រាជធានីភ្នំពេញ ៖ បើទោះបីជាមានគណបក្សនយោបាយ ដល់ទៅចំនួន១២ បានចុះឈ្មោះប្រកួតប្រជែងដណ្តើមអាសនៈក្រុមប្រឹក្សាឃុំ-សង្កាត់ឆ្នាំ២០១៧ក៏ពិតមែន តែមានតែគណបក្សធំៗចំនួនពីរ គឺគណបក្សប្រជាជនកម្ពុជា និងគណបក្សប្រឆាំងតែប៉ុណ្ណោះ ដែលឈ្នះអាសនៈគ្រប់ឃុំ-សង្កាត់ទូទាំងប្រទេស ។
លទ្ធផលបណ្តោះអាសន្នក្រៅផ្លូវការ គឺគណបក្សប្រជាជនកម្ពុជា ទទួលបានអាសនៈក្រុមប្រឹក្សាឃុំ-សង្កាត់ចំនួនសរុប៦.៥០២ ខណៈដែលបក្សប្រឆាំងទទួលបានអាសនៈសរុប៥.០០៥ទូទាំងប្រទេស ។
អ៊ីចឹងតើហ៍ ទើបម្ចាស់ឆ្នោតចាប់អារម្មណ៍ថា តើគណបក្សនយោបាយដែលមានអាសនៈនៅក្នុងរដ្ឋសភា គឺគណបក្សប្រជាជនកម្ពុជា និងគណបក្សសង្គ្រោះជាតិ ដែលជាដៃគូប្រកួតយ៉ាងស្វិតស្វាញ ក្នុងឆាកនយោបាយនឹងប្រើយុទ្ធវិធីអ្វី ក្នុងការដណ្តើមជ័យជំនះគ្នានៅឆ្នាំ២០១៨ខាងមុននេះ?
មន្ត្រីជាន់ខ្ពស់គណបក្សកាន់អំណាចបានអះអាងថា គណបក្សកាន់អំណាចមិនជ្រើសរើសយកអ្វីក្រៅពីការកសាង និងអភិវឌ្ឍន៍ក្រោមយុទ្ធសាស្ត្រចតុកោណដំណាក់ទី៣ សម្រាប់ទាក់ទាញសន្លឹកឆ្នោត សម្រាប់ការបោះឆ្នោតថ្នាក់ជាតិឆ្នាំ២០១៨ ដែលជាការបោះឆ្នោតជ្រើសរើសអ្នកតំណាងរាស្ត្រ ដែលមានចំនួន១២០អាសនៈនោះ ។ នេះបើតាមលោកសុខ ឥសាន អ្នកនាំពាក្យគណបក្សប្រជាជនកម្ពុជាដែលបានប្រាប់កោះសន្តិភាព កាលពីថ្ងៃទី២៣ មិថុនា នេះ ។
លោកបានបញ្ជាក់ថា៖ «ទី១ យើងនឹងធ្វើកំណែទម្រង់លើកគ្រប់វិស័យ ទី២យើងខិតខំបង្កើនគុណភាពសេវាសាធារណៈនៅតាមមូលដ្ឋានដើម្បីទាក់ទាញសណ្តានចិត្តរបស់ពលរដ្ឋឲ្យបោះឆ្នោតឡើងវិញ និងទី៣ខិតខំកែលម្អនូវចំណុខ្វះខាតឡើងវិញ»។ យ៉ាងណាក្តី អ្នកនាំពាក្យគណបក្សកាន់អំណាចបានអះអាងថា គ្មានវិធីណាមួយដែលល្អជាងការខិតខំធ្វើការអភិវឌ្ឍន៍ប្រទេសក្នុងការបំរើផលប្រយោជន៍ជាតិ និងប្រជាជនឡើយ ។
គណបក្សសង្គ្រោះជាតិកន្លងមក មានគោលបំណងអំពីការធ្វើច្បាប់កំណត់អាណត្តិនាយករដ្ឋមន្ត្រី និងបានដាក់ក្នុងគោលនយោបាយខ្លួនផងដែរ ។ បើទោះបីជាកម្ពុជាជា ជាព្រះរាជណាចក្ររាជានិយមអាស្រ័យរដ្ឋធម្មនុញ្ញ មិនមានការកំណត់អាណត្តិនាយករដ្ឋមន្ត្រីនោះទេ ។
ចំពោះការប្រកួតយុទ្ធសាស្ត្រនយោបាយសម្រាប់ការបោះឆ្នោតអ្នកតំណាងរាស្ត្រអាណត្តិទី៦ ឆ្នាំ២០១៨មុខនេះ កោះសន្តិភាពមិនអាចសុំការធ្វើអត្ថធិប្បាយពីមន្ត្រីអ្នកនាំពាក្យបក្សប្រឆាំងលោកយ៉ែម បុញ្ញាឬទ្ធិ លោកយឹម សុវណ្ណ បានទេ ខណៈទូរស័ព្ទទៅជាច្រើនដង រួមទាំងលោកអេង ឆៃអ៊ាង អនុប្រធានបក្សផងដែរ តែគ្មានអ្នកលើក ។ ចំណែកលោក ហូរវ៉ាន់ មន្ត្រីជាន់ខ្ពស់គណបក្សសង្គ្រោះជាតិវិញបានលើកតែទូរស័ព្ទ ប៉ុន្តែលោកសុំមិនធ្វើអត្ថាធិប្បាយនោះទេ ។ លោកបាននិយាយយ៉ាងខ្លីថា មិនបានដឹងគ្រប់ជ្រុងជ្រោយនោះទេ ។
យ៉ាងណាមិញ ក្នុងដំណើរចុះតាមខេត្ត-រាជធានីមួយចំនួន ដូចជាកោះកុង ខេត្តព្រះសីហនុ ក្នុងសប្តាហ៍នេះជាដើម មេដឹកនាំគណបក្សប្រឆាំង គឺលោកកឹម សុខា ហាក់មានអំនួតខ្លាំងថា ជាមួយការកើនអាសនៈមួយចំនួននៃការបោះឆ្នោតឃុំ-សង្កាត់លើកនេះ នោះបក្សរបស់ខ្លូននឹងយកឈ្នះសម្រាប់ការបោះឆ្នោត២០១៨ ដោយសារតែមានសម្លេងប្រហាក់ប្រហែលគ្នា ។ លោក កឹម សុខា ក៏ធ្លាប់បានអះអាងគោនយោបាលរបស់ខ្លួននឹងកំណត់អាណត្តិនាយករដ្ឋមន្ត្រី រកតម្លៃទីផ្សាកសិផល កែទម្រង់ប្រព័ន្ធយុត្តិធម៌ជាដើម។ ជាងនេះ មេបក្សប្រឆាំងធ្លាប់បាន «បបួលគណបក្សកាន់អំណាចឲ្យប្រើគោលនយោបាយដើម្បី ប្រកួតប្រជែងសន្លឹកឆ្នោត ដោយជៀសវាងការប្រើអំពើហិង្សា ឬការគំរាមកំហែង» ជាដើម ។
ជាងនេះ មេបក្សប្រឆាំបានក្អេកក្អាងថា រាល់ការបោះឆ្នោតម្តងៗ គណបក្សខ្លួនតែងតែកើនសម្លេងជាង១០% រហូតក្នុងន័យប្រាប់ទៅម្ចាស់ឆ្នោតថា បក្សរបស់ខ្លួនទទួលបានសម្លេងគាំទ្រច្រើន ។
ចែករំលែកព័តមាននេះ