រាជធានីភ្នំពេញ ៖ ក្នុងរយៈពេលចុងក្រោយនេះ គេបានកត់សម្គាល់ឃើញថា ក្រសួងសាធារណការ និងដឹកជញ្ជូន បានធ្វើប្រតិភូកម្មផ្ទេរ និងទម្លាក់ការងារមួយចំនួនជាបន្តបន្ទាប់ពីក្រសួង ឬមន្ទីរគ្រប់រាជធានី ខេត្ត របស់ខ្លួនទៅឲ្យរដ្ឋបាលរាជធានី ខេត្ត ដើម្បីអនុវត្តបន្ត ព្រមទាំងបានប្រគល់សិទ្ធិឲ្យវិស័យឯកជនមួយចំនួនផងដែរ។ ជាក់ស្តែងកាលពីពេលថ្មីៗកន្លងមកនេះ ការផ្តល់ ឬលក់ និងធ្វើស្លាកលេខរថយន្ត ត្រូវបានទម្លាក់ទៅឲ្យដេប៉ូលក់ឡានដែលមិនមានជំនាញច្បាស់លាស់ ចំណែកការលក់លេខវិញបើកលក់តាមប្រពន្ធ័អនឡាញ(វីង) ដែលមានតម្លៃគុណទ្វេរដង រីឯការធ្វើស្លាកលេខម៉ូតូវិញ ក៏ត្រូវបានទម្លាក់ឲ្យអាជ្ញាធរ ក្រុង ស្រុក ខណ្ឌ តាមរយៈច្រកចេញចូលតែមួយ ហើយពេលនេះ ក្រសួងគ្រោងទម្លាក់ការធ្វើប័ណ្ណបើកបរទៅឲ្យអាជ្ញាធររាជធានី ខេត្តជាបន្តទៅទៀត។
ការផ្ទេរ ឬទម្លាក់ការងារមួយចំនួនខាងលើនេះ បានធ្វើឲ្យមន្ត្រីសាធារណការថ្នាក់មន្ទីរ ស្ទើរគ្រប់រាជធានី ខេត្ត ដែលធ្លាប់ធ្វើការងារនេះមានការថ្នាំងថ្នាក់ផងដែរ។ មន្ត្រី ក្រសួងសាធារណការ និងដឹកជញ្ជូន បានឲ្យកោះសន្តិភាពដឹងថា ពេលនេះក្រសួងបាន និងកំពុងធ្វើពង្រាងសេចក្តីប្រកាសមួយស្ដីពីការធ្វើប្រតិភូកម្មមុខងារការប្រឡង ការប្តូរប័ណ្ណបើកបរយានយន្តប្រភេទ«ក»និង«ខ»សម្រាប់ប្រជាពលរដ្ឋខ្មែរតាមប្រព័ន្ធស្វ័យប្រវត្តិកម្ម ផ្តល់ប័ណ្ណបើកបរយានយន្តឱ្យទៅដល់រដ្ឋបាលរាជធានី ខេត្តទូទាំងប្រទេស ។ ចំពោះមុខងារដែលត្រូវបានធ្វើប្រតិភូកម្ម ពីក្រសួងសាធារណការ និងដឹកជញ្ជូន ទៅឱ្យដល់រដ្ឋបាលរាជធានី ខេត្តរួមមានសកម្មភាពសំខាន់ៗរួមមាន៖ ការប្រឡងយកប័ណ្ណបើកបរទោចក្រយានយន្តប្រភេទ«ក» ការប្រឡងយកប័ណ្ណបើកបររថយន្តប្រភេទ«ខ» ការប្តូរប័ណ្ណបើកបរទោចក្រយានយន្តប្រភេទ«ក» និងការប្តូរប័ណ្ណបើកបររថយន្តប្រភេទ«ខ»។
មន្ត្រីដដែល បានបន្តទៀតថា និតិវិធីនៃការគ្រប់គ្រង និងបច្ចេកទេសនៃការអនុវត្តមុខងារដែលបានធ្វើប្រតិភូកម្មនេះត្រូវអនុវត្តតាមការកំណត់របស់ក្រសួងសាធារណការ និងដឹកជញ្ជូន ហើយក្រសួងទទួលខុសត្រូវក្នុងការរៀបចំកំណត់បទដ្ឋានបច្ចេកទេស ការណែនាំ ការផ្សព្វផ្សាយ និងការបណ្តុះបណ្តាលដល់មន្ត្រីអនុវត្តមុខងារដែលបានធ្វើប្រតិភូកម្មនេះ ព្រមទាំងតាមដាន ត្រួតពិនិត្យ សម្របសម្រួលប្រតិបត្តិការផ្តល់សេវាផ្តល់ប័ណ្ណបើកបរយានយន្ត និងវាយតម្លៃការអនុវត្តមុខងារនេះដោយមានកិច្ចសហការជាមួយក្រសួង ស្ថាប័នពាក់ព័ន្ធ។ មន្ត្រី រូបនេះ បានឲ្យដឹងទៀតថា ការធ្វើប្រតិភូកម្ម ប័ណ្ណបើកបររថយន្តនេះ មន្ទីរសាធារណការ និងដឹកជញ្ជូនរាជធានី ខេត្ត មានតួនាទីជាសេនាធិការឱ្យរដ្ឋបាលរាជធានី ខេត្តក្នុងការអនុវត្តមុខងារ ដោយត្រូវចាត់តាំងមន្ត្រីជំនាញដែលមានសមត្ថភាពសមស្រប ដើម្បីជួយគាំទ្រផ្នែកបច្ចេកទេសដល់រដ្ឋបាលថ្នាក់ក្រោមជាតិ និងរៀបចំរបាយការណ៍ទៀងទាត់អំពីស្ថានភាពនៃការអនុវត្តមុនងារជូនក្រសួងសាធារណៈការ និងដឹកជញ្ជូន។
ចំណែករដ្ឋបាលរាជធានី ខេត្ត ត្រូវផ្តល់របាយការណ៍ពាក់ព័ន្ធនឹងស្ថិតិនៃការប្រឡងការប្តូរប័ណ្ណបើកបរយានយន្តប្រភេទ«ក»និង«ខ» សម្រាប់ប្រជាពលរដ្ឋខ្មែរ ប្រចាំខែ ប្រចាំត្រីមាស ប្រចាំឆមាស និងប្រចាំឆ្នាំ ជូនក្រសួងសាធារណការ និងដឹកជញ្ជូន។ មន្ត្រីដដែល បានបញ្ជាក់ថា ការប្រឡង ការប្តូរប័ណ្ណបើកបរយានយន្តត្រូវបង់កម្រៃសេវាសាធារណៈតាមការកំណត់ក្នុងប្រកាសរួមរបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងសាធារណៈការ និងដឹកជញ្ជូនចាប់ពីពេលចុះហត្ថលេខា តទៅ៕
ចែករំលែកព័តមាននេះ