ទិន្នន័យរបស់រដ្ឋាភិបាលបានបង្ហាញកាលពីថ្ងៃពុធថា ការទិញទំនិញអនឡាញតាមទូរស័ព្ទស្មាតហ្វូន បានឈានដល់កម្រិតខ្ពស់ក្នុងខែឧសភា ដោយសារមនុស្សកាន់តែច្រើនស្ទាត់ជំនាញប្រើប្រាស់
ប្រទេសកូរ៉េខាងត្បូង ៖ ទិន្នន័យរបស់រដ្ឋាភិបាលបានបង្ហាញកាលពីថ្ងៃពុធថា ការទិញទំនិញអនឡាញតាមទូរស័ព្ទស្មាតហ្វូន បានឈានដល់កម្រិតខ្ពស់ក្នុងខែឧសភា ដោយសារមនុស្សកាន់តែច្រើនស្ទាត់ជំនាញប្រើប្រាស់ឧបករណ៍ឥតខ្សែ ។
យោងតាមទិន្នន័យរបស់ស្ថិតិកូរ៉េឱ្យដឹងថា ប្រតិបត្តិការលក់តាមរយៈទូរស័ព្ទដៃទំនើប និងថេបប្លេត បានកើនឡើង៣,៣ប៊ីលានដុល្លារកាលពីខែឧសភា កើនឡើង៣៧,៩% បើធៀបនឹងរយៈពេលដូចគ្នាឆ្នាំមុន ។ វាកើនលើសការជួញដូរនៅខែមីនា ស្មើតែ៣,២ប៊ីលានដុល្លារ។ ចំណែកទឹកប្រាក់សរុបសម្រាប់ប្រតិបត្តិការតាមអនឡាញស្មើ៥,៤ប៊ីលានដុល្លារ ក្នុងអត្រា៦០,៧% ។
ការទិញទូរស័ព្ទចល័តនៅកូរ៉េខាងត្បូង បានកើនឡើងយ៉ាងខ្លាំងអស់រយៈពេលជាច្រើនឆ្នាំមកហើយ ដោយសារពលរដ្ឋប្រទេសនេះនិយមប្រើប្រាស់ឧបករណ៍ទំនើបកាន់តែខ្លាំងឡើង ។
ការកក់សំបុត្រធ្វើដំណើរ និងសំបុត្រកុនតាមទូរស័ព្ទបានកើនឡើង១៥,២%ក្នុងខែឧសភា ស្មើ៤៣៧លានដុល្លារ ខណៈការលក់ និងការចែកចាយម្ហូបអាហារកើនឡើង៦០,៦%ក្នុងរយៈពេល១ឆ្នាំ ស្មើ៤៨៦លានដុល្លារ ។
ការលក់ទំនិញអនឡាញដូចជា សម្លៀកបំពាក់បានកើនឡើង៣៨,៧% ស្មើ៣៩០លានដុល្លារ ចំណែកគ្រឿងសម្អាងស្មើ២៧៩លានដុល្លារ កើនឡើង២៦,៧%បើធៀបនឹងឆ្នាំមុន ៕
ចែករំលែកព័តមាននេះ