រាជធានីភ្នំពេញ ៖ ក្នុងប៉ុន្មានខែចុងក្រោយនេះគេកត់សម្គាល់ថា អាជីវកម្មធ្វើតារាងបាល់ទាត់សម្រាប់ជួលបានក្លាយជាមុខរបរដែលអាចរកចំណូលបានយ៉ាងកាក់កប ជាពិសេសនៅត្រង់ទីប្រជុំជនដែលមានភ្លើងអគ្គិសនីគេអាចបើ
រាជធានីភ្នំពេញ ៖ ក្នុងប៉ុន្មានខែចុងក្រោយនេះគេកត់សម្គាល់ថា អាជីវកម្មធ្វើតារាងបាល់ទាត់សម្រាប់ជួលបានក្លាយជាមុខរបរដែលអាចរកចំណូលបានយ៉ាងកាក់កប ជាពិសេសនៅត្រង់ទីប្រជុំជនដែលមានភ្លើងអគ្គិសនីគេអាចបើកឱ្យលេងដល់ម៉ោង១០យប់ដោយមិនភ័យពីរឿងសុវត្ថិភាព ។ ជាក់ស្ដែងដីទំនេរមួយចំនួននៅរាជធានីភ្នំពេញ គេឃើញមានអ្នកបោះទុនបើកមុខរបរនេះច្រើនឡើង ដោយមួយចំនួនយល់ថាជាការបើករកស៊ីតាមគ្នា និងខ្លះថាមកពីមុខរបរនេះអាចរកចំណូលបានស្រួល។
ខុសពីពេលមុនដែលក្រុមយុវវ័យរួមមានទាំងមនុស្សវ័យកណ្ដាលផង បាននាំគ្នាទៅលេងបាល់ទាត់ ឬបាល់ទះនៅលើដីទំនេរឬដីសាធា រណៈ តែពេលនេះពួកគេបានប្រមូលផ្ដុំគ្នារៃលុយជួលតារាងសិប្បនិម្មិតដែលមានផាសុកភាពដើម្បីលេងវិញ ។ ចាប់ពីម៉ោង៣រសៀលតទៅគេឃើញអ្នកនិយមលេងបាល់ច្រើនឡើងជួបជុំគ្នានៅតាមតារាងបាល់ ដោយអ្នកខ្លះស្លៀកពាក់ជាឯកសណ្ឋានក្រុមបាល់ទាត់ណាមួយចូលលេងក្នុងតារាងទាំងនោះផង ។ កំណើនតារាងបាល់ក្រៅពីបង្ហាញពីចំណុចវិជ្ជមានក៏មានបញ្ហាអវិជ្ជមានខ្លះៗកើតឡើងផងដែរសម្រាប់ក្មេងៗដែលញៀនញ៉ាមនឹងការលេងបាល់នៅក្នុងតារាងដែលបានបង្កើតឡើង ។ អ្នកទាំងនោះច្រើនបែងចែកជាក្រុមម្ខាងម្នាក់ ដោយមានដាក់ការសន្យាគ្នាថា បើក្រុមណាចាញ់ក្រុមនោះជាអ្នកចេញថ្លៃតារាង ឬលេងភ្នាល់ដាក់លុយចាញ់ឈ្នះតែម្ដងអាស្រ័យទៅលើការព្រមព្រៀង គ្នាមុនពេលប្រកួត ។
ទោះបីយ៉ាងណា ការលេងដាក់លុយនេះមិនច្រើនប៉ុន្មានទេ ព្រោះគ្រាន់តែដើម្បីបង្កើនការប្រឹងប្រែង និងដើម្បីឱ្យអ្នកឈ្នះមានទឹកចិត្តលេងដោយសារតែមិនអស់ថ្លៃតារាង និងអាចទទួលបានប្រាក់ខ្លះត្រឡប់ទៅវិញប៉ុណ្ណោះ ។ យុវវ័យទាំងនោះបានអះអាងថា ដោយសារតែកំណើនតារាងបាល់ ហើយតារាងទាំងនោះក៏ស្ថិតនៅទីតាំងអំណោយផលផង ទើបធ្វើឱ្យពួកគេចង់ប្រកួតបាល់ទាត់ក្នុងបំណងហាត់ប្រាណដើម្បីសុខភាពផង និងដើម្បីបានជួបជុំគ្នាសប្បាយៗផង ។ យុវវ័យភាគច្រើនសុទ្ធតែយល់ឃើញថា កីឡានាំមកនូវសុខភាព ទើបពួកគេបបួលគ្នាលេងបាល់ពេលទំនេរពីការងារឬការសិក្សា ធ្វើឱ្យតារាងបាល់លេចឡើងព្រោងព្រាតស្ទើរតែគ្រប់កន្លែង ។ ផ្អែកតាមការបញ្ជាក់ តម្លៃតារាងត្រូវគេគិតជាម៉ោង ដោយមួយម៉ោងពី១០ដុល្លារទៅ១៨ដុល្លារសម្រាប់តារាងតូច និងពី២០ដុល្លារទៅ៥០ដុល្លារសម្រាប់តារាងធំដែលអាចលេងបានគ្នា១១នាក់ម្ខាងៗ ។ តារាងតម្លៃនេះមានការប្រែប្រួលអាស្រ័យទៅលើទីតាំង និងអំឡុងពេលមានមនុស្សទៅលេងច្រើន ប៉ុន្តែតារាងដែលមានតម្លៃធូរថ្លៃគេឃើញមានអ្នកទៅលេងច្រើនបើទោះជាស្ថិតនៅទីតាំងកន្លុកកន្លៀតបន្តិចក្ដី ។
លោកសីហា ម្ចាស់តារាងបាល់នៅខណ្ឌសែនសុខ ជិតសាកលវិទ្យាល័យអន្តរជាតិ(IU) បានអះអាងថា ក្រោយបើកដំណើរការតារាងបាល់ប្រមាណជាង១ឆ្នាំលោកកត់សម្គាល់ថា ចំនួនអ្នកមកលេងបាល់មានកំណើនជារៀងរាល់ថ្ងៃ ជាពិសេសនៅពេលមិនមានការរំខានដោយភ្លៀង ។ លោកថា ដើម្បីអាចបើកអាជីវកម្មនេះបានលុះត្រាតែមានដើមទុនច្រើនគួរសម ហើយត្រូវមានទីតាំងច្បាស់លាស់ទៀត ដោយសារតែមុខរបរនេះបើកុងត្រារកដីជួលមិនបានចាប់ពី៣ឆ្នាំឡើងទៅទេ គឺរកចំណេញមិនឃើញទេ។ គ្រាន់តែដំឡើងតារាង និងរៀបចំស្មៅសិប្បនិមិ្មតត្រូវចំណាយមិនក្រោម២ម៉ឺនដុល្លារទេ ក្នុងពេលដែលការកែកុនតារាងឱ្យមានកន្លែងចតរថយន្ត ឱ្យមានសំណាញ់ការពារបាល់ និងដំឡើងភ្លើងឱ្យភ្លឺនៅពេលយប់ គឺសុទ្ធតែចំណាយខ្ពស់ដែលម្ចាស់តារាងបាល់នីមួយៗទទួលខុសត្រូវ ។ លោកថា មុខរបរមួយនេះសម្រាប់អ្នកខ្វះដើមទុនគឺត្រូវចូលគ្នានិងរកដៃគូដែលមានចំណូលចិត្តលើមុខរបរបើកតារាងបាល់ដូចគ្នាទើបអាចទៅរួច។
ជាធម្មតាដើមទុនក្នុងរង្វង់ត្រឹមជាង១ម៉ឺនដុល្លារអាចបង្កើតតារាងបាល់បានមួយហើយប៉ុន្តែបើចង់ឱ្យទីតាំងដែលខ្លួនបើកនោះទទួលបានចំណូលខ្ពស់ គឺលុះត្រាតែមានតារាងតួចៗចាប់ពី៣ឡើងទៅដែលប្រើដើមទុនក្នុងរង្វង់ជាង៣ម៉ឺនដុល្លារ។
ជាបទពិសោធន៍លោកអាចជួលតារាងឱ្យគេលេងគិតជាម៉ោង ដោយថ្ងៃធម្មតាជួលបានមួយម៉ោងពី១០ទៅ១២ដុល្លារ និងថ្ងៃសៅរ៍-អាទិត្យបានមួយម៉ោង១៥ដុល្លារ ឬ១៨ដុល្លារ ។
ដោយឡែកសម្រាប់តារាងធំមិនសូវមានគេជួលលេងទេ ដោយសារតែវាមានតម្លៃថ្លៃ និងតម្រូវឱ្យបិទតារាងតូចៗដល់ទៅ៣បញ្ចូលគ្នា តែបើជួលបានក៏បានតម្លៃចាប់ពី១ម៉ោង៣០ដុល្លារឡើងទៅដែរ ។ លោកថា អ្នកចង់ជួលតារាងធំលុះត្រាតែទាក់ទងលោកមុន តែភាពជាក់ស្ដែងលោកជួលដាច់តែតារាងតូចប៉ុណ្ណោះ ឯតារាងធំលុះត្រាតែចំថ្ងៃធ្វើការមិនសូវមានអ្នកចង់ជួលលេងទើបអាចជួលបាន។
មន្ត្រីសហព័ន្ធកីឡាបាល់ទាត់កម្ពុជាធ្លាប់បានបញ្ជាក់ថា វត្តមានតារាងបាល់ទាត់នៅគ្រប់ទិសទី គឺជាចលករដែលជួយឱ្យយុវវ័យចាប់អារម្មណ៍ចង់ក្លាយខ្លួនជាអ្នកកីឡាច្រើនឡើង ជាពិសេសគឺក្រុមក្មេងៗដែលសុទ្ធតែជាធនធានផ្នែកបាល់ទាត់ ។ ដោយសារសន្ទុះទាំងនោះ ហើយដែលធ្វើឱ្យវិស័យបាល់ទាត់មានការរីកចម្រើនយ៉ាងឆាប់រហ័សជាងកីឡាដទៃថែមទាំងអាចបង្កើតការប្រកួតលីគតូចធំបានជាបន្តបន្ទាប់ទៀតផង ។ គេនៅតែយល់ឃើញថា វត្តមានតារាងបាល់ដែលបានផុសឡើងព្រោងព្រាតនាពេលចុងក្រោយនេះ បានជួយជំរុញទឹកចិត្តយុវវ័យដែលកាលពីមុនមិនដឹងថាទំនេរធ្វើអី្វ ឱ្យងាកមកលេងកីឡា និងចេះវិវឌ្ឍខ្លួនក្លាយជាកីឡាករល្អៗក្នុងពិភពបាល់ទាត់ ។ ក្នុងនោះវត្តមានតារាងបាល់ទាត់ក៏ជួយឱ្យក្មេងយកធ្វើជាកន្លែងជួបជុំគ្នាលេងកីឡាដើម្បីសុខភាពផងដែរ ។ យ៉ាងណាក៏ដោយក៏មានការរិះគន់ថា ក្មេងៗមួយចំនួនបានយកទីលានបាល់ទាត់ធ្វើជាកន្លែងលេងភ្នាល់ភ្លេចការសិក្សា និងអស់លុយនៅពេលចាញ់ ដែលនាំឱ្យប៉ះពាល់ដល់ការសិក្សារបស់ក្មេងៗទាំងនោះដែរ ។
ជាក់ស្ដែងមានការបង្ហោះច្រើនមកហើយពីការរអ៊ូរទាំរបស់អាណាព្យាបាលជុំវិញក្មេងៗមួយចំនួនដែលញៀននឹងកីឡាបាល់ទាត់់រហូតគេចសាលា ហើយសំកុកចាំតែលេងនៅក្នុងតារាងដោយយកការភ្នាល់គ្នាធ្វើជាត្រីមុខផង ។ មន្ត្រីសហព័ន្ធកីឡាបាល់ទាត់ធ្លាប់បានបញ្ជាក់ថា ចំពោះករណីនេះមានការតែការចូលរួមពីសំណាក់អាណាព្យាបាល និងម្ចាស់តារាងនីមួយៗប៉ុណ្ណោះ ទើបបញ្ហាអវិជ្ជមានដែលបានលើកឡើងនេះមិនរីករាលដាល ៕
ចែករំលែកព័តមាននេះ