ខេត្តកណ្តាល ៖ លោក ចំរើន បញ្ញា អធិការរងទទួលផ្នែកព្រហ្មទណ្ឌក្រុងតាខ្មៅ និងលោក ឡុង បរិញ្ញា មន្ត្រីនគរបាលព្រហ្មទណ្ឌកំរិតស្រាលខេត្តកណ្តាលត្រូវបានប្រជាពលដ្ឋ៣នាក់ប្តឹងទៅអធិការកិច្ចក្រសួងមហាផ្ទៃពីបទ រារាំងមិនឲ្យប្រជាពលរដ្ឋរងគ្រោះដាក់ពាក្យបណ្តឹងទៅអធិការដ្ឋាន និងកសាងសំណុំរឿងបំភ្លៃខុសការពិត ។ ពលរដ្ឋរងគ្រោះដែលប្តឹងអធិការរងក្រុងតាខ្មៅត្រូវបានគេស្គាល់ទី១-ឈ្មោះ កៅ ម៉ាណា ភេទស្រី អាយុ២៥ឆ្នាំ មានទីលំនៅភូមិទូលរការ សង្កាត់ចាក់អង្រែក្រោម ខណ្ឌមានជ័យ, ទី២-ឈ្មោះ សាយ ស៊ីណា ភេទស្រី អាយុ៤៥ឆ្នាំ មានទីលំនៅភូមិដើមគរ សង្កាត់ដើមមៀន ក្រុងតាខ្មៅ ខេត្តកណ្តាល និងទី៣-ឈ្មោះ សុខ ជា ភេទស្រី អាយុ៧៧ឆ្នាំ មានទីលំនៅភូមិទួលរការ សង្កាត់ចាកអង្រែក្រោម ខណ្ឌមានជ័យ ។
យោងតាមពាក្យបណ្តឹងទៅអធិការកិច្ចក្រសួងមហាផ្ទៃពលរដ្ឋដែលជាជនរងគ្រោះបានរៀបរាប់ថា កាលពីថ្ងៃទី១៥ ខែតុលា ឆ្នាំ២០១៦ នាងខ្ញុំទាំងអស់គ្នាជាជនរងគ្រោះដោយអំពើហិង្សាបង្កឡើងពីមនុស្សមួយក្រុមដែលបានព្រួតគ្នាវាយតប់មកលើនាងខ្ញុំទាំង៣នាក់បណ្តាលឲ្យរងរបួសយ៉ាងដំណំ ។ មូលហេតុដែលនាំឲ្យក្រុមជនបង្កវាយតប់មកលើនាងខ្ញុំដោយគ្រាន់តែទំនាស់ពាក្យសំដីបន្តិចបន្ទួចប៉ុណ្ណោះ ។
ប្រជាពលរដ្ឋបានបញ្ជាក់ទៀតថា បន្ទាប់ពីរងរបួសដោយអំពើវាយប្រហាររបស់ក្រុមជនបង្កនាងខ្ញុំទាំងអស់គ្នាបានព្យាយាមដាក់ពាក្យប្តឹងទៅអធិការដ្ឋាននគរបាលក្រុងតាខ្មៅដើម្បីជួយរកយុត្តិធម៌ ។ ប៉ុន្តែខណៈដែលមន្ត្រីនគរបាលក្រុងតាខ្មៅកំពុងតែធ្វើកំណត់ហេតុ និងទទួលពាក្យបណ្តឹងក៏ស្រាប់តែឈ្មោះ ឡុង បរិញ្ញា មន្ត្រីនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្តាលបានទៅរារាំងមិនឲ្យមន្ត្រីនគរបាលទទួលពាក្យបណ្តឹងរបស់នាងខ្ញុំ ។ ទន្ទឹមនោះលោក ចំរើន បញ្ញា អធិការងនគរបាលក្រុងតាខ្មៅបែរជាឃុបឃិតជាមួយមន្ត្រីនគរបាល ឡុង បរិញ្ញា រៀបចំសំណុំរឿងខ្លួនឯងដោយបង្វែសំណុំរឿងព្រហ្មទណ្ឌនេះទៅវិញខណៈដែលមន្ត្រីនគរបាលទាំង២រូបនោះបានឃុបឃិតជាមួយភាគីជនបង្ក ហើយបង្វែសំណុំរឿងឲ្យជនបង្កទៅជាជនរងគ្រោះទៅវិញ ។ មិនទាន់ដឹងថ្នាក់លើចាត់ការបែបណានៅឡើយទេ ៕
ចែករំលែកព័តមាននេះ