រាជធានីភ្នំពេញ ៖ ក្មេងស្ទាវ៣នាក់ជិះម៉ូតូមួយគ្រឿងលឿនដូចហោះចាប់ហ្វ្រាំងមិនទាន់ជ្រុលចង្កូតទៅបុកគូទរថយន្តឈប់ស្ងៀមបណ្តាលឱ្យអ្នកឌុបហោះទៅបោកនឹងកញ្ចក់ខាងក្រោយបែកអស់មួយផ្ទាំង អ្នកបើកម៉ូតូទាំង៣នាក់រងរបួសស្រាល ហេតុការណ៍គ្រោះថ្នាក់ចរាចរណ៍បានកើតឡើងកាលពីវេលាម៉ោង១០យប់ ថ្ងៃទី២៤ ខែមិថុនា ឆ្នាំ២០១៧ ស្ថិតតាមបណ្តោយផ្លូវលេខ២១៧ នៅត្រង់ចំណុចមុខផ្សារស្ទឹងមានជ័យថ្មី ភូមិទ្រា២ សង្កាត់ស្ទឹងមានជ័យ ខណ្ឌមានជ័យ ។
រថយន្តរងគ្រោះ ពណ៌ខ្មៅ ពាក់ស្លាកលេខ ភ្នំពេញ 2U-8889 រងការខូចខាតបែកកញ្ចក់ក្រោយមួយផ្ទាំង ម្ចាស់រថយន្តមិនត្រូវបានគេស្គាល់អត្តសញ្ញាណនោះឡើយ ។ រីឯម៉តូបង្កម៉ាកហុងដាឌ្រីមស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ 1D0-8861 អ្នកជិះទាំង៣នាក់មិនត្រូវបានគេស្គាល់ឈ្មោះនោះទេរងរបួសស្រាលទាំង៣នាក់ ។
តាមប្រភពព័ត៌មានពីកន្លែងកើតហេតុឱ្យដឹងថា នៅមុនពេលកើតហេតុគេឃើញរថយន្តរងគ្រោះបើកបរតាមផ្លូវលេខ២១៧ ក្នុងទិសដៅពីកើតទៅលិច ខណៈមកដល់កន្លែងកើតហេតុមានការកកស្ទះចរាចរណ៍ហើយរថយន្តរងគ្រោះបានចាប់ហ្វ្រាំងឈប់ ស្រាប់តែមានក្មេងស្ទាវ៣នាក់ជិះម៉ូតូមួយគ្រឿងលឿនដូចហោះបើកតាមក្រោយចាប់ហ្វ្រាំងមិនទាន់ក៏ជ្រុលចង្កូតទៅបុកគូទរថយន្តពីក្រោយពេញទឹងបណ្តាលឱ្យអ្នកបើកបរម៉ូតូហោះទៅបុកកញ្ចក់ខាងក្រោយបែកអស់មួយផ្ទាំង ។ ក្រោយកើតហេតុម្ចាស់រថយន្ត និងអ្នកបើកបរម៉ូតូទាំង៣នាក់ធ្វើការចរចារគ្នានៅនឹងកន្លែងកើតហេតុជាង១ម៉ោងទើបម្ចាស់ម៉ូតូសងសំណងទៅម្ចាស់រថយន្តចំនួន៣០០ដុល្លារដើម្បីបញ្ចប់រឿងនៅនឹងកន្លែងកើតហេតុ ៕
ចែករំលែកព័តមាននេះ