រាជធានីភ្នំពេញ ៖ អនុរក្សពន្ធនាគារព្រៃសកាលពីរសៀលថ្ងៃទី២៨ ខែមិថុនា ឆ្នាំ២០១៧ បាននាំខ្លួនជនជាតិអូស្ត្រាលីម្នាក់ដែលជាប់ពាក់ព័ន្ធរឿងបង្ហោះដ្រូន ដើម្បីឲ្យចៅក្រមសាកសួរឡើងវិញដើម្បីបិទការស៊ើបសួរ និងចាត់បញ្ជូនទៅចៅក្រមជំនុំជម្រះ ។
គួបញ្ជាក់ថា ជនត្រូវចោទឈ្មោះ Jame Ricketson ភេទប្រុស អាយុ៦៨ឆ្នាំ ជនជាតិអូស្ត្រាលី ត្រូវបានតំណាងអយ្យការអមសាលាដំបូងរាជធានីភ្នំពេញលោក សៀង សុខ ព្រះរាជអាជ្ញារងបានសម្រេចធ្វើការចោទប្រកាន់ជាផ្លូវការកាលពីព្រឹកថ្ងៃទី៩ ខែមិថុនា ឆ្នាំ២០១៧ ក្រោមបទ«ប្រមូលផ្តុំព័ត៌មានជាអាទិ៍ដែលអាចធ្វើឲ្យអន្តរាយការការពារជាតិ អំពើទទួល ឬប្រមូលផ្តុំដើម្បីផ្តល់ព័ត៌មានវិទ្យា ឬសលាកបត្រដែលអាចធ្វើឲ្យអន្តរាយការការពារជាតិ» ។ ការចោទប្រកាន់នេះធ្វើឡើងតាមមាត្រា៤៤៦ នៃក្រមព្រហ្មទណ្ឌ នៃព្រះរាជាណាចក្រកម្ពុជា ។
គួររំលឹកថា បុរសជនជាតិអូស្ត្រាលីម្នាក់នេះជាប់ពាក់ព័ន្ធថា បានបង្ហោះកាមេរ៉ាថតផ្តិតយករូបភាព(ដ្រូន)ពីលើអាកាសកាលពីព្រឹកថ្ងៃទី៧ ខែមិថុនា ឆ្នាំ២០១៧ ប្រព្រឹត្តនៅរាជធានីភ្នំពេញហើយត្រូវបានសមត្ថកិច្ចនគរបាលការិយាល័យស៊ើបអង្កេត និងអនុវត្តនីតិវិធីផែនអន្តោប្រវេសន៍រាជធានីភ្នំពេញចាប់បញ្ជូនទៅកាន់សាលាដំបូងរាជធានីភ្នំពេញដើម្បីធ្វើការសាកសួរពាក់ព័ន្ធបទល្មើសខាងលើនេះ ៕
ចែករំលែកព័តមាននេះ