ខេត្តបន្ទាយមានជ័យ ៖ ក្រោយពេលប្រទេសថៃអនុវត្តន៍ច្បាប់អន្តោប្រវេសន៍ ៨ចំណុច ចាប់បញ្ជូនពលករខ្មែរ១ថ្ងៃជាង៥.០០០នាក់ នៅតាមច្រកទ្វារអន្តរជាតិប៉ោយប៉ែត។ ជាក់ស្តែងនៅថ្ងៃទី២៨ ខែមិថុនា ឆ្នាំ២០១៧នេះ គេឃើញសមត្ថកិច្ចថៃបានចាប់ពលករខ្មែរធ្វើការងារដោយខុសច្បាប់នៅប្រទេសថៃ បញ្ជូនមកក្នុង១ថ្ងៃជាង៥.០០០នាក់ ច្រើនជាងរាល់ថ្ងៃមានប្រមាណ១៥០ទៅ២០០នាក់។ មន្ត្រីគណៈកម្មការទទួលពលករខ្មែរខុសច្បាប់នៅច្រកទ្វារអន្តរជាតិប៉ោយប៉ែតបានប្រាប់ថា ពលករខ្មែរដែលបញ្ជូនមកគឺជាពលករស្នាក់ធ្វើការងារដោយខុសច្បាប់ ដែលសមត្ថកិច្ចថៃចាប់តម្រូវឲ្យមានប៉ាស្ព័រ វីសា ប័ណ្ណការងារ។
គួររំលឹកថា៖ ព័ត៌មានថៃបានចេញផ្សាយច្បាប់ ចំពោះជនជាតិថៃដែលទទួលជនអន្តោរប្រវេសន៍មាន៨ចំណុច ទី១.ជនជាតិថៃណាមួយដែលលាក់ទុកពលករធ្វើការផ្ទះខុសច្បាប់ក្នុងម្នាក់ត្រូវផាកវិន័យជនជាតិថៃដែលទទួល៤០០.០០០ទៅ៨០០.០០០បាត ទី២.ជនជាតិថៃណាដែលទទួលពលករដែលគ្មានលិខិតស្នាមខុសច្បាប់ធ្វើការងារក្រុមហ៊ុនក្នុងម្នាក់ផាកវិន័យជាទឹកប្រាក់៤០០.០០០បាត ទី៣.ជនជាតិថៃដែលទៅទទួលយកកម្មករឆ្លងដែនដោយខុសច្បាប់យកមកធ្វើការ ចាប់ម្នាក់ត្រូវដាក់គុកអ្នកនាំ៥ឆ្នាំ និងផាកវិន័យជាទឹកប្រាក់២.០០០ទៅ១០០.០០០បាត ទី៤.ជនជាតិថៃណាដែលទទួលកម្មករធ្វើការងារមិនបានរាយការណ៍ដល់អាជ្ញាធរមានសមត្ថកិច្ចចាប់បានម្នាក់ត្រូវផាក់វិន័យជាទឹកប្រាក់ចំនួន២០.០០០ទៅ១០០.០០០បាត ទី៥.ជនជាតិថៃណាដែលយកកម្មករដែលមានធ្វើការតាមក្រុមហ៊ុនហើយយកមកធ្វើការផ្ទះរបស់ខ្លួនខុសច្បាប់ការងារនឹងត្រូវផាកវិន័យជាទឹកប្រាក់ចំនួន១០០.០០០បាត។
ទី៦.ជនជាតិថៃដែលទទួលកម្មករធ្វើការមានច្បាប់ហើយកូពីឯកសារទុកតែកម្មកររត់បាត់ មិនរាយការណ៍ជូនអាជ្ញាធរបានដឹងមានទោសជាប់គុក៦ខែ ផាកវិន័យ១០០.០០០បាត ទី៧.ជនជាតិថៃដែលទទួលជនអន្តោរប្រវេសន៍ធ្វើការខុសច្បាប់ក្នុងម្នាក់ត្រូវជាប់គុក៣ទៅ១០ឆ្នាំ និងផាក់វិន័យ៦០០.០០០ទៅ១.០០០.០០០បាត និងទី៨.ជនជាតិថៃដែលមានក្រុមហ៊ុនកន្លែងការងារគ្មានច្បាប់ ទទួលកម្មករខុសច្បាប់ធ្វើការងារចាប់បានម្នាក់ត្រូវដាក់គុកពី១ទៅ៣ឆ្នាំ ផាកវិន័យជាទឹកប្រាក់២០០.០០០ទៅ៦០០.០០០បាត។ ច្បាប់ការងារនៅប្រទេសថៃគឺតម្រូវឲ្យកម្មករកម្មការនីត្រូវមានប៉ាស្ព័រ វីសា និងប័ណ្ណការងារ(ស៊ីជម្ពូ) សមត្ថកិច្ចថៃបានបើកយុទ្ធនាការបង្ក្រាបឃាត់ខ្លួនពលករ និងភូមា ឡាវ ក្នុងកន្លែងធ្វើការមួយកន្លែងដែលចាប់បានប្រមាណ៤០០ទៅ៥០០នាក់ ក្រោយពេលដែលរាជរដ្ឋាភិបាលថៃបានអនុវត្តន៍ច្បាប់ការងារនៅប្រទេសថៃ៕
ចែករំលែកព័តមាននេះ