ដំណាំកៅស៊ូកម្ពុជា ជាឧស្សាហកម្មដ៏ចម្បងមួយដែលជួយទ្រទ្រង់កំណើនសេដ្ឋកិច្ចរយៈពេលវែងដល់សង្គមជាតិ ។ បច្ចុប្បន្ន ចម្ការកៅស៊ូបាននិងកំពុងដាំដុះនៅខេត្តមួយចំនួនធំក្នុងប្រទេសកម្ពុជា ដូចជា ខេត្តកំពង់ធំ, កំពង់ចាម, ត្បូងឃ្មុំ, ក្រចេះ, ស្ទឹងត្រែង, មណ្ឌលគិរី និងខេត្តអំណោយផលដំណាំនេះមួយចំនួនទៀត ។ យ៉ាងណាក៏ដោយ គិតមកដល់បច្ចុប្បន្ន ឧស្សាហកម្មមួយនេះ បើទោះជាមានស្ថានភាពប្រសើរជាងកាលពី៥ទៅ១០ឆ្នាំមុនក្ដី ក៏អ្នកជំនាញមើលឃើញថា វានៅតែជួបបញ្ហា និងកំពុងដើរថយក្រោយបន្ដិចម្ដងៗពីការក្លាយខ្លួនជាអ្នកផលិតកៅស៊ូដ៏សំខាន់មួយនៅអាស៊ីអាគ្នេយ៍ ខណៈតម្លៃទីផ្សារកៅស៊ូលើពិភពលោកធ្លាក់ចុះ ដោយសារតែការផ្គត់ផ្គង់លើសតម្រូវការពីប្រទេសដែលមានផលិតកម្មកៅស៊ូច្រើន ។ ក្រៅពីជួបបញ្ហាតម្លៃហើយ ឧស្សាហកម្មមួយនេះក៏កំពុងប្រឈមនឹងការប្រកួតប្រជែងជាមួយអ្នកទិញកៅស៊ូខុសច្បាប់ និងការបង់ពន្ធជាដើម ។
ដើម្បីបង្ហាញពីឧបសគ្គនៃទីផ្សារឧស្សាហកម្មកៅស៊ូកម្ពុជាកាន់តែច្បាស់ លោក បូដ ចេហ្វ (Jet BOEDT)អគ្គនាយកក្រុមហ៊ុនSOCFIN ដែលជាក្រុមហ៊ុនវិនិយោគកៅស៊ូនៅខេត្តមណ្ឌលគិរី លើផ្ទៃដី៧.៥០០ហិកតា បានផ្ដល់កិច្ចសម្ភាសន៍ជាមួយសារព័ត៌មានកោះសន្ដិភាព អំពីទីផ្សារ និងបញ្ហាមួយចំនួន បន្ទាប់ពីសមាជិកនៃប្រទេសផលិតកៅស៊ូធំជាងគេលើពិភពលោក រួមមាន ថៃ ឥណ្ឌូណេស៊ី និងម៉ាឡេស៊ី បានជួបជុំគ្នាពិភាក្សាលើការកាត់បន្ថយផលិតកម្មរបស់ខ្លួន ដោយហេតុថា សកម្មភាពរបស់ពួកគេបានជះឥទ្ធិពលដល់ឧស្សាហកម្មកៅស៊ូរបស់កម្ពុជា ។
១-ក្នុងនាមជាក្រុមហ៊ុនផលិតកៅស៊ូដ៏ធំមួយនៅកម្ពុជា អ្នកគិតយ៉ាងដូចម្ដេចចំពោះកិច្ចពិភាក្សារបស់បណ្ដាប្រទេសផលិតកៅស៊ូលើពិភពលោក ?
គោលបំណងនៃកិច្ចប្រជុំគឺដើម្បីពិនិត្យមើលពីលទ្ធភាពនៃការកាត់បន្ថយផលិតកម្មដើម្បីលើកកម្ពស់តម្លៃកៅស៊ូបច្ចុប្បន្ន ដែលកំពុងមានតម្លៃទាបនៅក្នុងបណ្ដាប្រទេសរបស់ពួកគេរៀងៗខ្លួន។ អ្នកដឹងហើយថា ប្រទេសថៃ ឥណ្ឌូណេស៊ី និងម៉ាឡេស៊ី ជាប្រទេសក្នុងចំណោមអ្នកផ្គត់ផ្គង់កៅស៊ូធម្មជាតិធំៗជាងគេបំផុតនៅលើពិភពលោក ។ អ្វីដែលសំខាន់និងជាពិសេសជាងគេនោះ គឺនៅប្រទេសថៃ កៅស៊ូភាគច្រើនត្រូវបានផលិតដោយកសិករខ្នាតតូចជាលក្ខណៈគ្រួសារ ហើយតម្លៃកៅស៊ូទាបអាចមានផលប៉ះពាល់ធ្ងន់ធ្ងរទៅលើសេដ្ឋកិច្ចក្នុងស្រុក ។
កាលពីពេលកន្លងមក ប្រទេសទាំងនេះតែងតែប្រកាសចេញនូវសកម្មភាពស្រដៀងៗ គ្នាដើម្បីកាត់បន្ថយផលិតកម្ម កុំឲ្យតម្លៃធ្លាក់ចុះបន្ដទៀត ។ កាលពីឆ្នាំមុន ពួកគេបានប្រកាសថា នឹងកាត់បន្ថយផលិតកម្មប្រមាណ៦០លានតោន ដែលជាបរិមាណមួយដ៏ច្រើននៃផលិតកម្មប្រចាំឆ្នាំនៅទូទាំងពិភពលោក ប៉ុន្ដែបញ្ហារហូតមកដល់ពេលនេះ គឺថាវិធានការទាំងនោះមិនត្រូវបានអនុវត្តម្ដងណាឡើយ ។ ប្រសិនបើមានការកាត់បន្ថយមែននោះ វានឹងមានផលប៉ះពាល់ជាវិជ្ជមានមួយយ៉ាងច្បាស់សម្រាប់អ្នកផលិតកៅស៊ូទាំងអស់ រួមទាំងកម្ពុជាផងដែរ ព្រោះថា នៅពេលដែលការផ្គត់ផ្គង់ត្រូវបានកាត់បន្ថយនោះ តម្លៃនឹងមានសញ្ញាវិជ្ជមាន ។
២-ប្រសិនបើពួកគេយល់ព្រមកាត់បន្ថយផលិតកម្មមែន តើវានឹងជះឥទ្ធិពលអ្វីខ្លះដល់ឧស្សាហកម្មកៅស៊ូនៅកម្ពុជា ?
ដូចអ្វីដែលបានពន្យល់ខាងលើ ប្រទេសដែលបានប្រកាសនូវវិធានការបែបនោះ គឺស្ថិតក្នុងចំណោមអ្នកផលិតកៅស៊ូដ៏ធំជាងគេលើពិភពលោក ហើយតម្លៃទីផ្សារក៏វាជះឥទ្ធិពលដោយផ្ទាល់ទៅតាមសកម្មភាពរបស់ពួកគេដែរ។ ប្រសិនបើការនាំចេញរបស់ពួកគេត្រូវបានកាត់បន្ថយមែននោះ បណ្ដាប្រទេសផលិតកៅស៊ូខ្នាតតូច ដូចជាកម្ពុជាជាដើម នឹងទទួលបានសញ្ញាវិជ្ជមានពីសកម្មភាពទាំងនេះ ។
៣-តើអ្នកគិតថាឆ្នាំក្រោយនេះ តម្លៃកៅស៊ូនៅទីផ្សារសកលលោក វាវិវត្តន៍យ៉ាងណាដែរ ?
វាពិបាកណាស់ក្នុងការនិយាយថា ទីផ្សារនឹងដើរដល់ណាសម្រាប់សប្ដាហ៍ខាងមុខ ខែខាងមុខ និងពាក់កណ្ដាលឆ្នាំនេះ ឬពីរបីឆ្នាំខាងមុខ។ ផ្អែកលើបច្ចុប្បន្នភាពនៃតម្លៃកៅស៊ូ ឃើញថា វាមានឱកាសច្រើនដែលទីផ្សារអាចងើបឡើងវិញជាងធ្លាក់ចុះ ។ តម្លៃកៅស៊ូលើទីផ្សារអាចនឹងថេរមួយរយៈដោយស្ថិតនៅចន្លោះ១.៣០០ទៅ១.៦០០ដុល្លារក្នុង១តោន ។ តម្លៃកៅស៊ូលើទីផ្សារបច្ចុប្បន្ន វាអាស្រ័យលើផ្នែកផ្គត់ផ្គង់ជាងផ្នែកតម្រូវការ ជាពិសេស សេដ្ឋកិច្ចចិនមានឥទ្ធិពលដោយផ្ទាល់ជាមួយតម្លៃកៅស៊ូធម្មជាតិ ខណៈដែលប្រទេសនេះជាអ្នកនាំចូលកៅស៊ូដ៏ធំស្ទើរគ្របដណ្តប់ដល់៤០%នៃផលិតកម្មកៅស៊ូលើពិភពលោក ។ សេដ្ឋកិច្ចថមថយនៅប្រទេសចិន ពិតណាស់វាបានប៉ះពាល់ដល់ទំនិញទាំងអស់ ប៉ុន្ដែបញ្ហាភាគច្រើនកើតចេញពីភាគីផ្គត់ផ្គង់ ។ ដើមកៅស៊ូជាច្រើនដែលបានដាំកាលពី១០ឆ្នាំចុងក្រោយ ក្នុងអំឡុងពេលតម្លៃកៅស៊ូកើនឡើងខ្ពស់នោះ ពេលនេះវាកំពុងពេញវ័យអាចផលិតបានយ៉ាងពេញលេញ ។ ដូច្នេះ ការផលិតនឹងកើនឡើងលឿនជាងការប្រើប្រាស់ ដែលបង្កើតឲ្យមានផលលើសដ៏មហិមាមួយ ។ ខ្ញុំមានជំនឿថា ប៉ុន្មានឆ្នាំខាងមុខនេះ ការផ្គត់ផ្គង់និងតម្រូវការ នឹងមានតុល្យភាពជាងមុន ហើយពេលនោះនឹងបង្កើតឲ្យតម្លៃមានស្ថិរភាពបន្ថែមទៀត។ ក្នុងនាមជាផលិតករម្នាក់ អ្នកគ្មានជម្រើសណាមួយល្អជាងធ្វើការបានល្អជាមួយថ្លៃដើមនៃផលិតកម្មរបស់អ្នក និងត្រួតពិនិត្យពួកវានោះទេ ។ ក្នុងនាមជាកសិករម្នាក់ អ្នកអាចសម្រេចចិត្តឈប់ចៀរជ័រ ប៉ុន្ដែក្នុងករណីខ្លះវាពិបាកក្នុងការធ្វើសម្រេចចិត្ត ពីព្រោះមនុស្សត្រូវការចំណូលប្រកបដោយស្ថិរភាពមួយ ។
៤-តើធ្វើយ៉ាងណា ដើម្បីកែលម្អ និងពង្រឹងវិស័យឧស្សាហកម្មកៅស៊ូនៅកម្ពុជា ហើយអ្វីជាចំណុចខ្សោយនោះ ?
ប្រទេសកម្ពុជាកំពុងធ្វើដំណើរយឺតៗជាថ្មីម្ដងទៀតក្នុងការក្លាយជាអ្នកផលិតកៅស៊ូដ៏សំខាន់មួយនៅអាស៊ីអាគ្នេយ៍ ។ សម្រាប់អ្នកផលិតខ្នាតតូចនៅកម្ពុជា ការដាំដុះនិងប្រមូលផលកៅស៊ូជួយឲ្យចំណូលមានស្ថិរភាព ។ កម្ពុជានឹងត្រូវការរចនាសម្ព័ន្ធឲ្យបានច្រើន ដូចជារាជរដ្ឋាភិបាលត្រូវត្រួតពិនិត្យលើពាណិជ្ជកម្មកៅស៊ូ ។ ការដាំដំណាំកៅស៊ូនៅកម្ពុជា ក៏ត្រូវការផងដែរនូវការប្រកួតប្រជែងការធ្វើអាជីវកម្មខុសច្បាប់ ។ អ្នកទិញខុសច្បាប់ អាចផ្ដល់នូវតម្លៃខ្ពស់ជាងទៅកាន់កសិករខ្នាតតូច ដោយសារតែពួកគេមិនបង់ពន្ធអ្វីទាំងអស់ទៅរាជរដ្ឋាភិបាល ដែលវាគ្រោះថ្នាក់បំផុតសម្រាប់សេដ្ឋកិច្ចក្នុងប្រទេស ។
៥-ជាទស្សនៈផ្ទាល់ខ្លួន តើអាជ្ញាធរគ្រប់គ្រងកៅស៊ូ ឬរាជរដ្ឋាភិបាលកម្ពុជា គួរធ្វើយ៉ាងណាដើម្បីឲ្យឧស្សាហកម្មកៅស៊ូកម្ពុជាប្រសើរឡើង ?
បញ្ហាពន្ធនាំចេញកៅស៊ូនៅតែជាក្ដីបារម្ភដ៏ធំសម្បើមសម្រាប់អ្នកដាំកៅស៊ូនៅកម្ពុជា ជាពិសេស ខណៈដែលពួកគេកំពុងជួបប្រទះបញ្ហាតម្លៃកៅស៊ូថោកនៅលើទីផ្សារ ដូចជាពួកយើងនាពេលនេះអីចឹង ។ ការប្រកួតប្រជែងជាមួយបណ្ដាប្រទេសជិតខាងដែលជាអ្នកផលិតកៅស៊ូមិនមានបង់ពន្ធជូនរដ្ឋនោះ បានក្លាយជាបញ្ហាដ៏លំបាកបំផុត ៕
ចែករំលែកព័តមាននេះ