចំនួនដែលនាំចេញកាលពី៦ខែ ឆ្នាំ២០១៦ កន្លងមក ។
លោក ឡោ រស្មី បន្ថែមទៀតថា ក្រុមហ៊ុនទាំង៦ ដែលគ្រប់គ្រងកសិដ្ឋានចិញ្ចឹម និងបង្កាត់ពូជស្វាក្តាមនោះ ជាក្រុមហ៊ុនចិន អាមេរិក កូរ៉េ និងក្រុមហ៊ុនខ្មែរចំនួន២ ។
សម្រាប់ទីតាំងកសិដ្ឋានគ្រប់គ្រងដោយក្រុមហ៊ុនចិន គឺមានទីតាំងស្ថិតនៅស្រុកកៀនស្វាយ ខេត្តកណ្តាល កំពង់ស្ពឺ និងខេត្តពោធិ៍សាត់ ។ ចំណែកកសិដ្ឋានរបស់ក្រុមហ៊ុនអាមេរិកមានទីតាំងនៅស្រុកព្រៃឈរ ខេត្តកំពង់ចាម និងខេត្តកំពង់ធំ។ ដោយឡែក កសិដ្ឋានរបស់ក្រុមហ៊ុនកូរ៉េ គឺមានទីតាំងនៅខេត្តកំពង់ឆ្នាំង ។
លោក ឡោ រស្មី មានប្រសាសន៍ថា ៖ «ចំណែកសត្វស្វាដែលយើងនាំចេញ គឺទៅចិន ជប៉ុន USA (សហរដ្ឋអាមេរិក) និងសហគមន៍៍អឺរ៉ុបផងដែរ ប៉ុន្តែសម្រាប់សហគមន៍អឺរ៉ុប និងកូរ៉េ គឺមិនច្រើនទេ ។ រីឯផលប្រយោជន៍នៃការនាំចេញសត្វស្វាក្តាមហ្នឹង យើងនាំចេញចន្លោះអាយុពី១០ ទៅ១២ខែ ។ ការនាំចេញស្វាក្តាមនេះ គឺមិនមែនសម្រាប់ធ្វើម្ហូបអាហារទេ គឺគេយកទៅធ្វើការពិសោធន៍ស្រាវជ្រាវដើម្បីធ្វើថ្នាំ។ យើងធ្វើថ្នាំធ្វើអី គឺយើងធ្វើការពិសោធន៍សត្វស្វា ជួនកាល គេធ្វើពិសោធន៍លើសត្វកណ្តុរ។ល។ ដើម្បីចង់ដឹងថា ថ្នាំវាពុលឬយ៉ាងណា យ៉ាងណី គឺដើម្បីធ្វើការពិសោធន៍ » ។
អ្នកនាំពាក្យរូបនេះបានសង្កត់ធ្ងន់ថា ៖ «ប្រទេសដែលគេនាំចូលពីយើងទៅ គឺគេមិនយកទៅបរិភោគទេ » ។ សម្រាប់ក្រុមហ៊ុននាំចេញសព្វថ្ងៃនេះ គឺមាន៣ក្រុមហ៊ុន រួមមាន៖ ១-ក្រុមហ៊ុនធានហ៊ូ (អាមេរិក) នាំចេញប្រមាណ១.៥០០ក្បាលក្នុងមួយឆ្នាំ ។ ២-ក្រុមហ៊ុនវ៉ាន់នី (ចិន) នាំចេញចន្លោះពី៨០០ ទៅ១ពាន់ក្បាលក្នុងមួយឆ្នាំ និង៣-ក្រុមហ៊ុនអូរាំងខាម (កូរ៉េ) នាំចេញប្រមាណជាង១០០ក្បាលក្នុងមួយឆ្នាំ ។
បណ្ឌិត កែវ អូម៉ាកលីស្ស អនុប្រធានរដ្ឋបាលព្រៃឈើ បានប្រាប់កោះសន្តិភាពកាលពីថ្ងៃទី១៨ កក្កដា ថា ស្វាក្តាមជំទង់ត្រូវបាននាំចេញពីកម្ពុជាទៅកាន់ប្រទេសអាមេរិក កូរ៉េ ជប៉ុន និងចិនតាំងពីឆ្នាំ២០០៥ មកម្ល៉េះ ហើយការនាំចេញក្នុង១ឆ្នាំ គឺមានចំនួនជាមធ្យមពី៣ ទៅ៥ពាន់ក្បាល ។
បណ្ឌិត កែវ អូម៉ាកលីស្ស បានបញ្ជាក់ថា ៖ « សម្រាប់ការនាំចេញស្វាក្តាមទៅក្រៅប្រទេស គឺយើងនាំចេញកូនស្វាក្តាមជំទង់ដែលបង្កាត់ មិនមែនមេៗស្វានោះទេ ។
ទីផ្សារធំបំផុត គឺអាមេរិក ជប៉ុន និងអឺរ៉ុប សម្រាប់ធ្វើការស្រាវជ្រាវ និងពិសោធន៍ធ្វើថ្នាំ ។ ឧទាហរណ៍ ការពិសោធន៍ថ្នាំទឹកនោមផ្អែមជាដើម មានន័យថា ស្វាក្តាមត្រូវបានប្រើប្រាស់សម្រាប់ធ្វើតេស្តថ្នាំ » ។
កម្ពុជាត្រូវបានចាត់ទុកជាកន្លែងចិញ្ចឹម និងបង្កាត់ពូជស្វាក្តាមសម្រាប់ការនាំចេញទៅទីផ្សារបរទេសសិក្សាពិសោធន៍ផ្នែកវេជ្ជសាស្ត្រ ។ កាលពីចុងឆ្នាំ២០១៣ មានការរាយការណ៍ពីការសម្លាប់ស្វាក្តាមចំនួន៥ក្បាលនៅតាមផ្លូវ ពេលពួកវាត្រូវបានបញ្ជូនទៅកាន់ទីពិសោធន៍មួយនៅសហរដ្ឋអាមេរិក ។
បើយោងតាមរបាយការណ៍ស្តីពីសភាពការណ៍កសិកម្ម រុក្ខាប្រមាញ់ និងនេសាទ ប្រចាំឆមាសទី១ឆ្នាំ២០១៧ ក៏បានបង្ហាញថា នៅឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ មានសត្វព្រៃសរុបចំនួន១.២៨៥ក្បាល ហើយសង្គ្រោះសត្វថ្មីចំនួន៨៨៩ក្បាល ៕
ចែករំលែកព័តមាននេះ