រាជធានីភ្នំពេញ ៖ ជនសង្ស័យម្នាក់ត្រូវកម្លាំងនគរបាលប៉ុស្ដិ៍ចោមចៅធ្វើការចាប់ខ្លួនកាលពីវេលាម៉ោង៤ល្ងាច ថ្ងៃទី២៣ ខែមិថុនា ឆ្នាំ២០១៧ នៅម្ដុំភូមិដីថ្មី សង្កាត់ស្ទឹងមានជ័យ ខណ្ឌមានជ័យ តាមពាក្យបណ្ដឹងរបស់បុរសម្នាក់ដែលចោទប្រកាន់ថា ជនសង្ស័យធ្វើសកម្មភាពបោកយកម៉ូតូរបស់ខ្លួនកាលពីម៉ោង៨យប់ ថ្ងៃទី២០ មិថុនា។
ជនសង្ស័យខាងលើឈ្មោះ រិទ្ធ ដែន អាយុ២៨ឆ្នាំ មុខកម្មកររោងចក្រកាត់ដេរ ហើយក៏ជាមុខសញ្ញាសេពគ្រឿងញៀន ស្នាក់នៅក្នុងភូមិត្រពាំថ្លឹង សង្កាត់ចោមចៅ ខណ្ឌពោធិ៍សែនជ័យ។ ចំណែកម៉ូតូដែលបានបោកយកនោះម៉ាកហុងដា MSX ពណ៌ក្រហម គ្មានស្លាកលេខ ជាកម្មសិទ្ធិរបស់ឈ្មោះ ជី ចត្ត្រា អាយុ១៧ មុខរបរកម្មកររោងចក្រកាត់ដេរ ស្នាក់នៅក្នុងភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ។
នគរបាលប៉ុស្ដិ៍ចោមចៅបានឲ្យដឹងថា កាលពី៣ថ្ងៃមុន ជនសង្ស័យបានខ្ចីម៉ូតូជនរងគ្រោះជិះ ដោយប្រាប់ថា ខ្ចីតែមួយភ្លែតទេ ខណៈនោះដោយសារតែជាមិត្តនឹងគ្នា ទើបជនរងគ្រោះយល់ព្រម ព្រោះជននោះគ្មានម៉ូតូ ។ ម្យ៉ាងជននោះប្រាប់ថា និងយកឲ្យវិញទេ ប៉ុន្តែមិនបានប្រាប់ថា ជិះទៅណាឡើយ ស្រាប់តែជននោះជិះទៅទិញថ្នាំញៀនទៅវិញ ប៉ុន្តែសំណាងអាក្រក់ពេលកំពុងជិះក៏ជួបនិងនគរបាលដែលកំពុងល្បាត ហើយឃើញថាសង្ស័យ នគរបាលក៏ដេញតាមចាប់ ធ្វើឲ្យជននោះភ័យស្លន់ស្លោរ ហើយជិះរត់គេចមិនរួច ក៏ផ្ដួលម៉ូតូចោល រួចរត់បាតជើងសព្រាតតែម្ដង។
ប្រភពដដែលបន្តថា ក្រោយមកម៉ូតូនោះត្រូវនគរបាលយកទៅរក្សាទុក ដើម្បីស្រាវជ្រាវ ។ ហើយពេលជួបរឿង បែបនេះ ជនសង្ស័យគេចខ្លួនរហូត ចំណែកជនរងគ្រោះព្យាយាមតាមរក ប៉ុន្តែមិនឃើញឡើយ លុះដល់ថ្ងៃទី២១ ជនរងគ្រោះបានទៅដាក់ពាក្យបណ្ដឹង រហូតដល់ថ្ងៃទី២៣ ទើបប្រទះឃើញជនសង្ស័យនៅម្ដុំសង្កាត់ស្ទឹងមានជ័យ ក៏ហៅឲ្យនគរបាលប៉ុស្ដិ៍ឃាត់ខ្លួនតែម្ដង៕
ចែករំលែកព័តមាននេះ