ឈឺខ្លួនហើយអស់ទាំងម៉ូតូទៀត…ដោយសារទើបស្គាល់គ្នា
រាជធានីភ្នំពេញ ៖ បុរសម្នាក់ទៅដាក់ពាក្យបណ្តឹងនៅនគរបាលប៉ុស្តិ៍ទន្លេបាសាក់ឱ្យជួយធ្វើការស្រាវជ្រាវរកម៉ូតូរបស់ខ្លួនមកវិញក្រោយពីរូបគេ
រាជធានីភ្នំពេញ ៖ បុរសម្នាក់ទៅដាក់ពាក្យបណ្តឹងនៅនគរបាលប៉ុស្តិ៍ទន្លេបាសាក់ឱ្យជួយធ្វើការស្រាវជ្រាវរកម៉ូតូរបស់ខ្លួនមកវិញក្រោយពីរូបគេ និងមិត្តភក្តិពីរនាក់ទៀតបានចេញពីក្លឹបហើយទៅអង្គុយផឹកនៅលើសួនច្បារក្បែរកាស៊ីណូណាហ្គាវើល ហើយត្រូវបានក្រុមជនសង្ស័យចំនួន៥នាក់នាំគ្នាយកដុំថ្មគប់ទៅលើពួកគេបណ្តាលឱ្យមិត្តភក្តិម្នាក់រងរបួសបែកក្បាល និងឱ្យបុរសម្នាក់ជិះឌុបយកទៅពេទ្យហើយជិះគេចខ្លួនបាត់ស្រមោលនោះ ។ ហេតុការណ៍នេះដែរបានបង្កការភ្ញាក់ផ្អើលកាលពីវេលាម៉ោង៩និង៣០នាទីព្រឹក ថ្ងៃទី២៣ ខែមិថុនា ឆ្នាំ២០១៧ នៅប៉ុស្ត៍នគរបាលទន្លេបាសាក់ ខណ្ឌចំការមន ។
បុរសរងគ្រោះឈ្មោះ ភិន សម្ភស្ស អាយុ២៤ឆ្នាំ មានទីលំនៅក្នុងភូមិខ្វា សង្កាត់ដង្កោរ ខណ្ឌដង្កោ រាជធានីភ្នំពេញ ម៉ូតូដែលត្រូវបានជនសង្ស័យយកទៅបាត់នោះគឺម៉ាកហុងដា C125 ពណ៌ខ្មៅ ស៊េរីឆ្នាំ ២០១០ ឡើងតែម២០១៥ ពាក់ស្លាកលេខ ភ្នំពេញ1BY-8761 ។ បុរសរងគ្រោះរៀបរាប់បានប្រាប់ឱ្យដឹងថា មុនពេលកើតហេតុកាលពីវេលាម៉ោង៩យប់ ថ្ងៃទី២២ ខែមិថុនា រូបគេ និងមិត្តភក្តិម្នាក់ទៀតឈ្មោះ ថា អាយុ២៥ឆ្នាំ ជាអ្នកធ្វើការងារជាមួយគ្នាជិះម៉ូតូម៉ាកMSX ពណ៌ស ពាក់ស្លាកលេខ ភ្នំពេញ 1DE-8659 ម្នាក់មួយគ្រឿង ទៅចូលផឹកស៊ីនៅក្លឹបកម្សាន្តមួយកន្លែងដែលមានទីតាំងនៅម្តុំស្ថានីយ៍បូមទឹក ផ្លូវ៣៧១ ពេលដែលកំពុងតែអង្គុយផឹកតែពីរនាក់នោះក៏បានឃើញបុរសម្នាក់អាយុប្រហែលជាង២០ឆ្នាំអង្គុយផឹកតែម្នាក់ឯងនៅតុក្បែរនោះក៏បានហៅឱ្យមកអង្គុយផឹករួមតុជាមួយគ្នា ។
ប្រភពដដែលបន្តថា រហូតដល់ម៉ោង១២យប់ថ្ងៃដដែលក៏បាននាំគ្នាចេញពីក្លឹបទៅផឹកនៅលើសួនច្បារក្បែរកាស៊ីណូណាហ្គាពេលនោះរូបគេ និងឈ្មោះ ថា ក៏បានជិះម៉ូតូទៅរកកន្លែងនោមក្បែរនោះ និងត្រឡប់មកវិញមិនទាន់ចុះពីលើម៉ូតូផងក៏ត្រូវបានបុរសចំនួន៥នាក់យកដុំថ្មគប់ទៅលើពួកគេចំឈ្មោះ ថា បែកក្បាលហូរឈាមស្រោចពេញខ្លួន និងចំគេមួយដុំថ្មផងដែរតែរងរបួសស្រាល ។ ពេលនោះរូបគេក៏ឱ្យបុរសម្នាក់ដែលទើបតែបានស្គាល់នៅក្លឹបនោះជូនជនរងគ្រោះទៅពេទ្យ ចំណែកឯម៉ូតូម៉ាក MSX មិនឆេះទុករូបគេអ្នកជិះតាមក្រោយ ហើយបុរសជាជនសង្ស័យបានយកម៉ូតូម៉ាកហុងដា C125 របស់ខ្លួនយកទៅបាត់តែម្តង ។
លុះព្រឹកឡើងពួកគេជួបគ្នា និងសួររកបុរសម្នាក់នោះសួរនាំរកមិនឃើញ និងមិនដែលស្គាល់កាលពីពេលកន្លងមកនោះទើបរត់មកដាក់ពាក្យបណ្តឹងនៅប៉ុស្តិ៍នគរបាលទន្លេបាសាក់ឱ្យជួយស្វែងរកម៉ូតូរបស់ខ្លួនយកមកវិញ ៕
ចែករំលែកព័តមាននេះ