ខេត្តប៉ៃលិន ៖ បុរសម្នាក់ត្រូវបាននគរបាលព្រហ្មទណ្ឌកំរិតធ្ងន់សហការណ៍ជាមួយកំរិតស្រាល នៃស្នងការនគរបាលខេត្ត ចុះអនុវត្តដីកាសម្រេចរក្សាការពារលេខ១០០ ចុះថ្ងៃទី២៧ ខែមិថុនា ឆ្នាំ២០១៧ របស់លោក សុទ្ធ សំអោក ចៅក្រមសាលាដំបូងខេត្តប៉ៃលិន ឱ្យរឹបអូស យករថយន្តម៉ាក ហ៊ុយសូ (FUSO) ពាក់ស្លាកលេខ ភ្នំពេញ ៣B-៩៤៩៦ ដើម្បីយកទៅរក្សាទុកបណ្តោះអាសន្ន រហូតដល់មានលុយសងម្ចាស់ស្វាយចំនួន៤នាក់ ទើបដោះលែងឱ្យត្រលប់ទៅវិញ ។
ហេតុការណ៍សមត្ថកិច្ចចាប់ឃាត់រថយន្តនេះ បានកើតឡើងកាលពីវេលាម៉ោ ង១០និង០០នាទីព្រឹក ថ្ងៃទី២៨ ខែមិថុនា ឆ្នាំ២០១៧ ស្ថិតនៅចំណុចខាងមុខផ្ទះសំណាក់ព្រំមានជ័យ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។ ប្រភពព័ត៌មានបានឱ្យដឹងថា ម្ចាស់រថយន្តដែលជំពាក់លុយថ្លៃផ្លែស្វាយអ្នកភូមិមានឈ្មោះ សុទ្ធ ទីណូ ភេទប្រុស អាយុ៣១ឆ្នាំ ជាអាជីវកររកស៊ីដើរម៉ៅផ្លែស្វាយតាមចំការ មានស្រុកកំណើតរស់នៅភូមិទី៨ ឃុំកោះសូទិន ស្រុកកោះសូទិន ខេត្តកំពង់ចាម ។ ប្រភពបន្តទៀតថា ម្ចាស់បំណុលមិនព្រមឱ្យកូនបំណុលរបស់ខ្លួន យករថយន្តទៅជួលបញ្ចាំ លក់ដូរ ផ្ទេរសិទ្ធិ ឬដាក់ធានាទៅអ្នកដទៃទៀត ព្រមទាំងមិនឱ្យធ្វើសកម្មភាពផ្សេងៗទៀត រហូតដល់តុលាការសម្រេចដល់អង្គសេចក្តីជាស្ថាពរ ។ ប្រភពបន្តទៀតថា ម្ចាស់រថយន្តខាងលើ បានជំពាក់លុយម្ចាស់ផ្លែស្វាយទាំង៤នាក់ ដោយជំពាក់អ្នកខ្លះជាង៨ដុល្លារ ខ្លះជាង៧លានរៀល ខ្លះ៤ពាន់ដុល្លារ និងខ្លះទៀតជាង១ម៉ឺនដុល្លារ ដោយទៅទិញផ្លែស្វាយ ហើយខ្ចីម្ចាស់ចំការបន្ថែមទៀត ដូច្នេះហើយកូនបំណុលចេះតែគេចមិនព្រមសងប្រាក់ ក៏សម្រេចចិត្តនាំគ្នាទៅដាក់ពាក្យបណ្តឹងចូលតុលាការខេត្តប៉ៃលិន ឱ្យឃាត់តែម្តង ។
បច្ចុប្បន្ននគរបាល បានយករថយន្តនោះទៅរក្សាទុកនៅសាលាដំបូងខេត្តប៉ៃលិនជាបណ្តោះ អាសន្ន រង់ចាំធ្វើការដោះស្រាយតាមនីតិវិធី ។
ចែករំលែកព័តមាននេះ