ខេត្តកណ្តាល ៖ ហេតុការណ៍គ្រោះថ្នាក់ចរាចរណ៍ដ៏រន្ធត់មួយរវាងរថយន្តច្នៃដឹកដីបុករថយន្តកុងតឺន័រពីក្រោយពេញទំហឹង បណ្តាលឲ្យមនុស្ស២នាក់កៀបជាប់នៅក្នុងរថយន្តដឹកដីដាច់ខ្យល់ស្លាប់យ៉ាងអាណោចអាធ័ម កាលពីវេលាម៉ោង៩ និង៤៥នាទីយប់ ថ្ងៃទី១៥ ខែកក្កដា ឆ្នាំ២០១៧ នៅលើកំណាត់ផ្លួវជាតិលេខ១ ត្រង់ចំណុចជិតផ្លូវបត់ចូលកំពង់ផែស្វយ័តភ្នំពេញថ្មី ចន្លោះគីឡូម៉ែត្រលេខ២៩-៣០ ស្ថិតក្នុងភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្ដកណ្ដាល។
ប្រភពព័ត៌មាននិយាយថា មុនពេលកើតហេតុគេឃើញរថយន្តកុងតឺន័រម៉ាកDONGFENG.KININD ពណ៌សពាក់ផ្លាកលេខ ភ្នំពេញ 3C-9060បើកបរក្នុងទិសដៅភ្នំពេញ.អ្នកលឿង លុះមកដល់ចំណុចខាងលើផ្លូវមានស្ថានភាពចង្អៀតក៏បានបន្ថយល្បឿនស្រាប់តែរថយន្តកែច្នៃបែនដឹកដីពណ៌ខៀវគ្មានផ្លាកលេខ បើកបរស្របទិសគ្នាជាន់ហ្វ្រាំងមិនទាន់បុកពីក្រោយ(រថយន្តកុងតឺន័រ)ពេញទំហឹង បណ្តាលឲ្យរួញកៀបជាប់មនុស្ស២នាក់កៀបជាប់ដាច់ខ្យល់ស្លាប់នៅក្នុងរថយន្តបែនដឹកដីមួយរំពេច។ ជនរងគ្រោះទាំង២នាក់ដែលស្លាប់នោះ ទី១.ឈ្មោះ លន់ ទិត្យភេទប្រុស អាយុ២២ឆ្នាំ និងទី២.ឈ្មោះ មាន សំបាន ភេទប្រុស អាយុ២៥ឆ្នាំ មានទីលំនៅភូមិជ្រោយដងឃុំសំរោងធំ ស្រុកកៀនស្វាយ ជាមួយគ្នា។
ចំណែកតៃកុងរថយន្តបែនដឹកដី និងតៃកុងរថយន្តកុងតឺន័រមិនស្គាល់អត្តសញ្ញាណទេបានរត់គេចខ្លួនបាត់ស្រមោលមុនពេលសមត្ថកិច្ចចុះទៅដល់។ ក្រោយទទួលបានព័ត៌មានកម្លាំងនគរបាលប៉ុស្តិ៍សហការជាមួយមន្ត្រីជំនាញចុះធ្វើការវាស់វែងយករថយន្តទាំង២គ្រឿងទៅកាន់អធិការដ្ឋាននគរបាលស្រុកកសាងសំណុំរឿងចាត់ការតាមនីតិវិធីច្បាប់ចរាចរណ៍ផ្លួវគោក។ រីឯសពជនរងគ្រោះទាំង២នាក់ សមត្ថកិច្ចបានធ្វើកំណត់ហេតុប្រគល់ជូនក្រុមគ្រួសារដឹកយកទៅធ្វើបុណ្យតាមប្រពៃណី។
ជាមួយគ្នានេះដែរ ប្រជាពលរដ្ឋរិះគន់ថា ត្រង់ចំណុចផ្លូវចូលកំពង់ផែស្វយ័តភ្នំពេញថ្មីនេះ តែងតែកើតមានករណីគ្រោះថ្នាក់ចរាចរណ៍បណ្តាលឲ្យមនុស្សស្លាប់ និងរបួសធ្ងន់ស្រាលជាញឹកញាប់ដោយសារតែរថយន្តកុងតឺន័រចេញ.ចូលដឹកទំនិញទាំងនោះ តៃកុងភាគច្រើនក្មេងស្ទាវៗបើកបរលឿនៗត្រូវបត់គឺបត់ភ្លាម គ្មានស៊ីញ៉ូឲ្យសញ្ញាសូមផ្លូវនោះទេ ហើយជូនកាលឈប់ចតត្រៀបត្រា អនាធិបតេយ្យគ្មានសណ្តាប់ធ្នាប់ពាសពេញលើដងផ្លូវជាតិលេខ១ បង្កការលំបាកដល់អ្នកធ្វើដំណើរទាំងថ្ងៃទាំងយប់៕
ចែករំលែកព័តមាននេះ