រាជធានីភ្នំពេញ ៖ បុរសជាឪពុកបង្កើតម្នាក់បានប្ដឹងឲ្យនគរបាល ប៉ុស្ដិ៍រដ្ឋបាលកាកាបធ្វើការចាប់ខ្លួនកូនប្រុសអកត្តញ្ញូរបស់ខ្លួនម្នាក់ ដើម្បីកសាងសំណុំរឿងចាត់ការទៅតាមផ្លូវច្បាប់ ក្រោយពេលដែលអស់លទ្ធភាពប្រៀនប្រដៅ រហូតកូនប្រើប្រាស់គ្រឿងញៀនយ៉ាងងប់ងុល ហើយបានដាល់កញ្ចប់មាត់គាត់ បណ្ដាលឲ្យបាក់ធ្មេញ ព្រមទាំងទាត់ធាក់គាត់ចំនួន២ជើងថែមទៀតផង នេះគឺជាការឈឺចាប់នឹងទទួលរងនូវ ភាពអាម៉ាស់បំផុតសម្រាប់ជីវិតគាត់ និងក្រុមគ្រួសារ។ ហេតុការណ៍នោះបានកើតឡើង កាលពីវេលាម៉ោង១រសៀល ថ្ងៃទី២៣ ខែមិថុនា ឆ្នាំ២០១៧ នៅចំណុចផ្ទះលេខ៨៥A ភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។ កូនប្រុសអកត្តញ្ញូរូបនោះឈ្មោះ ឃុន ឫទ្ធា អាយុ២៥ឆ្នាំ មុខរបរមិនពិតប្រាកដ ស្នាក់នៅផ្ទះកើតហេតុខាងលើ ដោយឡែកបុរសជាឪពុកឈ្មោះ ឡុង រី អាយុ៦៦ឆ្នាំ មុខរបរកសិករ ស្នាក់នៅក្នុងផ្ទះកើតហេតុជាមួយគ្នា។
បុរសជាឪពុកបង្កើតរូបនោះ បានប្រាប់នគរបាលថា កូនប្រុសអកត្តញ្ញូម្នាក់នេះ បានជ្រុលខ្លួនប្រើប្រាស់គ្រឿងញៀនយូរមកហើយ ប៉ុន្តែមុននឹងក្លាយខ្លួនជាមនុស្សញៀនថ្នាំយ៉ាងងប់ងុលបែបនេះ គាត់ដែលជាឪពុកបានស្ដីប្រដៅខ្លាំងណាស់ ប៉ុន្តែមិនស្ដាប់តាមនោះឡើយ ដោយសារតែបែបនេះទើបក្លាយជាញៀនថ្នាំ ម្ដង។ មិនតែប៉ុណ្ណោះធ្លាប់បានចូលមណ្ឌលកែប្រែគ្រឿងញៀន រយៈពេល៣ខែថែមទៀតផង ប៉ុន្តែនៅតែមិន អាចកែខ្លួនបានដដែល បន្ទាប់មកតែងតែបំផ្លិចបំផ្លាញទ្រព្យសម្បត្តិនៅក្នុងផ្ទះ និងលែងដឹងខុសត្រូវស្គាល់ បុណ្យស្គាល់បាប ស្គាល់គុណស្គាល់ទោសអ្វីទាំងអស់។ ជាក់ស្ដែងកាលពីថ្ងៃទី២២ ខែមិថុនា ឆ្នាំ២០១៧ វេលាម៉ោង១រំលងអាធ្រាត្រ កូនប្រុសរូបនេះបានយកថូផ្កា ដែលគាត់ដាំដើមឈើទាល នៅមុខផ្ទះបោះ ចោលអស់។
ប្រភពដដែលបានបន្តថា ក្រោយពេលឃើញសកម្មភាពបែបនេះ គាត់ជាឪពុកបានឃាត់ ស្រាប់តែត្រូវលោកកូនស្រែកគំរាមកំហែង ព្រមទាំងដាល់ចំកញ្ចប់មាត់បណ្ដាលឲ្យបាក់ធ្មេញ និងទាត់ធាក់គាត់ចំនួន២ជើងថែមទៀត បន្ទាប់មកបានរត់គេចខ្លួនបាត់ស្រមោល។ ខណៈនោះគាត់បានអត់ធ្មត់ គិតថាមិនប្ដឹងនគរបាលទេ ប៉ុន្តែបែរជាកូនអកត្តញ្ញូម្នាក់នោះ បានចិត្តត្រឡប់មកវិញ អុកឡុក និងជេរគំរាមគាត់សារជាថ្មីទៀត ទើបគាត់ទ្រាំលែងបានក៏ប្តឹងឲ្យនគរបាលប៉ុស្តិ៍កាកាបជួយអន្តរាគមន៍ឃាត់ខ្លួនតែម្តង៕
ចែករំលែកព័តមាននេះ