រាជធានីភ្នំពេញ ៖ យោងតាមហ្វេសប៊ុកផ្លូវការរបស់អ្នកនាងពេជ្រ ខេនឌី ដែលជាម្ចាស់ភោជនីយដ្ឋាន «គុនល្បុក្កតោក្លិប» បានបង្ហោះវីដេអូឃ្លីបជាច្រើនបង្ហាញថា ទូរទស្សន៍ល្បីៗរបស់ប្រទេសចិនកំពុងផ្សព្វផ្សាយពី
រាជធានីភ្នំពេញ ៖ យោងតាមហ្វេសប៊ុកផ្លូវការរបស់អ្នកនាងពេជ្រ ខេនឌី ដែលជាម្ចាស់ភោជនីយដ្ឋាន «គុនល្បុក្កតោក្លិប» បានបង្ហោះវីដេអូឃ្លីបជាច្រើនបង្ហាញថា ទូរទស្សន៍ល្បីៗរបស់ប្រទេសចិនកំពុងផ្សព្វផ្សាយពីក្បាច់គុនល្បុក្កតោខ្មែរ ជាពិសេសគឺសកម្មភាពប្រកួត និងសម្ដែងនៅក្នុងភោជនីយដ្ឋានរបស់នាងដែលស្ថិតក្នុងទឹកដីខេត្តសៀមរាបនេះតែម្ដង ។ វីដេអូឃ្លីបទាំងនោះត្រូវបានអ្នកនាងបញ្ជាក់ថា គឺភាគីទូរទស្សន៍ចិនបានសុំសិទ្ធិចុះមកផលិតជាឯកសារនោះផង ទើបធ្វើឱ្យកីឡាករល្បុក្កតោខ្មែរកាន់តែទទួលបានការចាប់អារម្មណ៍។
អ្នកនាងខេនឌី និយាយថា ដោយសារតែស្វាមីនាងជាជនជាតិចិន ហើយមានទំនាក់ទំនងច្រើនជាមួយផលិតករចិន ទើបធ្វើឱ្យប៉ុស្តិ៍ទូរទស្សន៍ល្បីរបស់ចិនចាប់អារម្មណ៍ចុះមកផលិតវីដេអូឃ្លីបជាហូរហែពាក់ព័ន្ធនឹងសកម្មភាពសម្ដែង និងការប្រកួតល្បុក្កតោនៅក្នុងហាងរបស់នាងដើម្បីយកទៅផ្សព្វផ្សាយនៅក្នុងប្រទេសចិន។
CCUV ដែលត្រូវគេស្គាល់ថាជាប៉ុស្ដិ៍ទូរទស្សន៍ដ៏ល្បីរបស់ចិនបានចាក់ឃ្លីបដែលពួកគេផលិតជាខ្លឹមសាររឿងផង ជាវីដេអូប្រូម៉ូតផង ដើម្បីឱ្យប្រជាជនចិនបានស្គាល់ពីក្បាច់គុនល្បុក្កតោខ្មែរកាន់តែច្រើនឡើង ។ នៅក្នុងវីដេអូឃ្លីបក៏មានដាក់ភ្ជាប់នឹងពុទ្ធសាសនាខ្មែរ និងពាក្យថា ប្រទេសកម្ពុជា ប្រជាជនកម្ពុជាផងដែរ ទើបធ្វើឱ្យនាងមានមោទនភាពដែលកីឡាមួយប្រភេទរបស់ខ្មែរត្រូវបានប្រទេសចិនចាប់អារម្មណ៍មកផលិតជាវីដេអូហើយយកទៅផ្សព្វផ្សាយនៅក្នុងប្រទេសរបស់គេដែលមានប្រជាជនជាង១ពាន់លាននាក់ ។ អ្នកនាងថា ទូរទស្សន៍ចិនមិនងាយចាប់អារម្មណ៍ចុះមកផលិតពីអ្វីដែលជាវប្បធម៌របស់ជាតិសាសន៍ដទៃ ហើយយកទៅផ្សាយដដែលៗជាសាធារណៈបែបនេះមិនខុសពីជួយលើកតម្កើងល្បុក្កតោខ្មែរបង្ហាញដល់អន្តរជាតិនោះទេ ។
អ្នកនាងថា ក្រោយការដាក់បង្ហាញនៅលើកញ្ចក់ទូរទស្សន៍ចិនមួយនេះ ធ្វើឱ្យហាងរបស់នាងកាន់តែសំបូរភ្ញៀវចូលទស្សនាច្រើនឡើងរៀងរាល់ថ្ងៃសម្ដែង និងថ្ងៃប្រកួត ជាពិសេសគឺភ្ញៀវជនជាតិចិនដោយសារតែទូរទស្សន៍មួយនេះ ក្រៅពីអាចទស្សនាបាននៅក្នុងប្រទេសចិន ក៏អាចទស្សនាបានប្រព័ន្ធខ្សែកាបនៅច្រើនប្រទេសផងដែរ ។ អ្នកនាងប្រកាសថា មិនបានចំណាយលុយក្នុងការផ្សព្វផ្សាយពីហាងនិងពីសកម្មភាពល្បុក្កតោក្នុងហាងរបស់ខ្លួនឱ្យប៉ុស្ដិ៍ទូរទស្សន៍ចិន CCUV នោះទេ ដោយសារតែនាងយល់ថា ហាងដែលនាងដំណើរការគឺត្រូវទាក់ទាញតែភ្ញៀវជាតិ និងអន្តរជាតិ ដែលស្ថិតនៅក្នុងប្រទេសកម្ពុជាប៉ុណ្ណោះ ។ នាងបញ្ជាក់ថា បើខ្លួនចង់ផ្សាយគឺពិតជាផ្សាយនៅលើកញ្ចក់ទូរទស្សន៍ក្នុងស្រុកដោយមិនចំណាយផ្សព្វផ្សាយលើកញ្ចក់ទូរទស្សន៍ក្រៅស្រុកនោះទេ ។ ក្រោយការផ្សព្វផ្សាយនៅក្នុងប៉ុស្ដិ៍ទូរទស្សន៍ចិន ខាងលើគឺមានផលិតកររបស់ទូរទស្សន៍ផ្សេងទៀតក៏ចាប់អារម្មណ៍សុំមកផលិតជាវីដេអូឃ្លីបផងដែរ ប៉ុន្តែមកពីមិនទាន់ច្បាស់លាស់ទើបមិនទាន់កំណត់ពេល ។ អ្នកនាងបានចាត់ទុកថា នេះជាជោគជ័យមួយដែលហាងរបស់នាងសម្រេចបាន ក្នុងពេលកន្លងមក គឺល្បុក្កតោត្រូវគេឃើញបង្ហាញខ្លួនតែក្នុងព្រឹត្តិការណ៍ចូលឆ្នាំ ឬបុណ្យទានធំៗ តែក្រោយពីមានវត្តមានហាងរបស់នាងក៏អាចទស្សនាបានគ្រប់ពេលរៀងរាល់សប្ដាហ៍ដោយមិនបាច់រង់ចាំដូចមុន ។ ទន្ទឹមនឹងភាពជោគជ័យ អ្នកនាងក៏ទទួលស្គាល់បញ្ហាដែលត្រូវដោះស្រាយជាមួយនឹងលោកតា សាន គឹមស៊ាន ជាបន្តទៀតដែរ ។ អ្នកនាងថា ខាងសហព័ន្ធតម្រូវឱ្យអ្នកនាង និងលោកតាចាប់ដៃគ្នាធ្វើការជាធម្មតាមិនឱ្យបែកបាក់សាមគ្គីគ្នានោះទេ ។ អ្នកនាងថា មកទល់ពេលនេះបញ្ហាប្រេះឆារវាងអ្នកនាង និងគ្រូក្បាច់គុនល្បុក្កតោសាន គឹម ស៊ាន មានភាពល្អប្រសើរជាងមុនឆ្ងាយហើយ ដោយនៅរង់ចាំតែបើកកិច្ចប្រជុំនៅចុងខែមិថុនានេះម្ដងទៀតប៉ុណ្ណោះ ដើម្បីបែងចែកតួនាទីគ្នាក្នុងការគ្រប់គ្រងយ៉ាងម៉េចឱ្យការបង្ហាញក្បាច់គុនល្បុក្កតោនៅក្នុងហាងរបស់នាងកាន់តែមានការរីកចម្រើន ។
អ្នកនាង ពេជ្រ ខេនឌី បានអះអាងថា ឱ្យតែដល់ថ្ងៃសម្ដែងល្បុក្កតោ និងការប្រកួតមកដល់ មានភ្ញៀវទាំងជាតិ និងអន្តរជាតិនៅខេត្តសៀមរាបសម្រុកចូលហាងសឹងតែគ្មានកន្លែងអង្គុយ ដោយនាងបានចាត់ទុកថា សមិទ្ធផលនេះមួយចំណែកបានពីការផ្សព្វផ្សាយដោយសារព័ត៌មានក្នុងស្រុក និងទូរទស្សន៍របស់ចិននោះផង ។ អ្នកនាងប្រកាសបង្កើនចំនួនកីឡាករប្រកួត និងបន្ថែមថ្ងៃសម្ដែងប្រសិនបើមានតម្រូវការ ដើម្បីឱ្យកីឡាករដែលបានហ្វឹកហាត់នៅក្នុងអាជីពមួយនេះកាន់តែមានទីផ្សារ និងមានប្រាក់ចំណូលទៀងទាត់បន្ថែមទៀតក្រោយមានកំណើនភ្ញៀវ ។ ក្នុងនោះប្រាក់កម្រៃក៏នឹងដំឡើងឱ្យទាំងអ្នកសម្ដែង ទាំងកីឡាករប្រកួត និងទាំងគណៈកម្មការផ្ដល់ពិន្ទុផងដែរដើម្បីមន្ត្រីពាក់ព័ន្ធ និងកីឡាករប្រកួតដោយផ្ទាល់កាន់តែមានកម្លាំងចិត្ត ។ អ្នកនាងថា មកទល់ថ្ងៃនេះចំនួនកីឡាករមិនគ្រប់សម្រាប់បើកប្រកួតឱ្យបានច្រើនថ្ងៃនោះទេ បើទោះជានាងបានចំណាយលុយប៉ាវសោហ៊ុយឱ្យកីឡាករនៅទូទាំងប្រទេសពិសេសគឺនៅខេត្តកំពង់ឆ្នាំងឱ្យឡើងមកប្រកួតច្រើនឡើងក៏ដោយ ។ អ្នកនាងទទូចឱ្យកីឡាករដែលមានចំណាប់អារម្មណ៍លើល្បុក្កតោទាក់ទងហ្វឹកហាត់ក្នុងហាងរបស់អ្នកនាង ដោយសារតែនៅក្នុងហាងអ្នកនាងក៏មានទីតាំង និងបើកបង្រៀនសិស្សដោយមិនគិតកម្រៃសម្រាប់សិស្សក្រីក្រ និងតម្រូវឱ្យបង់តិចតួចសម្រាប់សិស្សទូទៅ ក្នុងន័យលើកស្ទួយដល់ក្បាច់គុនល្បុក្កតោខ្មែរផងដែរ ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ធ្លាប់មានប្រសាសន៍ថា វត្តមានល្បុក្កតោក្នុងភោជនីយដ្ឋាន«គុនល្បុក្កតោក្លិប» កំពុងធ្វើឱ្យមានការចាប់អារម្មណ៍ក្នុងក្រសែភ្នែកភ្ញៀវជាតិ និងអន្តរជាតិ ដែលស្ថិតនៅតំបន់សៀមរាប ។ អ៊ីចឹងហើយទើបលោកក្នុងនាមសហព័ន្ធមានតែលើកទឹកចិត្ត និងជួយបន្ថែមលើផ្នែកបច្ចេកទេស ដើម្បីឱ្យដំណើរមួយនេះកាន់តែប្រសើរឡើង ៕
ចែករំលែកព័តមាននេះ