ខេត្តពោធិ៍សាត់ ៖ បុរសម្នាក់ដែលគេស្គាល់ថាជាមន្ត្រីភូមិបាលស្រុកភ្នំក្រវាញ បានត្រូវគេប្រទះឃើញដេកស្លាប់ក្នុងបន្ទប់ផ្ទះជួលមួយកន្លែង ដែលស្ថិតនៅក្នុងភូមិបោះពួយ ឃុំលាច ស្រុកភ្នំក្រវាញ កាលពីថ្ងៃទី២៨ ខែមិថុនា ឆ្នាំ២០១៧ ដោយមិនដឹងមូលហេតុ ។
សមត្ថកិច្ចឲ្យដឹងថា ជនរងគ្រោះឈ្មោះ ហេង រតនៈ ភេទប្រុស អាយុ២៦ឆ្នាំ ស្រុកកំណើតនៅភូមិព្រែកថ្មី ឃុំព្រែកអញ្ចាញ ស្រុកមុខកំពូល ខេត្តកណ្ដាល ។ បច្ចុប្បន្ន មកស្នាក់នៅបណ្ដោះអាសន្នក្នុងបន្ទប់ផ្ទះជួលមួយកន្លែងស្ថិតភូមិបោះពួយ ឃុំលាច ស្រុកភ្នំក្រវាញ ខេត្តពោធិ៍សាត់ ។ ដែលបម្រើការងារជាមន្ត្រីការិយាល័យភូមិបាលស្រុកភ្នំក្រវាញ ។ តាមការសាកសួរឲ្យដឹងថា ជនរងគ្រោះទើបតែប្ដូរទីកន្លែងមកជួលបន្ទប់ស្នាក់នៅ នៅកន្លែងកើតហេតុនេះ ទើបតែបានប៉ុន្មានថ្ងៃប៉ុណ្ណោះ ក៏ជួបបញ្ហាបែបនេះតែម្ដង ។ សាកសពជនរងគ្រោះ ដឹងពីម្ចាស់ផ្ទះដែលបានមកប្ដឹងសមត្ថកិច្ច កាលពីវេលាម៉ោង១៦និង៣០នាទីរសៀល ថ្ងៃទី២៨ ខែមិថុនា នេះថា មានមនុស្សស្លាប់នៅក្នុងបន្ទប់ជួលរបស់គាត់ ។ ភ្លាមៗនោះ សមត្ថកិច្ចមិនទាន់បានទៅភ្លាមទេ លុះនៅថ្ងៃទី២៩ ខែមិថុនា នេះ ទើបបានចុះទៅដល់កន្លែងកើតហេតុ ដែលមាននគរបាលជំនាញស្រុក និងខេត្ត កងរាជអាវុធហត្ថ គ្រូពេទ្យ និងអាជ្ញាធរមូលដ្ឋានផងដែរ ។ ពេលសមត្ថកិច្ចគាស់ទ្វាចូលទៅមើល ស្រាប់តែឃើញជនរងគ្រោះដេកស្លាប់ក្នុងបន្ទប់ហើមស្អុយទៅហើយ ។ តាមការពិនិត្យលើខ្លួនសាកសព មានស្នាមរបួសពីរកន្លែង គឺក្បាលខាងស្ដាំមួយកន្លែង និងក.ដៃខាងឆ្វេងមួយកន្លែង ដែលសន្និដ្ឋានថា ជាករណីឃាតកម្ម 0មិនមែនជាករណីស្លាប់ដោយសារជំងឺនោះទេ ។ សាកសពហើមស្អុយអាចស្លាប់រយៈពេលបីថ្ងៃមុនពេលប្រទះឃើញ ។
សមត្ថកិច្ចកំពុងស្រាវជ្រាវរកមុខឃាតករ ដែលសម្លាប់មន្ត្រីភូមិបាលស្រុកភ្នំក្រវាញនេះ ដើម្បីចាប់ខ្លួនយកមកផ្ដន្ទាទោសតាមផ្លូវច្បាប់ ៕
ចែករំលែកព័តមាននេះ