រាជធានីភ្នំពេញ ៖ វិទ្យាសាស្ត្រ និងបច្ចេកវិទ្យា មានសារសំខាន់ក្នុងការអភិវឌ្ឍជាតិ។ តួយ៉ាង ប្រទេសមានការអភិវឌ្ឍខ្ពស់នៅលើពិភពលោក ដែលបានរកឃើញផ្នែកវិទ្យាសាស្ត្រច្រើន ធ្វើឱ្យគេទទួលបានការវាយតម្លៃថា ជាប្រទេសមហាអំណាចពិភពលោក ។ វិទ្យាសាស្ត្រ និងបច្ចេកវិទ្យានេះ គឺជាចលករសំខាន់សម្រាប់ការអភិវឌ្ឍប្រទេសជាតិ ។
បើយោងតាមរបាយការណ៍របស់គេហទំព័រ ក្រសួងផែនការឱ្យដឹងថា វិទ្យាសាស្ត្រ និងបច្ចេកវិទ្យាមានសារសំខាន់យ៉ាងខ្លាំងក្នុងការអភិវឌ្ឍជាតិ ដោយគ្មានជាតិសាសន៍ណាអាចអភិវឌ្ឍន៍ដោយមិនចាំបាច់មានវិទ្យាសាស្ត្រ និងបច្ចេកវិទ្យាទេ មិនថាជាតិសាសន៍នោះត្រូវបានប្រទានឲ្យនូវធនធានធម្មជាតិសម្បូរស្ដុកស្តម្ភក៏ដោយ ។
តើវិទ្យាសាស្ត្រ និងបច្ចេកវិទ្យា គឺជាអ្វី? វិទ្យាសាស្ត្រ គឺជាការសិក្សាឈ្វេងយល់ដោយពឹងផ្អែកលើការពិនិត្យ និងការធ្វើតេស្តសាកល្បងរកការពិតផ្ដល់ជាចំណេះដឹង ដែលអាចត្រូវបានប្រើប្រាស់ក្នុងការរៀបចំជាប្រព័ន្ធមួយសម្រាប់បម្រើប្រយោជន៍មនុស្សជាតិ ។ រីឯបច្ចេកវិទ្យា គឺជាការអនុវត្តជាក់ស្តែងពីចំណេះដឹងនៃវិទ្យាសាស្ត្រ ។
របាយការណ៍ដដែលគូសបញ្ជាក់ថា ៖ «ប្រទេសជាតិដែលមានការអភិវឌ្ឍខ្ពស់លើពិភពលោក ដូចជា សហរដ្ឋអាមេរិក អាល្លឺម៉ង់ និងបារាំង ។ល។ មានមោទនភាពដោយការរកឃើញផ្នែកវិទ្យាសាស្ត្រជាច្រើន ដែលធ្វើឱ្យគេត្រូវបានវាយតម្លៃថា ជាមហាអំណាចពិភពលោក។ វិទ្យាសាស្ត្រ និងបច្ចេកវិទ្យា គឺជាចលករនៃការអភិវឌ្ឍរបស់ប្រទេសជាតិ ។ ជាតិមួយដែលគ្មានវិទ្យាសាស្ត្រ និងបច្ចេកវិទ្យា ឬត្រូវពឹងផ្អែកលើវិទ្យាសាស្ត្រ និងបច្ចេកវិទ្យានៃប្រទេសដទៃ គឺជាជាតិសាសន៍ដើរតោងក្រោយគេ ហើយបើមានឯករាជ្យ ក៏ត្រឹមតែសម្បកក្រៅប៉ុណ្ណោះ ។ ជាតិសាសន៍នេះនឹងត្រូវបានចាត់ទុកថា មិនអភិវឌ្ឍន៍ » ។
វិទ្យាសាស្ត្រ និងបច្ចេកវិទ្យាផ្សារភ្ជាប់ជាមួយទំនើបកម្ម ហើយវាគឺជាឧបករណ៍សំខាន់សម្រាប់ការអភិវឌ្ឍឲ្យបានឆាប់រហ័ស ។ ឧបករណ៍ទំនើបសម្រាប់សម្រួលកិច្ចការ និងការរស់នៅរបស់មនុស្ស គឺជាលទ្ធផលនៃការរកឃើញនៃវិទ្យាសាស្ត្រ និងបច្ចេកវិទ្យា ។ អគ្គិសនី យន្តហោះ ទូរស័ព្ទ ទូរទស្សន៍ កុំព្យូទ័រ និងម៉ាស៊ីនដទៃទៀត មិនអាចត្រូវបានបង្កើតដោយគ្មានការរកឃើញនៃវិទ្យាសាស្ត្រ និងបច្ចេកវិទ្យាឡើយ ។
របាយការណ៍បន្តថា វិទ្យាសាស្ត្រ និងបច្ចេកវិទ្យា ក៏មានសារសំខាន់ខ្លាំងផងដែរក្នុងការផលិតថ្នាំ និងការព្យាបាលជំងឺ ។ ប្រទេសជាតិមួយដែលខ្វះវិទ្យាសាស្ត្រ និងបច្ចេកវិទ្យាចាំបាច់នៅក្នុងវិស័យនេះ នឹងត្រូវពឹងផ្អែកលើប្រទេសអភិវឌ្ឍផ្សេងទៀតសម្រាប់អាទិភាពនៃប្រជាជនរបស់ខ្លួន ។ ប្រទេសមួយបែបនេះមិនអាចត្រូវបានគេចាត់ទុកថា ឯករាជ្យទេ ព្រោះត្រូវអាស្រ័យតាមតែការគិតឃើញនៃប្រទេសផ្សេងទៀត ដែលមានវិទ្យាសាស្ត្រ និងបច្ចេកវិទ្យាចាំបាច់ដើម្បីរស់នឹងគេ ។ ការអភិវឌ្ឍនៃប្រទេសមួយអាស្រ័យលើវិទ្យាសាស្ត្រ និងបច្ចេកវិទ្យា ដែលជាតិសាសន៍នៃប្រទេសនោះមាន ឬត្រូវរង់ចាំគេផ្តល់ឲ្យ ។ ប្រជាជាតិមានភាពរឹងមាំ និងខ្លាំងក្លា គឺមានបច្ចេកវិទ្យាគ្រប់គ្រាន់ដើម្បីធ្វើឱ្យប្រជាជនរបស់ខ្លួនមានផាសុកភាព និងអានុភាព ។ ប្រទេសជាតិដែលគ្មានវិទ្យាសាស្ត្រ និងបច្ចេកវិទ្យា ក៏មិនអាចចិញ្ចឹមប្រជាជនរបស់ខ្លួនបានដោយសារតែវិស័យកសិកម្មដែរ គឺត្រូវការវិទ្យាសាស្ត្រ និងបច្ចេកវិទ្យាសម្រាប់ផលិតម្ហូបអាហារឲ្យបានគ្រប់គ្រាន់ ។
ទាក់ទងនឹងបញ្ហានេះ សម្រាប់កម្ពុជា របាយការណ៍សង្កត់ធ្ងន់ថា ៖ « កម្ពុជាវាយតម្លៃខ្ពស់ចំពោះដៃគូអភិវឌ្ឍន៍របស់ខ្លួន ក្នុងការចែករំលែកវិទ្យាសាស្ត្រ និងបច្ចេកវិទ្យា និងជួយដល់ការអភិវឌ្ឍសេដ្ឋកិច្ច-សង្គម ក្នុងបំណងជម្នះពេលវេលាដែលត្រូវបានខ្ជះខ្ជាយក្នុងរយៈពេលសោកនាដកម្មរបស់ខ្លួន ។ អាស្រ័យដោយធនធានមានកម្រិត វាមានសារសំខាន់ណាស់ដែលការអភិវឌ្ឍនៃវិទ្យាសាស្ត្រ និងបច្ចេកវិទ្យា ត្រូវមានកិច្ចខិតខំប្រឹងប្រែងព្រមគ្នា និងផ្តោតលើទិសដៅរួមមួយ ។ ក្នុងន័យនេះ កម្ពុជាវាយតម្លៃខ្ពស់ចំពោះការគាំទ្រនៃសាធារណរដ្ឋកូរ៉េ ដែលជួយដល់ការអភិវឌ្ឍផែនការមេជាតិវិទ្យាសាស្ត្រ និងបច្ចេកវិទ្យា ឆ្នាំ២០១៤-២០២០ ដោយផ្តោតទៅលើការបង្កើតឲ្យមានប្រព័ន្ធជាមូលដ្ឋានគ្រឹះនៃវិទ្យាសាស្ត្រ និងបច្ចេកវិទ្យា, ធ្វើឲ្យកាន់តែសកម្មនូវបរិយាកាសនៃវិទ្យាសាស្ត្រ និងបច្ចេកវិទ្យា, បង្កើតឲ្យមានសមត្ថភាពស្រាវជ្រាវ និងអភិវឌ្ឍន៍ ព្រមទាំងពង្រឹងសមត្ថភាពឧស្សាហកម្មស្នូលផ្អែកលើវិទ្យាសាស្ត្រ និងបច្ចេកវិទ្យាជាមូលដ្ឋាន » ៕
ចែករំលែកព័តមាននេះ