រុស្ស៊ី-ស៊ីរី ៖ រដ្ឋមន្ត្រីការបរទេសរុស្ស៊ីលោកស័រហ្គេយឡាវរ៉ូវ ថ្លែងកាលពីថ្ងៃទី២៨ មិថុនា ថា រុស្ស៊ីនឹងបញ្ចេញប្រតិកម្មដោយសមស្របបំផុតចំពោះការបង្កហេតុនានារបស់អាមេរិកប្រឆាំងកងទ័ពស៊ីរី ។ ម្យ៉ាងទៀត លោកស្នើដល់ក្រុងវ៉ាស៊ីនតោនកុំឱ្យស្វែងរកលេសនានា ដើម្បីវាយប្រហារប្រឆាំងកងទ័ពរដ្ឋាភិបាលស៊ីរី ។
លោកឡាវរ៉ូវ បន្តថា ក្រុងមូស្គូនឹងមិននៅស្ងៀមដោយគ្មានការឆ្លើយតបវិញចំពោះការបង្កហេតុនានារបស់សហរដ្ឋអាមេរិកប្រឆាំងកងទ័ពស៊ីរីឡើយ ។ យើងនឹងបញ្ចេញប្រតិកម្មដោយថ្លៃថ្នូរ និងសមស្របទៅតាមសភាពការណ៍ជាក់ស្តែង ។
ក្នុងសន្និសីទសារព័ត៌មានរួមជាមួយសមភាគីអាល្លឺម៉ង់ លោក SIGMAR GABRIEL នៅទីក្រុងក្រាស្នូដា រុស្ស៊ី លោកឡាវរ៉ូវ អះអាងថា រដ្ឋមន្ត្រីការបរទេសអាមេរិក លោក REX TILLERSON មុននេះក្នុងការសន្ទនាតាមទូរស័ព្ទមួយលើកឡើងពីការរៀបចំការវាយប្រហារដោយអាវុធគីមីថ្មីរបស់ក្រុងដាម៉ាស់ ប្រឆាំងបណ្តាពួកឧទ្ទាម ។ ពេលនោះលោករំលឹកប្រាប់ថា ការអះអាងគ្មានមូលដ្ឋានដែលថា កងយន្តហោះស៊ីរីកាលពីថ្ងៃទី៤ មេសា ប្រើគ្រាប់បែកគីមីនៅ KHAN CHEIKHOUN នៅពុំទាន់មានការត្រួតពិនិត្យនៅឡើយផង ។ បណ្តាអ្នកជំនាញការអះអាងដោយចំហថាវាប្រាកដច្រើនដែលពួកជ្រុលនិយមឆ្លៀតយកការព្រមានរបស់ក្រុងវ៉ាស៊ីតោន ដើម្បីរៀបចំការបង្កហេតុ ហើយទម្លាក់ការទទួលខុសត្រូវលើកងទ័ពស៊ីរី ។ លោកសង្ឃឹមថា លើកនេះអាមេរិកនឹងផ្តោតលើភាពចាំបាច់ត្រូវគោរពដោយពិតប្រាកដការមិនសាយភាយអាវុធគីមីជាជាងបញ្ចេញពាក្យចចាមអារ៉ាមលើការផ្តល់ទិន្នន័យរបស់ផ្នែកស៊ើបការណ៍សម្រាប់បង្កើតជាលេសវាយប្រហារថ្មីៗលើកងទ័ពស៊ីរីដែលប្រយុទ្ធប្រឆាំងពួកភេរវករ ៕
ចែករំលែកព័តមាននេះ