អាគុយត្រូវបានចាត់ទុកជាកម្លាំងភ្លើងសំខាន់ក្នុងរថយន្ត ខណៈអ្នកខ្លះមិនសូវចាប់អារម្មណ៍វាប៉ុន្មានទេ ប៉ុន្តែពួកគេនឹងងាកមកចាប់អារម្មណ៍វិញ នៅពេលបញ្ឆេះរថយន្ដមិនឆេះ ។ និយាយដល់អាគុយនេះ អ្នកប្រើប្រាស់ទាំងរថយន្តចាស់ថ្មី តែងមានបញ្ហា រហូតអ្នកខ្លះមិនហ៊ានពន្លត់ទៀតផង ព្រោះខ្លាចអត់មានអ្នកជួយរុញ ហើយពេលខ្លះ ខណៈដែលខ្លួនកំពុងប្រញាប់ផង បែរជាបញ្ឆេះរថយន្ដមិនឆេះទៅវិញ ។ តើលោកអ្នកធ្លាប់ជួបទេ ?
បញ្ហាពាក់ព័ន្ធនឹងអាគុយនេះ មានរឿងជាច្រើនដូចជា ការអន់ថយនៃគុណភាពតាមអាយុកាលប្រើប្រាស់របស់វា ការមិនបានបន្ថែមទឹកចម្រោះ ទឹកចម្រោះស្ងួត ។ល។ ហើយពេលខ្លះយើងគិតខ្លួនឯងថា វាខូចប្រើការមិនបានទៀតជាដើម ។
អាគុយកខ្វក់អាចធ្វើឲ្យការបើកបររបស់លោកអ្នកត្រូវប៉ះទង្គិច កម្លាំងមិនខ្លាំង ពិបាកបញ្ឆេះ ពិសេសរថយន្តចាស់ៗ ។ ការបន្ថែមទឹករហូតដល់ហូរហៀរ នៅពេលទឹកចម្រោះហៀរចូលក្នុងអាគុយ វានឹងទៅកាត់បន្ទះផ្សេងៗនៅបរិវេណនោះ ហើយនៅពេលទឹកចម្រោះចូលកាត់ជាញឹកញាប់ នឹងធ្វើឲ្យកើតភាពកខ្វក់ មានស្នាមកកពណ៌សនៅជាប់ក្បាលអាគុយបណ្តាលឲ្យចរន្តភ្លើងពិបាកឆ្លងកាត់ ។
បើកើតហេតុការណ៍បែបនេះឡើងមក យើងមកមើលវិធីសម្អាតអាគុយឲ្យដំណើរការជាធម្មតា និងត្រៀមឧបករណ៍ដូចជា ៖
១-កូនសោមួលខ្ចៅក្បាលអាគុយ (លេខតាមខ្នាតប្រើជាមួយខ្ចៅរឹបអាគុយ) ។
២-ច្រាសដុសធ្មេញឈប់ប្រើ ឬច្រាសសម្អាតផ្សេងៗ ។
៣-ទឹកក្តៅប្រមាណ១លីត្រ ឬសូដា១ដប ។
៤-ក្រដាសខាត់ផ្សេងៗ (លេខ២០០-៥០០) ១ផ្ទាំង ។
៥-ក្រណាត់ស្អាត១ដុំ ។
វិធីសម្អាត ៖
១-ប្រើកូនសោមួលខ្ចៅត្រង់ក្បាលអាគុយ ដោយប្រយ័ត្នកុំឲ្យសញ្ញាបូក និងដកប៉ះគ្នា បើមិនដូច្នោះទេ នឹងធ្វើឲ្យ Fuse (ហ្វុយស៊ីប) របស់រថយន្តឆក់បាន ។
២-យកច្រាសមកជូត ឬខាត់សម្អាតដើម្បីឲ្យកំណកពណ៌សជ្រះចេញអស់ ហើយការដុសខាត់ ចូរប្រើទឹកក្តៅ ឬសូដាចាក់ចូលទៅផង ។
៣-ប្រើក្រណាត់ជូតឲ្យស្អាត និងមើលថា មានស្នាមពណ៌សនៅសេសសល់ឬទេ បើមានចូរដុសខាត់ជាថ្មីម្តងទៀត រហូតដល់ស្អាតទាំងអស់ ។
៤-ប្រើក្រដាសរឹងខាត់ពីលើអាគុយថ្នមៗប្រមាណ២នាទី បន្ទាប់មកប្រើក្រណាត់ជ្រលក់ទឹកថ្មីៗមកជូតជម្រះឲ្យស្អាត ។
៥-យកអាគុយដាក់នៅកន្លែងដើម និងមួលខ្ចៅរឹតឲ្យតឹងដៃ ។
គ្រាន់តែធ្វើដូចនេះ អាគុយរបស់អ្នកនឹងអាចប្រើការបានដូចធម្មតា ប៉ុន្តែបើសម្អាតហើយនៅតែបញ្ឆេះមិនឆេះទៀត សូមយកវាទៅពិនិត្យនៅហាងអាគុយម្តងទៀត ឬដូរចេញតែម្ដង កុំឲ្យយូរការ៕
ចែករំលែកព័តមាននេះ