រាជធានីភ្នំពេញ ៖ នៅយប់ថ្ងៃទី១ កក្កដា ខាងមុខនេះ កីឡាការិនី សម ថារ័ត្ន នឹងឡើងប្រកួតក្នុងព្រឹត្តិការណ៍ក្បាច់គុនចម្រុះនៅក្នុងប្រទេសថៃជាផ្លូវការហើយ បន្ទាប់ពីនាងមមាញឹកនឹងសកម្មភាពថតកុន ហើយខកខានការប្រកួតនៅលើសង្វៀនបែបនេះប្រមាណជិតមួយឆ្នាំ ។ នាងបានបង្ហាញពីការត្រៀមខ្លួនជាច្រើនសម្រាប់ជំនួបដ៏ក្ដៅគគុកជាមួយកីឡាការិនីជើងខ្លាំងថៃ ប៉ុន្តែក៏មិនសូវមានជំនឿចិត្តច្រើនដែរ ដោយសារតែអះអាងថា នាងអន់ជើងក្រោម និងមិនបានហូបចុកទៀងពេលព្រោះតែជាប់រវល់ថតកុនផងនាពេលចុងក្រោយ ។
សម ថារ័ត្ន និយាយថា នាងគ្មានការប្រកួតតាំងពីខែ១០ក្នុងឆ្នាំ២០១៦ដោយនាងមិនមែនមិនទទួលប្រកួតនោះទេ ប៉ុន្តែមកពីគ្មានអ្នកណាផ្គូផ្គងឱ្យនាងប្រកួតទើបនាងចេះតែងាកទៅថតកុន ហើយមមាញឹកនឹងការងារសិល្បៈជាជំនួសវិញ ។ នាងថា ខ្លួនទើបតែត្រូវគណៈកម្មការក្បាច់គុនចម្រុះសម្រេចឱ្យឡើងប្រកួតជាថ្មីម្ដងទៀតនៅប៉ុន្មានសប្ដាហ៍មុននេះប៉ុណ្ណោះ ដោយនាងត្រូវគេឱ្យប្រកួតជាមួយកីឡាការិនីថៃនៅលើសង្វៀនទីក្រុងបាងកកនាថ្ងៃទី១ កក្កដា ។
នាងថា នេះមិនមែនជាការប្រកួតលើកទី១របស់ខ្លួននោះទេ ដោយសារតែនាងធ្លាប់ទទួលការប្រកួតជាមួយគណៈកម្មការអន្តរជាតិមួយនេះ៤លើកមកហើយ ដោយគ្រាន់តែទឹកដីថៃសម្រាប់ព្រឹត្តិការណ៍មួយនេះគឺជាលើកទី១ ។ នាងថា ការប្រកួតទាំង៤លើកនោះ គឺសុទ្ធតែនៅក្រៅស្រុកទាំងអស់ដូចជានៅសិង្ហបុរី និងហ្វ៊ីលីពីន ហើយទទួលលទ្ធផលឈ្នះ២លើក និងចាញ់២លើក ។
សម្រាប់ការប្រកួតជាថ្មីម្ដងទៀតនេះ នាងអះអាងថា បានត្រៀមខ្លួនមិនក្រោម១ខែពេញនោះទេ ទម្រាំតែដល់ថ្ងៃប្រកួត ដោយនាងបានទាំងផ្អាកទទួលការងារថតកុន ដែលបានទាក់ទងមកថ្មី ហើយទទួលថតតែការងារដែលនៅសេសសល់ ដើម្បីកុំឱ្យប៉ះពាល់ការហ្វឹកហាត់នោះផង ។ នាងថា សប្បាយចិត្តដែលបានឡើងប្រកួតជាថ្មី តែក៏មិនសូវមានជំនឿចិត្តផងដែរ ដោយសារតែកីឡាការិនីដែលនាងត្រូវប៉ះជាមួយគឺជាកីឡាករជើងខ្លាំង ហើយនាងខ្លួនឯងបើធៀបនឹងពេលប្រកួតញឹកកាលពីច្រើនឆ្នាំមុន គឺពេលនេះហាក់ដូចជាធ្លាក់ជើងក្រោមបន្តិច ។ នាងថា គ្រូបង្វឹកសរសើរថា នាងមានគ្រឹះល្បុក្កតោ និងក្បាច់គុនបុរាណខ្មែរល្អ តែសម្រាប់ជើងក្រោមរបស់នាងគឺមានបញ្ហា ទើបក្នុងប៉ុន្មានថ្ងៃនេះនាងត្រូវចំណាយពេលជាមួយកីឡាករជំនាញៗជាគ្រូបង្វឹកដើម្បីពង្រឹងជើងក្រោម ។ នាងថា ការប្រកួតក្បាច់គុនចម្រុះមិនខុសពីវ៉ៃគ្នាឆ្កួតៗលើរេញនោះទេ ប៉ុន្តែសម្រាប់ឱកាសគ្រោះថ្នាក់គឺមានតិចជាងការប្រកួតប្រដាល់សេរី ដោយសារតែលក្ខខណ្ឌសម្រាប់ការប្រកួត គឺឱ្យតែភាគីណាមួយដួលសន្លប់គេអត់រាប់ទេ គឺឱ្យចាញ់តែម្ដង ដែលនាងយល់ថានោះជាបញ្ហាមួយដែលមិនបង្កគ្រោះថ្នាក់ ។
នាងមានគម្រោងចាកចេញពីប្រទេសកម្ពុជា នៅអំឡុង២ថ្ងៃមុនប្រកួត ឬមួយថ្ងៃមុនប្រកួតតាមជើងយន្តហោះ ដោយនាងអះអាងថា សម្រាប់មួយសប្ដាហ៍រាប់ពីថ្ងៃនេះទៅ គឺដឹងតែហាត់អត់មានពេលសម្រាកតែម្ដង ។ នាងមិនចង់បរាជ័យនៅលើសង្វៀននោះទេ ដោយសារតែនាងនៅចង់ប្រកួត និងចង់បានតម្លៃខ្លួនពីការប្រកួតអន្តរជាតិបែបនេះជាជាងការសម្ដែង ។ នាងថា ការសម្ដែងទទួលបានប្រាក់កម្រៃតិចតួចប៉ុណ្ណោះ ប៉ុន្តែបើការប្រកួតលើរេញអន្តរជាតិគឺបានតម្លៃខ្លួនខ្ពស់ ប្រហាក់ប្រហែលនឹង១ពាន់ដុល្លារ ដែលនាងយល់ថាជាចំនួនខ្ពស់ ព្រោះការហ្វឹកហាត់ដ្បិតថាត្រូវត្រៀមច្រើន ប៉ុន្តែក៏ជាការងារជាប្រចាំដែលនាងត្រូវធ្វើទៅហើយ ។
នាងមិនហ៊ានប្រកាសថា ការប្រកួតនៅយប់ថ្ងៃទី១ កក្កដា ខាងមុខនឹងមានលទ្ធផលឈ្នះត្រឡប់មកវិញនោះទេ តែបើការប្រកួតនោះទទួលបានលទ្ធផលអវិជ្ជមានគឺពិតជាធ្វើឱ្យនាងបាត់បង់ទីផ្សារក្រៅស្រុកដែលជាចំណូលចិត្តរបស់ខ្លួន ។ នាងប្រកាសថានឹងប្រឹងប្រែងឱ្យអស់ពីសមត្ថភាព ថ្វីដ្បិតតែការខានប្រកួតយូរ និងការទទួលថតរឿងបានធ្វើឱ្យនាងពិបាកបាយទឹកត្រូវម៉ោង ហើយប៉ះពាល់ដល់កម្លាំងមួយចំនួនមុនពេលហ្វឹកហាត់ ។
ការប្រកួតលើកនេះ កីឡាការិនីសម ថារ័ត្ន បានចាត់ទុកថា ជាការប្រកួតសំខាន់មួយ បន្ទាប់ពីនាងបាត់មុខអស់ច្រើនខែដោយសារតែគ្មានការផ្គូផ្គង ។ នាងបង្ហាញពីការបារម្ភក្នុងពេលដែលនាងគឺជាធនធានកីឡាការិនីដែលមានការប្រឹងប្រែងមួយរូប ប៉ុន្តែមិនមានការប្រកួតណាមួយដើម្បីកម្ដៅសាច់ដុំ ហើយរង់ចាំតែការប្រកួតអន្តរជាតិដែលយូរៗខែទើបមានម្ដង ។
ក្នុងប៉ុន្មានថ្ងៃនេះ ក្រៅពីប្រឹងប្រែងហ្វឹកហាត់ដើម្បីបង្អួតសមត្ថភាពនៅក្នុងទីក្រុងបាងកក នាងក៏ត្អូញត្អែរពីការប្រិតប្រៀងលើរបបអាហារដើម្បីរក្សាទម្ងន់ និងថែសុខភាពផងដែរ ដោយសារនាងមិនបានយកចិត្តទុកដាក់លើរឿងនេះព្រោះមិនមានការប្រកួតច្រើនខែមកហើយ លុះមកប្រើពេលមួយខែចុងក្រោយដើម្បីហ្វឹកហាត់ និងកំណត់របបអាហារវិញគឺពិតជាលំបាក ។ នាងសារភាពថា មិនមែនតែរូបនាងនោះទេគឺកីឡាករណាក៏ដោយឱ្យតែគ្មានការប្រកួត នោះការម៉ត់ចត់ចំពោះរបបអាហារ និងការហ្វឹកហាត់មិនត្រូវបានធ្វើឱ្យច្បាស់លាស់ ទើបអាចបណ្ដាលឱ្យដៃជើងស្ពឹកស្រពន់ ហើយស្ថានភាពសុខភាពក៏នឹងមានការប្រែប្រួលប្រសិនបើទម្ងន់ឡើងចុះខុសប្រក្រតី ។ ទោះបីយ៉ាងណា សម ថារ័ត្ន បានអះអាងថា ក្នុងនាមជាកីឡាការិនីម្នាក់ដែលមានឈ្មោះចេញទៅប្រកួតនៅក្រៅប្រទេសគឺមិនចង់ចាញ់ត្រឡប់មកវិញនោះទេ តែអាចបណ្ដាលមកពីស្ថានភាពដែលនាងរៀបរាប់ខាងលើគឺជាផលរាំងស្ទះ ទើបមានកីឡាករខ្លះ ដោយនាងបានសំដៅលើខ្លួនឯងផង មានការប្រែប្រួល ។ អ្វីដែលនាងត្រូវគិតមួយ ទៀតគឺថែសុខភាពកុំឱ្យមានការប៉ះពាល់នៅមុន ពេលប្រកួត ជាពិសេសគឺជំងឺផ្ដាសាយដែលមាន ការរាលដាលដល់មនុស្សជាច្រើននៅក្នុងអំឡុងខែធ្លាក់ភ្លៀងនាពេលនេះ៕
ចែករំលែកព័តមាននេះ