វីតាមីនC គឺជាសារធាតុចិញ្ចឹមរលាយក្នុងទឹកដែលចាំបាច់សម្រាប់មុខងារសរីរាងកាយរបស់មនុស្ស ។ វាមានសារៈសំខាន់ក្នុងការធ្វើមេតាបូលីសប្រូតអីុន និងការសំយោគសារធាតុកូឡាជែនដែលជាប្រូតាអីុនរក្សារាងកាយរបស់យើងឲ្យនៅជាប់គ្នា ។
វីតាមីនC មានច្រើនក្នុងផ្លែឈើដែលមានរសជាតិជូរ ។ វីតាមីន C ប្រហែល៩០មីលី្លក្រាមក្នុង១ថ្ងៃត្រូវបានណែនាំសម្រាប់បុរស និងតិចជាងនេះបន្តិចចំពោះស្ត្រី ។ រាងកាយរបស់យើងអាចមានភាពទ្រាំទ្រនឹងវីតាមីននេះក្នុងកម្រិតខ្ពស់ ។ ទោះជាយ៉ាងណាក្តី បើយើងទទួលទានវីតាមីននេះក្នុងបរិមាណច្រើនហួសហេតុពេក វាអាចបង្កឱ្យមានផលប៉ះពាល់ និងអន្តរកម្មថ្នាំជាច្រើន ។
ខាងក្រោមនេះគឺជាផលប៉ះពាល់មួយចំនួននៃការទទួលទានវីតាមីន C ហួសកម្រិត ។
១-ចង្អោរ និងរាក
រោគសញ្ញានេះគឺជារោគសញ្ញាទូទៅបំផុតនៃការទទួលទានវីតាមីន C លើសកម្រិត ជាពិសេសនៅពេលទទួលទានពេលពោះទទេ ។ វាកើតឡើងដោយសារតែឥទ្ធិពលអូស្មូទិចនៃវីតាមីននៅក្នុងក្រពះ ពោះវៀន ។
២-ក្រួសតម្រងនោម
វីតាមីន C មានលក្ខណសម្បត្តិក្នុងការបង្កើនការបញ្ចេញជាតិអាស៊ីតអ៊ុយរិច និងសារធាតុអុកសាឡាត ដែលសារធាតុទាំងពីរនេះបណ្តាលឲ្យកើតជាក្រួសក្នុងតម្រងនោម ។ ដូច្នេះអ្នកដែលធ្លាប់មានបញ្ហាក្រួសតម្រងនោមប្រភេទអុកសាឡាត ត្រូវតែប្រុងប្រយ័ត្នចំពោះការទទួលទានវីតាមីន C ។
៣-បង្កើនការស្រូបជាតិដែកលើសកម្រិត
គុណសម្បត្តិដ៏អស្ចារ្យនៃវីតាមីន C គឺវាអាចបង្កើនការស្រូបយកជាតិដែក ។ ទោះជាយ៉ាងណាក្តី វាអាចក្លាយទៅជាបញ្ហាចំពោះអ្នកដែលមានជំងឺអេម៉ូក្រូម៉ាតូសីស (ជំងឺម្យ៉ាងដែលរាងកាយស្រូបយកជាតិដែកពីអាហារក្នុងកម្រិតមួយខ្ពស់ ) ដោយសារតំណពូជ ។
៤-ពុកធ្មេញ
កម្រិត pH ទាបនៃវីតាមីន C អាចបំផ្លាញស្រទាប់រឹងខាងក្រៅរបស់ធ្មេញ ដែលវាជួយការពារធ្មេញពីការពុកផុយ ។ ទោះយ៉ាងណាក្តីនៅតែមានមតិផ្ទុយទៅនឹងការសិក្សានេះ ។
៥-កន្ទួលរមាស់លើស្បែក
ប្រតិកម្មពុលដោយសារវីតាមីនC ច្រើនហួសហេតុពេកគឺការចេញកន្ទួលរមាស់លើស្បែក។ វាច្រើនតែកើតលើទារក ។ វាបង្ហាញខ្លួនវាដូចជាប្រតិកម្មអាលែកស៊ី ៕
ចែករំលែកព័តមាននេះ