រាជធានីភ្នំពេញ ៖ រយៈពេលប៉ុន្មានឆ្នាំចុងក្រោយនេះ តារាស្រី និងយុវតីជាច្រើនពេញនិយមកៀបធ្មេញ ក្នុងន័យលម្អបង្កើនសោភ័ណភាពធ្មេញរបស់ខ្លួន ។ ទោះជាយ៉ាងណាក្តី យុវតីខ្លះញញើតចំពោះការកៀបធ្មេញនេះ ។
រាជធានីភ្នំពេញ ៖ រយៈពេលប៉ុន្មានឆ្នាំចុងក្រោយនេះ តារាស្រី និងយុវតីជាច្រើនពេញនិយមកៀបធ្មេញ ក្នុងន័យលម្អបង្កើនសោភ័ណភាពធ្មេញរបស់ខ្លួន ។ ទោះជាយ៉ាងណាក្តី យុវតីខ្លះញញើតចំពោះការកៀបធ្មេញនេះ ។
ការកៀបធ្មេញ ឬគេហៅថា«ធ្មេញដែក» បានហូរចូលប្រទេសកម្ពុជាក្នុងរយៈពេលប៉ុន្មានឆ្នាំចុងក្រោយនេះ ដោយវាមានការចាប់អារម្មណ៍ខ្លាំងពីបណ្តាប្រទេសជិតខាង និងនៅលើពិភពលោក ។
បើតាមយុវតីមួយចំនួនកាលពីពេល ថ្មីៗកន្លងមកអះអាងស្រដៀងគ្នាថា ការកៀបធ្មេញ ធ្វើឲ្យធ្មេញដុះជិតល្អ និងមើលទៅមានសោភ័ណភាព ។
បម្រើការនៅក្រសួងមហាផ្ទៃកញ្ញាវិមាន អះអាងថា នាងកៀបធ្មេញ រយៈពេលប្រមាណ២ឆ្នាំមកហើយ ព្រោះពេញចិត្តព្រមទាំងមានការជំរុញពីមិត្តភក្តិផង ។
កញ្ញាវិមានបញ្ជាក់ថា «ដំបូងឡើយខ្ញុំហាក់មិនហ៊ានប្រើប្រាស់វិធីកៀបធ្មេញនេះឡើយ ប៉ុន្តែដោយសារតែមានការជំរុញពីមិត្តភក្តិទើបខ្ញុំសម្រេចធ្វើវាឡើង ហើយវាក៏ទទួលបានលទ្ធភាពល្អផងដែរ។
រយៈពេលជាង២ឆ្នាំនេះ ខ្ញុំមិនមានអ្វីប៉ះពាល់ដល់ការដាក់ធ្មេញកៀបនេះឡើយ ប៉ុន្តែផ្ទុយទៅវិញធ្វើឲ្យធ្មេញដុះស្អាត ហើយមានសោភ័ណភាពមាត់ធ្មេញផងដែរ ។ ការដាក់ដំបូងគឺវាមានការឈឺចាប់ខ្លាំងណាស់ដែរ ប៉ុន្តែក្រោយមក បន្ទាប់ពីធ្វើតាមការណែនាំពីក្រុមគ្រូពេទ្យជំនាញ វាមិនមានការឈឺចាប់អ្វីបន្តទៀតឡើយ ប៉ុន្តែរយៈពេល១ខែខ្ញុំត្រូវទៅជួបគ្រូពេទ្យម្តង ដើម្បីដូរកៅស៊ូរឹតថ្មី » ។
កញ្ញាវិមាន កៀបធ្មេញដោយចំណាយប្រាក់ប្រមាណ២ពាន់ដុល្លារ ។
កញ្ញាសួន សុម៉ានុត បុគ្គលិកបម្រើការងារនៅក្រុមហ៊ុនឯកជនមួយឱ្យដឹងស្រដៀងគ្នាដែរថា នាងកៀបធ្មេញយូរមកហើយ ដោយមិនប៉ះពាល់អ្វីគួឲ្យកត់សម្គាល់ឡើយ ។ «ការកៀបធ្មេញផ្តល់ប្រយោជន៍ឱ្យធ្មេញដុះស្មើស្អាត និងមិនមានបញ្ហាឈឺធ្មេញដូចមនុស្សដែលមិនបានប្រើប្រាស់វាទេ ដោយវាជាវិធីមួយមិនមែនគ្រាន់តែជាការលម្អ ទេ ។ ជាទូទៅយើងធ្វើការសម្អាតធ្មេញ ដោយច្រាសដុសធ្មេញជាធម្មតា គ្រាន់តែវាបានធ្វើឲ្យយើងទើសដែកដែលបានដាក់នោះបន្តិច តែវាមិនមែនជាបញ្ហាចោទឡើយ» ។
កញ្ញាម៉ានុត ថា តម្លៃមិនដូចគ្នាទេ ពោលគឺទៅតាមគ្រូពេទ្យឯកទេស ផ្សេងៗគ្នា ហើយតម្លៃវាអាចមានចាប់ពី១ពាន់ដុល្លារទៅ២ពាន់ដុល្លារ ឬអាចលើសពីនេះ ។
មិនដឹងត្រូវដកចេញវិញ ឬយ៉ាងណាទេ តែកញ្ញាម៉ានុតថា បើអាចនាងនឹងប្រើប្រាស់វាឲ្យបានច្រើនឆ្នាំ ព្រោះមិនប៉ះពាល់អ្វីឲ្យធ្ងន់ទេ ។
ដោយឡែកសិល្បការិនីខ្មែរមួយចំនួនក៏កៀបធ្មេញដែរ ដូចជាតារាចម្រៀងដ៏ល្បីកញ្ញាឱក សុគន្ធកញ្ញា កញ្ញាសាឡាត់ ស្រីឡាង និងតារាចម្រៀងវ័យក្មេងសុវត្ថិឌី ធារីកាជាដើម ។
ឱក សុគន្ធកញ្ញា បានកៀបធ្មេញអស់រយៈពេលប្រមាណ២ឆ្នាំកន្លះ មុនពេលនាងសម្រេចចិត្តដោះចេញវិញ ។ ចំណែកកញ្ញា សាឡាត់ ស្រីឡាង និងសុវត្ថិឌី ធារីកា ទើបតែកៀបធ្មេញនាពេល ថ្មីៗកន្លងមក ។
ឱក សុគន្ធកញ្ញា ធ្លាប់អះអាងថា នាងជឿជាក់ជាងមុននៅពេលនាងញញឹម ម្តងៗ បន្ទាប់ពីនាងកៀបធ្មេញ ។
ចំណែកកញ្ញាសាឡាត់ ស្រីឡាង បញ្ជាក់ថា ការដាក់ធ្មេញដែកនេះមានការលំបាកខ្លាំងតែ៣ខែប៉ុណ្ណោះ ព្រោះត្រូវកល់ធ្មេញ ។
សុវត្ថិឌី ធារីកាវិញបានកៀបធ្មេញសម្រាប់កែសម្រស់ ដោយបានវះកាត់ធ្មេញកំណើតរបស់នាងផងដែរ ៕
ចែករំលែកព័តមាននេះ