យោងតាមសេចក្តីរាយការណ៍ពីការសែតអាមេរិកមួយបានឲ្យដឹងថា ការកើនឡើងយ៉ាងលឿននៃតម្រូវការប្រេងពិភពលោក និងការកាត់បន្ថយការផ្គត់ផ្គង់ពីអង្គការប្រទេសនាំចេញប្រេងOPECអាចនឹងជំរុញឲ្យតម្លៃប្រេងឆៅកើនឡើងដល់៦០ដុល្លារក្នុងមួយធុងមុនដំណាច់ឆ្នាំនេះ ។
សេចក្តីរាយការណ៍ខាងលើបានលើកឡើងពីការស្រាវជ្រាវរបស់លោក Eric Lee ជាឧត្តមអ្នកវិភាគថាមពលពីក្រុមហ៊ុន Citigroup ។
លោកLeeបានព្យាករណ៍ថា នឹងមានតម្រូវការប្រេងប្រមាណ៩៧,៣លានធុងក្នុងមួយថ្ងៃនាឆ្នាំ២០១៧នេះ ច្រើនជាងឆ្នាំ២០១៦ ដែលស្មើតែ៩៦លានធុងក្នុងមួយថ្ងៃ ។ លោកបានអះអាងថា ការកើនឡើងនេះគឺមកពីទីផ្សារកំពុងលូតលាស់យ៉ាងលឿនដូចជាប្រទេសចិន និងឥណ្ឌា ។ ជាមួយគ្នានេះដែរ ការកាត់បន្ថយការផ្គត់ផ្គង់ពីOPECប្រមាណ០,៧លានធុងក្នុងមួយថ្ងៃអាចនឹងជំរុញឲ្យតម្លៃកើនឡើង មុនចុងបញ្ចប់ត្រីមាសទី៤នាឆ្នាំនេះ ។
ការធ្លាក់ចុះនៃប្រេងដែលស្តុកទុកលើពិភពលោកបានចាប់ផ្តើមក្នុងត្រីមាសទី១ ហើយលោកLeeបានព្យាករណ៍ថា វានឹងបន្តក្នុងល្បឿនលឿនជាងមុនរហូតដល់ចុងឆ្នាំនេះ ។
តម្លៃប្រេងបានធ្លាក់ចុះ៣%កាលពីថ្ងៃសុក្រ ព្រោះតែមានការបង្កើនផលិតកម្មក្នុងសហរដ្ឋអាមេរិក និងមានការកើនឡើងនៃការនាំចេញរបស់OPECដែលផ្តល់ជាភាពមិនប្រាកដប្រជាលើការខិតខំប្រឹងប្រែងរបស់អ្នកផលិតក្នុងការកាត់បន្ថយការផ្គត់ផ្គង់។ កាលពីថ្ងៃសុក្រ ទិន្នន័យរបស់Reutersបានបង្ហាញថា ផលិតកម្មរបស់OPECក្នុងពេលបច្ចុប្បន្ននេះ គឺស្ថិតក្នុងកម្រិតខ្ពស់ជាងគេក្នុងឆ្នាំនេះផងដែរ ។
លោក Matt Smith នាយកផ្នែកស្រាវជ្រាវពីផលិតផលនៃក្រុមហ៊ុនClipperdata បាននិយាយថា ការនាំចេញរបស់OPEC កើនឡើង ២លានធុងក្នុងមួយថ្ងៃ បើធៀបនឹងខែមិថុនាឆ្នាំ ២០១៦ ទោះបីជាមានការបន្តការកាត់បន្ថយផលិតកម្មប្រេង១,៨លានធុងក្នុងមួយថ្ងៃរបស់ OPECក៏ដោយ ។
លោក Lee បានធ្វើការកត់សម្គាល់ថា អ្នកព្យាករណ៍ប្រេងមិនបានមើលទៅលើកិច្ចព្រមព្រៀងរបស់OPECដែលបញ្ជាឲ្យមានការកាត់បន្ថយផលិតកម្មក្នុងចុងឆ្នាំ២០១៦ មិនមែនចាប់ពីពេលដែលការព្រមព្រៀងបានប្រកាសទេ។ ការធ្វើដូច្នេះ អនុញ្ញាតឲ្យអ្នកចូលរួមបង្កើនផលិតកម្មក្នុងអំឡុងពេលចរចា មានន័យថា វានឹងចាប់ផ្តើមដោយមានការផលិតច្រើន ។
សម្រាប់ការផ្គត់ផ្គង់ពីសហរដ្ឋអាមេរិកវិញ លោកLeeបាននិយាយថា ការបន្តផលិតកម្មនៃនឹងបន្តរក្សាមិនឲ្យតម្លៃកើនដល់១០០ដុល្លារក្នុងមួយធុង ប៉ុន្តែវត្តមានរបស់ពួកគេប្រហែលជាមិនអាចរារាំងការកើនឡើងនៃតម្លៃប្រេងក្នុងឆ្នាំនេះបានឡើយ ។
បន្ទាប់ពីមានការកើនឡើងដល់៦០ដុល្លារក្នុងមួយធុង លោកLeeគិតថា តម្លៃប្រេងនឹងបន្តមានភាពថេររហូតដល់ឆ្នាំ២០១៨ ព្រោះតែការផ្គត់ផ្គង់ជួបជាមួយនឹងតម្រូវការវិញ ។ ម្យ៉ាងទៀត ដោយសារតែមានបញ្ហានយោបាយធំៗក្នុងប្រទេសផលិតប្រេង លោកគិតថាតម្លៃប្រេងប្រហែលជាមិនអាចកើនឡើងច្រើនហួសពី៦០ដុល្លារក្នុងមួយធុងឡើយ ៕
ចែករំលែកព័តមាននេះ