រាជធានីភ្នំពេញ ៖ កញ្ញាសោភា ទេពី ដែលជាតារាចម្រៀង មានគ្រឹះចេញពីរបាំបុរាណនោះ ចង់ក្លាយជាអ្នកចម្រៀងសម័យដ៏ជោគជ័យម្នាក់ នាពេលដ៏ខ្លីខាងមុខ ។ កញ្ញានិយាយថា នាងគឺជាសិស្សផ្នែករបាំបុរាណរយៈពេល៤ឆ្នាំមកហើយ ដោយនាងមានជំនាញរាំរែកបែបប្រពៃណីរបាំបុរាណជាច្រើន ប៉ុន្តែដោយសារតែនាង ក៏មានទេពកោសល្យអាចច្រៀងបានទាំងបទយុវវ័យ ជាពិសេសបទជាភាសាអង់គ្លេស ថៃ ឡាវ បារាំង វៀតណាម និងចិន ទើបនាងត្រូវបានជ្រើសជាតារាចម្រៀងក្នុងវង់តន្ត្រីយោធាភិរម្យនាពេល
ថ្មីៗ ។
តារាវ័យ១៦ឆ្នាំរូបនេះបញ្ជាក់ថា «ព្រោះតែខ្ញុំឃើញសិល្បៈបែបសម័យឡើងកូដខ្លាំង ដូច្នេះហើយទើបខ្ញុំរំពឹងថា ថ្ងៃខាងមុខ ខ្ញុំអាចនឹងក្លាយជាតារាចម្រៀងជួរមុខម្នាក់ក្នុងប្រទេសកម្ពុជា» ។
តារាចម្រៀងវ័យក្មេងរូបនេះបន្តថា បន្ទាប់ពីមានឱកាសឡើងស្ថានីយទូរទស្សន៍ជាញឹកញាប់ ដូច្នេះកញ្ញារំពឹងថា ក្ដីសង្ឃឹមរបស់ខ្លួនបានតាំងចិត្តជាយូរមកហើយ អាចក្លាយជាការពិតនាពេលដ៏ខ្លីខាងមុខ ។ បើទោះជាមិនទាន់មានផលិតកម្មធំៗក្នុងស្រុកចាប់អារម្មណ៍ចុះកុងត្រាក្ដី ក៏ប៉ុន្តែកញ្ញាសោភា ទេពី មិនអស់សង្ឃឹមនោះទេ ។ កញ្ញាលើកឡើងថា ការតាំងចិត្តរបស់ខ្លួនអាចនឹងផ្ដល់ផ្លែផ្កាក្នុងពេលឆាប់ៗ ។
បច្ចុប្បន្ន កញ្ញាសោភា ទេពី កំពុងច្រៀងក្នុងវង់តន្ត្រីយោធាភិរម្យ ។ កញ្ញាធ្លាប់ប្រលងចម្រៀងក្នុងកម្មវិធី «ចង់ក្លាយជាតារា» របស់ប៉ុស្ដិ៍លេខ៥ កាលពីឆ្នាំ២០១៦ ហើយទទួលលេខ២ ក៏បានក្លាយជាតារាចម្រៀងមកទល់នឹងពេលនេះ ។
តារាវ័យក្មេងនេះបានផ្តាំដល់យុវវ័យដែលស្រឡាញ់សិល្បៈគួរតែចូលហាត់ជំនាញបុរាណឲបានច្រើនព្រោះផ្នែកបុរាណពេលបច្ចុប្បន្នកំពុងតែដើរទៅមុខហើយត្រូវការរលកក្រោយជួយបន្តវេន។នាងមិនចោលអាជីពរបាំបានឡើយទោះជាសម័យរីកដូចផ្សិតក៍នាងនៅតែច្បាមយកដដែលនេះជានិស្ស័យពីកំណើត។
ចែករំលែកព័តមាននេះ