បើកបរងោកមួយភាំង ជ្រុលទៅបុកកុងតឺន័រពេញទំហឹង
រាជធានីភ្នំពេញ ៖ បុរសម្នាក់ខណៈដែលកំពុងបើកបររថយន្តមួយគ្រឿងក្នុងល្បឿនលឿន ស្រាប់តែងងុយដេក ហើយបានងោកមួយភាំងក៏ជ្រុលទៅបុកជាមួយរថយន្តកុងតឺន័រមួយគ្រឿងទៀត
រាជធានីភ្នំពេញ ៖ បុរសម្នាក់ខណៈដែលកំពុងបើកបររថយន្តមួយគ្រឿងក្នុងល្បឿនលឿន ស្រាប់តែងងុយដេក ហើយបានងោកមួយភាំងក៏ជ្រុលទៅបុកជាមួយរថយន្តកុងតឺន័រមួយគ្រឿងទៀត ដែលកំពុងបើកបរបញ្ច្រាសទិសគ្នា ចំពីមុខពេញទំហឹងតែម្ដង ប៉ុន្តែជាសំណាងល្អមិនបានបណ្តាលឲ្យអ្នកបើកបរ ទាំងសងខាងរងរបួសនោះឡើយ ចំណែកឯរថយន្តទាំងពីរគ្រឿងបានរងការខូចខាត ក្រពឹតមុខយ៉ាងដំណំរៀងៗខ្លួន។
ឧប្បត្តិហេតុគ្រោះថ្នាក់ចរាចរណ៍នោះ បានកើតឡើងកាលពីវេលាម៉ោង១២ថ្ងៃត្រង់ ថ្ងៃទី២៨ ខែមិថុនា ឆ្នាំ២០១៧ នៅលើកំណាត់ផ្លូវជាតិលេខ៤ ត្រង់ចំណុចជិតរង្វង់មូលថ្នល់បំបែកចោមចៅ សង្កាត់ចោមចៅ ខណ្ឌពោធិ៍សែនជ័យ។
តាមប្រភពព័ត៌មានបានឲ្យដឹងថា រថយន្តម៉ាកឡិចស៊ីសRX- 300 ពណ៌ទឹកប្រាក់ពាក់ស្លាកលេខភ្នំពេញ 2 AL-6528 អ្នកបើកបរ និងអ្នករួមដំណើរ មិនត្រូវបានគេស្គាល់ឈ្មោះនោះឡើយ ហើយគាត់បានអះអាង ប្រាប់នគរបាល និងអ្នកឃើញហេតុការណ៍នោះថា ខណៈដែលកំពុងបើកបរគាត់ងងុយដេក ហើយបានងោកមួយភាំង ទើបបង្កឲ្យមានគ្រោះថ្នាក់ចរាចរណ៍កើតឡើងបែបនេះ។ ចំណែករថយន្ត១គ្រឿងទៀត ម៉ាកហ៊ីយ៉ាន់ដាយ ពណ៌ទឹកប្រាក់ស្លាកលេខ ភ្នំពេញ 3C-5471បើកបរដោយបុរសម្នាក់មិនប្រាប់ពីអត្តសញ្ញាណឡើយ ជារថយន្តដឹកកុងតឺន័រ។
ប្រភពដដែលបានបន្តទៀតថា នៅមុនពេលកើតហេតុ រថយន្តម៉ាកឡិចស៊ីស RX-300 ជិះគ្នា២នាក់បានបើកបរក្នុងទិសដៅពីកើតទៅលិច លុះពេលទៅដល់ត្រង់ចំណុចកើតហេតុ ស្រាប់តែអ្នកបើកបរងងុយ ដេកហើយងោកមួយភាំង ក៏រេចង្កូតជ្រុលទៅបុកជាមួយរថយន្តកុងតឺន័រចំពីមុខពេញទំហឹងតែម្ដង។ ខណៈនោះបណ្តាលឲ្យរថយន្តទាំងពីរគ្រឿងគាបជាប់ តែសំណាងល្អមិនបានបណ្ដាលឲ្យអ្នកបើកបររងរបួសនោះឡើយ ហើយក្រោយពេលកើតហេតុ ភាគីទាំងសងខាងបានសម្របសម្រួលគ្នា ដោយយល់ព្រមយករថយន្តទៅធ្វើការជួសជុលរៀងៗខ្លួន៕
ចែករំលែកព័តមាននេះ