សាលដីកាលោក គឹម សុខ បុគ្គលិកអាហុក៤នាក់ និងគជបម្នាក់ នឹងប្រកាសថ្ងៃទី៥ កក្កដា
រាជធានីភ្នំពេញ ៖ ចៅក្រមតុលាការកំពូល នៅព្រឹកថ្ងៃទី២៨ ខែមិថុនា ឆ្នាំ២០១៧នេះ មិនបានប្រកាសសាលដីកាសំណុំរឿងករណីសុំនៅក្រៅឃុំរបស់លោក គឹម សុខ
រាជធានីភ្នំពេញ ៖ ចៅក្រមតុលាការកំពូល នៅព្រឹកថ្ងៃទី២៨ ខែមិថុនា ឆ្នាំ២០១៧នេះ មិនបានប្រកាសសាលដីកាសំណុំរឿងករណីសុំនៅក្រៅឃុំរបស់លោក គឹម សុខ អ្នកឃ្លាំមើលសង្គម និងនយោបាយកម្ពុជា និងសំណុំរឿងបណ្តឹងសាទុក្ខរបស់បុគ្គលិកអង្គការអាហុកចំនួន៤នាក់ និងមន្ត្រីអគ្គលេខាធិការរងគណៈកម្មាធិការជាតិរៀបចំការបោះឆ្នោត និងការបន្តឃុំខ្លួន៦ខែទៀតតាមការគ្រោងទុកទេ។ ជនជាប់ចោទលោក គឹម សុខ នៅព្រឹកថ្ងៃទី២៨ ខែមិថុនា ឆ្នាំ២០១៧នេះ ត្រូវបានមន្ត្រីពន្ធនាគារនាំខ្លួនមមកកាន់សវនាការតុលាការកំពូល។ តែបុគ្គលិកអង្គការសមាគមអាហុកចំនួន៤រូប(លោកស្រី លឹម មុន្នី លោក ណៃ វ៉ង់ដា លោក នី សុខា លោក យី សុខសាន្ត) និងមន្ត្រីគជប លោក នី ចរិយា មិនត្រូវបានគេនាំខ្លួនមកកាន់បន្ទប់សវនាការដើម្បីប្រកាសសាលដីកាទេ ខណៈដែលចៅក្រមសម្រេចថា លើកពេលទៅប្រកាសនៅថ្ងៃទី៥ ខែកក្កដាវិញ។
សូមបញ្ជាក់ថា តុលាការកំពូល នៅព្រឹកថ្ងៃទី២១ ខែមិថុនា ឆ្នាំ២០១៧ បានបើកសវនាការសំណុំរឿងលោក គឹម សុខ អ្នកឃ្លាំមើលបញ្ហាសង្គម និងនយោបាយ រឿងសុំនៅក្រៅឃុំ។ សវនាការនេះដឹកនាំដោយលោកជំទាវ គឹម សុត្ថាវី ជាប្រធានក្រុមប្រឹក្សាជំនុំជម្រះ និងលោក ឈួន ចាន់ថា ជាតំណាងមហាអយ្យការ។ នៅក្នុងពេលសវនាការជនជាប់ចោទ គឹម សុខ បាននិយាយថា ”ការមិនឲ្យរូបខ្ញុំនៅក្រៅឃុំគឺវាមានភាពអយុត្តិធម៌ណាស់ និងសូមឲ្យលោកស្រីចៅក្រមឲ្យមន្ត្រីពន្ធនាគារព្រៃស (ម១) ប្រគល់សៀវភៅអាន សរសេរ ដែលពួកគេបានដកហូតរបស់ខ្ញុំឲ្យមកខ្ញុំវិញ”។ លោក គឹម សុខ និយាយទៀតថា៖ ចំណែកសាលាដំបូងរាជធានីភ្នំពេញ ក៏ត្រូវបានបិទការស៊ើបសួរហើយរឿងរបស់លោករួចបញ្ជូនទៅបើកសវនាការជំនុំជម្រះតាមនីតិវិធីរួចហើយដែរ។ ក្រោយសវនាការពេញមួយព្រឹកថ្ងៃទី២១ ខែមិថុនា ឆ្នាំ២០១៧ លោកស្រី គឹម សុត្ថាវី ប្រធានក្រុមប្រឹក្សាជំនុំជម្រះតុលាការកំពូលនឹងសម្រេចថា ដោះលែងឬមិនដោះលែងលោក គឹម សុខ អ្នកឃ្លាំមើលបញ្ហាសង្គម និងនយោបាយ នៅថ្ងៃទី២៨ ខែមិថុនា ខាងមុខនេះ។
ក្នុងរឿងក្តីនេះសាលាដំបូងរាជធានីភ្នំពេញ ធ្លាប់ថ្លែងថា រឿងក្ដីលោក គឹម សុខត្រូវបានបិទការស៊ើបសួរហើយរួចបញ្ជូនទៅបើកសវនាការជំនុំជម្រះតាមនីតិវិធីតែមិនបានបញ្ជាក់ថានៅពេលណាពិតប្រាកដនៅឡើយទេ។ លោក គឹម សុខ ត្រូវបានបញ្ជូនទៅឃុំខ្លួនក្នុងពន្ធនាគារព្រៃសហើយ កាលពីរសៀលថ្ងៃទី១៧ ខែកុម្ភៈ ឆ្នាំ២០១៧ តាមបណ្តឹងមេធាវីតំណាងដោយអាណត្តិរបស់សម្តេចតេជោនាយករដ្ឋមន្ត្រី ដែលហ៊ានចោទ គណបក្សប្រជាជនកម្ពុជាថា ជាអ្នកសម្លាប់លោកបណ្ឌិត កែម ឡី។ លោក រស់ ពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនលោក គឹម សុខ បន្ទាប់ពីលោកព្រះរាជអាជ្ញារង សៀង សុខ សម្រេចចោទប្រកាន់ចំនួនពីរបទល្មើស គឺញុះញង់ឲ្យប្រព្រឹត្តបទឧក្រិដ្ឋជាអាទ៍ និងបទបរិហារកេរ្តិ៍ជាសាធារណៈ តាមមាត្រា៤៩៤ មាត្រា៤៩៥ និងមាត្រា៣០៥ នៃក្រមព្រហ្មទណ្ឌ។
លោក រស់ ពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនលោក គឹម សុខ បន្ទាប់ពីលោកព្រះរាជអាជ្ញារង សៀង សុខ សម្រេចចោទប្រកាន់ចំនួនពីរបទល្មើស គឺញុះញង់ឲ្យប្រព្រឹត្តបទឧក្រិដ្ឋជាអាទ៍ និងបទបរិហារកេរ្តិ៍ជាសាធារណៈ តាមមាត្រា៤៩៤ មាត្រា៤៩៥ និង មាត្រា៣០៥ នៃក្រមព្រហ្មទណ្ឌ។ ដោយឡែកសំណុំរឿងក្តីបុគ្គលិកអាហុកឡើងដល់តុលាការកំពូលករណីសុំនៅក្រៅឃុំបណ្តោះអាសន្នប្រកាសថ្ងៃ២៨ មិថុនានេះដែរ តែប្រកាសលើកទៅថ្ងៃទី៥ ខែកក្កដា ឆ្នាំ២០១៧ ខាងមុខដូចសំណុំរឿងលោកគឹម សុខដែរ។ តុលាការកំពូលនៅព្រឹកថ្ងៃទី២១ ខែមិថុនា ឆ្នាំ២០១៧ បានបើកសវនាការបណ្តឹងទាស់របស់មន្ត្រីអាដហុក៤រូប និង គជប ១រូបដែលប្តឹងទាស់នឹងសាលាឧទ្ធរណ៍ដែលបានសម្រេចតម្កល់និងបន្តការឃុំខ្លួនរយៈពេល៦ខែបន្តទៀត របស់សាលាដំបូងរាជធានីភ្នំពេញ៕
ចែករំលែកព័តមាននេះ