រាជធានីភ្នំពេញ ៖ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានប្រាប់កោះសន្តិភាពកាលពីពេលថ្មីៗកន្លងទៅថា សម្រាប់ការប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះលើកដំបូង កម្ពុជាបានសម្រេចជ្រើសយកទីតាំងសំខាន់ៗចំនួន៤សម្រាប់រៀបចំព្រឹត្តិការណ៍នេះក្នុងនោះទីតាំងចំនួន៣បានកំណត់ច្បាស់លាស់ហើយ នៅសល់តែ១ទីតាំងទៀតប៉ុណ្ណោះដែលកំពុងស្ថិតក្នុងការពិចារណានៅឡើយ ។
ទីតាំងដែលកម្ពុជាកំណត់យកសម្រាប់រៀបចំព្រឹត្តិការណ៍កីឡាស៊ីហ្គេមឆ្នាំ២០២៣នោះគឺ៖
ទី១-ពហុកីឡដ្ឋានមរតកតេជោ ជាកន្លែងសំខាន់ជាងគេសម្រាប់ធ្វើពិធីបើកនិងពិធីបិទព្រោះពហុកីឡដ្ឋានដែលកំពុងសាងសង់នេះមានលក្ខណៈទំនើបជាងគេនៅក្នុងតំបន់អាស៊ីអាគ្នេយ៍មានកន្លែងប្រកួតកីឡាស្ទើរតែគ្រប់ប្រភេទដូចជាបាល់ទាត់ បាល់ទះ បាល់បោះ និងហែលទឹកជាដើម ។
ទី២-ពហុកីឡដ្ឋានជាតិអូឡាំពិក អាចធ្វើជាកន្លែងសម្រាប់ប្រកួតកីឡាប្រហាក់ប្រហែលនឹងពហុកីឡដ្ឋានមរតកតេជោដែរ ។
សព្វថ្ងៃក្រសួងអប់រំ យុវជន និងកីឡា កំពុងតែស្ទុះស្ទាយ៉ាងខ្លាំងក្នុងការបំពាក់សម្ភារដល់ពហុកីឡដ្ឋានដ៏ចំណាស់មួយនេះដូចជាកៅអីជ័រល្អ និងអំពូលភ្លើងដែលអាចបម្រើឱ្យការប្រកួតនៅពេលយប់បាន ។ ប៉ុន្តែទីតាំងទាំង២កន្លែងនេះសម្រាប់បម្រើដល់ការប្រកួតកីឡាក្នុងសាល និងលើគោកតែប៉ុណ្ណោះ។
ទី៣-ខេត្តកំពត និងខេត្តកែប មានឆ្នេរសមុទ្រធ្វើជាកន្លែងសម្រាប់ប្រកួតកីឡាលើទឹកដូចជាម៉ូតូទឹក ទូកក្ដោង ទូកកានូ ទូកកាយ៉ាក់។ល។ និង
ទី៤-មជ្ឈមណ្ឌលពាណិជ្ជកម្មកោះពេជ្រ បើមិនមានការកែប្រែទេទីតាំងមួយនេះនឹងត្រូវជ្រើសរើសធ្វើជាហេដ្ឋារចនាសម្ព័ន្ធសាធារណៈព្រោះមានអគារសម្រាប់ជួលធ្វើជាកន្លែងប្រកួតកីឡាក្នុងសាលដូចជាប្រដាល់ តេក្វាន់ដូ ជាដើម ។
លោក វ៉ាត់ ចំរើន បានលើកឡើងពីការប្រកួតកីឡាស៊ីហ្គេមនៅប្រទេសឡាវកន្លងមកថា ហេដ្ឋារចនាសម្ព័ន្ធសាធារណៈសម្រាប់បម្រើដល់ការប្រកួតកីឡាស៊ីហ្គេមមិនគ្រប់គ្រាន់ដូចយើងដែរ ដូច្នេះគេបានជួលទីតាំងណាមួយដែលអាចបម្រើដល់ការប្រកួតកីឡាក្នុងសាលបាន ។
សម្រាប់កម្ពុជាអាចល្អប្រសើរជាងឡាវ ព្រោះយើងមានទីតាំងប្រកួតច្រើនជាង ជាពិសេសយើងមានឆ្នេរសមុទ្រដែលអាចបម្រើដល់ការប្រកួតកីឡាលើទឹកបាន ។ ចំពោះកីឡាដែលត្រៀមដាក់ឱ្យប្រកួតនៅពេលនោះមានចាប់ពី៣០ដល់៣៥ប្រភេទប៉ុន្តែពេលនេះអាជ្ញាធរកីឡាកំពុងតែធ្វើកំណែទម្រង់លើគ្រប់ប្រភេទកីឡាទាំងនោះ ធ្វើយ៉ាងណាឱ្យប្រភេទកីឡាទាំងនោះមានលក្ខណៈសម្បត្តិគ្រប់គ្រាន់ ។ បើប្រភេទកីឡាណាមួយមិនខិតខំប្រឹងប្រែងហ្វឹកហាត់ក៏ដូចជាត្រៀមខ្លួនឱ្យបានល្អជាមុនទេ គឺមិនអនុញ្ញាតឱ្យចូលរួមប្រកួតឡើយ ។ ចំពោះការវាយតម្លៃទៅលើប្រភេទកីឡាដែលមានសក្ដានុពលអាចដណ្ដើមបានមេដាយវិញ គឺត្រូវធ្វើឡើងមុនពេល៤ឆ្នាំនៃការប្រកួតកីឡាស៊ីហ្គេមមកដល់ មិនអាចវាយតម្លៃក្នុងពេលឥឡូវនេះបានទេ ។ លោកបានសង្កត់ធ្ងន់ថា កីឡាទាំង៣៥ប្រភេទដែលកំពុងតែធ្វើការប្រមូលផ្ដុំហ្វឹកហាត់សព្វថ្ងៃនេះ បើមានកម្រិតបច្ចេកទេសគ្រប់គ្រាន់គឺដាក់ឱ្យចូលរួមប្រកួតទាំងអស់តែម្ដង តែបើប្រភេទកីឡាណាមួយអសកម្មទោះបីនៅសល់ត្រឹម១០ឬ២០ប្រភេទកីឡាក៏ត្រូវតែប្រកួតដែរ ។ យើងដឹងហើយថា វិស័យកីឡានៅក្នុងប្រទេសអាស៊ានសុទ្ធតែខ្លាំងៗ ដូច្នេះមិនអាចធ្វេសប្រហែសបានឡើយ ត្រូវតែខំប្រឹងទាំងអស់គ្នា ដោយរួមគ្នាគិត រួមគ្នាធ្វើ ដើម្បីដណ្ដើមមេដាយជូនជាតិ ៕
ចែករំលែកព័តមាននេះ